وسكەمەندە ماس جۇرگىزۋشى ەكى جىلعا باس بوستاندىعىنان شەكتەلدى

وسكەمەن. قازاقپارات - وسكەمەن قالاسىندا الكاگولدى ىشىمدىك ءىشىپ كولىك تىزگىندەگەن ەر ادام سوتتالدى، دەپ حابارلايدى قازاقپارات ءتىلشىسى.

ش ق و بويىنشا ق ا ج دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، بىلتىر كوكتەمدە ەر ادام اكىمشىلىك جاۋاپكەرشىلىككە تارتىلىپ، 7 جىل مەرزىمگە كولىك ايداۋ قۇقىعىنان ايىرىلعان.

الايدا سوعان قاراماستان ول بىرنەشە اي وتكەن سوڭ ماس كۇيدە رۋلگە وتىرعان.

«قايتادان زاڭبۇزۋشىلىق جاساعان سوتتالۋشى ەكى جىلعا باس بوستاندىعىنان شەكتەلدى. قازىر ازامات پروباتسيا قىزمەتىندە تىركەۋدە تۇر. ينسپەكتورلار ونىمەن كەزدەسىپ، ءتۇسىندىرۋ جۇمىسىن جۇرگىزىپ وتىرادى. ەگەر ول تاعى دا زاڭدى اتتاسا تۇرمەگە قامالۋى مۇمكىن»، - دەدى شەمونيحا اۋداندىق پروباتسيا قىزمەتىنىڭ باستىعى، ادىلەت مايورى گۇلميرا بولەكبايەۆا.

ەستەرىڭىزگە سالا كەتسەك، شىعىس قازاقستاندا 3 كۇن ىشىندە جول ەرەجەسىن بۇزۋعا قاتىستى 4 مىڭنان استام فاكتى تىركەلگەن بولاتىن.