«ۇ ب ت- دان شەت ءتىلى الىنىپ تاستالدى» دەگەن جەلىدەگى اقپاراتقا تۇسىنىك بەرىلدى

نۇر-سۇلتان. قازاقپارات - ەندى مەكتەپ تۇلەكتەرى شەت تىلىنەن ۇلتتىق ءبىرىڭعاي تەستىلەۋ (ۇ ب ت) تاپسىرمايدى.

سەبەبى، بۇل ولاردى ەلدەن كەتۋگە يتەرمەلەيدى - الەۋمەتتىك جەلىدە وسى مازمۇنداعى اقپارات تاراۋدا، دەپ حابارلايدى قازاقپارات.

سونداي-اق تارالىپ جاتقان مالىمەتتە جاقىندا مەكتەپتەردە ءبىرقاتار ءپاندى وقىتۋ توقتاتىلادى. سەبەبى دەنە شىنىقتىرۋ ءپانى - قازاقستاننان قالاي قاشۋدى، گەوگرافيا ءپانى - قاي ەلگە قاشۋعا بولاتىنىن، ال تاريح ءپانى ەلدەن نەلىكتەن قاشۋ كەرەكتىگىن ۇيرەتەدى.

ارينە، بۇل ءازىل ەكەنى انىق، ءبىراق ادامداردىڭ كوبى مۇنى شىنايى اقپارات رەتىندە قابىلداعان. Stopfake.kz سايتىنىڭ جازۋىنشا، قازاقستاندا ۇ ب ت- داعى بەيىندىك پاندەر تىزىمىنەن شەت تىلدەرىن جانە باسقا دا پاندەردى الىپ تاستاۋ جوسپارلانباعان.

«ۇ ب ت- دان شەت ءتىلىن جانە باسقا دا پاندەردى الىپ تاستاۋ تۋرالى الەۋمەتتىك جەلىلەر مەن مەسسەندجەرلەردە تاراتىلعان اقپارات شىندىققا سايكەس كەلمەيدى. رەسمي دەرەككوزدەردەن تاراعان اقپاراتتى پايدالانۋىڭىزدى سۇرايمىز»، - دەلىنگەن ۇلتتىق تەستىلەۋ ورتالىعىنىڭ Instagram-داعى رەسمي پاراقشاسىندا.

«ال ءازىل - رەسەيلىك بلوگەر ۆەرا افاناسەۆانىڭ شەت ءتىلىن ءبىرىڭعاي مەملەكەتتىك ەمتيحاننان (ۇ ب ت انالوگى) الىپ تاستاۋ تۋرالى جاڭالىق بويىنشا جازعان پوستىنان الىنعان كالكا. رەسەي ءبىلىم مينيسترلىگى ۇستىمىزدەگى جىلدىڭ قاڭتارىندا مىندەتتى ءبىرىڭعاي مەملەكەتتىك ەمتيحاننان شەت ءتىلىن الىپ تاستاۋ تۋرالى شەشىم قابىلداعان بولاتىن»، - دەپ جازادى Stopfake.kz.