ەلباسى اقان ساتايەۆتى قابىلدادى

نۇر- سۇلتان. قازاقپارات - ەلباسى ش. ايمانوۆ اتىنداعى «قازاق فيلم» اكسيونەرلىك قوعامىنىڭ پرەزيدەنتى اقان ساتايەۆتى قابىلدادى، دەپ حابارلايدى elbasy.kz.

كەزدەسۋدە نۇرسۇلتان نازاربايەۆ تاۋەلسىزدىك العاننان بەرى مەملەكەت ءاردايىم ونەر سالاسىنىڭ دامۋىنا ەرەكشە ءمان بەرىپ كەلە جاتقانىن اتاپ ءوتتى.

- ءسىزدىڭ كينويندۋسترياداعى تاجىريبەڭىز مول، ەلگە ەڭبەگىڭىزبەن تانىلدىڭىز. ءتۇرلى كينوفەستيۆالدەرگە قاتىسىپ ءجۇرسىز. «اناعا اپارار جول»، «توميريس» جانە باسقا دا تۋىندىلارىڭىزدى كورەرمەن جىلى قابىلدادى. قازىر سىزدەرگە ۇلكەن جاۋاپكەرشىلىك جۇكتەلىپ وتىر. الداعى جۇمىستارىڭىزعا تابىس تىلەيمىن، - دەدى ەلباسى.

اڭگىمە بارىسىندا ا. ساتايەۆ نۇرسۇلتان نازاربايەۆقا كوركەم فيلمدەر ءتۇسىرۋ جوسپارلارى مەن وتاندىق كينونىڭ ساپاسىن ارتتىرۋ بويىنشا قابىلدانعان شارالار تۋرالى باياندادى.