«التىن وردا» تاريحىنا ارنالعان كينوجوباعا دايىندىق باستالدى

نۇر-سۇلتان. قازاقپارات - ۇلتتىق كينونى قولداۋ مەملەكەتتىك ورتالىعى التىن وردا تاريحىنا ارنالعان ءىرى كينوجوبانىڭ تۇجىرىمداماسىن ازىرلەۋگە كىرىستى.

وسى ماقساتتا كينو ورتالىعىنىڭ جانىنان جۇمىس توبى قۇرىلعان، ول ەل باسشىلىعىنا بولاشاق كينوجوبانىڭ نەگىزگى كورىنىسىن، مودەلى مەن ارحيتەكتۋراسى بويىنشا ۇسىنىس بەرەتىن بولادى، دەپ حابارلايدى قازاقپارات.

ۇلتتىق كينونى قولداۋ مەملەكەتتىك ورتالىعىنىڭ باسپا ءسوز قىزمەتىنىڭ اقپاراتىنا قاراعاندا، كينوجوباعا دايىندىقتىڭ ءبىرىنشى كەزەڭىندە كاسىبي تاريحشىلار مەن تاجىريبەلى كينودراماتۋرگ، ەتنوگرافتار مەن ادەبيەتتانۋشىلاردان اقپارات جينالادى.

سونىمەن قاتار، ۇلكەن حالىقارالىق تاريحي كينوجوبالاردى جاساۋ بويىنشا تابىستى تاجىريبەسى بار گولليۆۋد، ەۋروپا، رەسەي جانە ازيانىڭ ۇزدىك وندىرىستىك كومپانيالارى اراسىنان جاھاندىق سەرىكتەستەر مەن ينۆەستورلاردى ىزدەۋ جۇرگىزىلۋدە.

«ءبىز جۇمىستى باستاپ كەتتىك. بۇگىن تاڭەرتەڭ ەكى ۇزدىك گولليۆۋدتىق كومپانيامەن ۆيدەوبايلانىس ارقىلى كونفەرەنتسيا وتكىزدىك. جاقىن ارادا ازيالىق ارىپتەستەرىمىزبەن كەزدەسپەكشىمىز. بۇل جەردە ءوندىرىستىڭ قارجىلىق مودەلىن پىسىقتاۋعا باسا نازار اۋدارعان ءجون. كەيىن بىزدە ريبەيت تەتىگى قوسىلۋى مۇمكىن، ياعني، قازاقستان اۋماعىندا جۇمسالعان قاراجاتتىڭ ءبىر بولىگىن شەتەلدىك كومپانيالارعا وتەۋ (ساندار %30 عا دەيىن وزگەرەدى).

باسقا جاعدايدا قالالىق جانە وڭىرلىك كينوكوميسسيالار تاراپىنان بارىنشا قولداۋ كورسەتىلەتىن بولادى. ولاردىڭ قۇزىرەتىنە بيلىك ورگاندارىمەن ءوزارا ءىس- قيمىل جاساۋ، اكىمشىلىك رەسۋرستارعا قول جەتكىزۋ، ءتۇسىرۋ جابدىقتارىمەن جانە كولىكپەن قامتاماسىز ەتۋ، تۇراتىن ورىندى دايىنداۋ، اكتەرلەردى، لوكاتسيالاردى، دەرەكتەمەلەردى ىرىكتەۋ، جالپى، ىڭعايلى كينووندىرىسكە كومەكتەسەتىن بارلىق جاعدايدى جاساۋ كىرەدى»، دەيدى «ۇ ك ق م و» ك ە ا ق باسقارما ءتوراعاسى ەسەتجان قوسىبايەۆ.

ونىڭ سوزىنە قاراعاندا، بۇعان دەيىنگى تاريحي بلوكباستەر ءتۇسىرۋ توڭىرەگىندە بولعان قاتەلىكتەردى قايتالاماي، جوبانى جان- جاقتى پىسىقتاۋعا ۇلكەن جاۋاپكەرشىلىك جۇكتەلەدى. «ءبىرىنشى كەزەكتە ىشكى رەسۋرستاردىڭ ولشەمى الىنادى - قازاقستاندىق كينەماتوگرافيستەردىڭ قايسىسى ادەبي كونتەنتتى قالىپتاستىرۋعا دايىن. تۇسىرىلەتىن كينونىڭ تاريحي كەزەڭى ءىس جۇزىندە ايقىن بولعاندىقتان، ءبىز سينوپسيس پەن ودان كەيىنگى سسەناريدى بارىنشا شىنايى ءارى تەرەڭ ادەبي- تاريحي تالداۋ نەگىزىندە جازۋعا كىرىسۋىمىز كەرەك. بۇل پروتسەسس جەدەل، ءبىراق سونىمەن بىرگە وتە مۇقيات جۇرگىزىلەدى دەپ ايتا الامىن. وسى ماڭىزدى جوبامەن جۇمىس ىستەۋدە ۇلتتىق كينونى قولداۋ مەملەكەتتىك ورتالىعى تاريحي، مادەني، تاربيەلىك جانە ەڭ باستىسى كاسىبي ءادىسنامانى ازىرلەۋ جونىندەگى باستى ۇيلەستىرۋشى بولۋى ءتيىس»، - دەيدى ە. قوسۋبايەۆ.

ونىڭ ايتۋىنشا، بۇنداي كارتينا ەرەكشە مادەنيەتتانىمدىق اسپەكتىلەرگە تولى. سوندىقتان، كينو ورتالىعى حالىقتى جوبانىڭ جۇمىس بارىسى مەن ودان ءارى ىسكە اسىرۋ جونىندە قابىلدانعان شەشىمدەر تۋرالى حاباردار ەتەتىن بولادى. ايتا كەتەرلىگى، پرەزيدەنت قاسىم-جومارت توقايەۆ ءوزىنىڭ ۇندەۋىندە كينەماتوگرافيستەرگە تاريحي تاقىرىپتاعى فيلمدەردى شىعارۋ قاجەتتىگىن ايتقان بولاتىن.

«بۇگىندە الەمدىك كينويندۋستريادا تاريح تاقىرىبىنداعى سەناريلەرگە سۇرانىس جوعارى. وسى ورايدا ءبىزدىڭ دە شەجىرەمىزدە اۋقىمدى فيلمدەرگە ارقاۋ بولاتىن ماڭىزدى بەلەستەر مەن وقيعالار بارشىلىق. مىسالى، الەمدەگى ەڭ قۋاتتى يمپەريالاردىڭ ءبىرى بولعان التىن وردا تاريحى دايىن تۇرعان جوق پا؟! بۇل ماسەلەگە بولاشاقتا كينو سالاسىنىڭ ماماندارى باسا نازار اۋدارعانى ءجون»، - دەپ اتاپ وتكەن ەدى پرەزيدەنت.

اۆتور: قانات مامەتقازى ۇلى