قازاقستاندا الەۋمەتتىك ءاميان جوباسى ەنگىزىلمەك
ۇكىمەت وتىرىسىندا ۇلتتىق بانك ءتوراعاسى ەربولات دوسايەۆ وسىلاي دەدى، دەپ حابارلايدى قازاقپارات ءتىلشىسى.
«فيسكالدىق ساياساتتىڭ كونترتسيكلدىلىعىن ارتتىرۋ كوزدەلگەن. ونىڭ اياسىندا ۇكىمەت ۇلتتىق بانكپەن بىرلەسىپ، 2022-جىلدان باستاپ فيسكالدىق ءتارتىپتى جانە ەكونوميكانىڭ سىرتقى توسىن وزگەرىستەرگە بەيىمدىلىگىن ارتتىراتىن جاڭا بيۋدجەتتىك قاعيدالاردى ەنگىزۋدى قامتاماسىز ەتەدى. ۇلتتىق بانك قارجىلىق تۇراقتىلىقتى قامتاماسىز ەتۋگە جانە قارجى سەكتورىن دامىتۋعا جاردەم كورسەتەدى. مەملەكەت باسشىسىنىڭ تاپسىرماسى بويىنشا 2022-جىلدان باستاپ ۇلتتىق تاۋار وتكىزۋ جۇيەسىمەن ودان ءارى ىقپالداستىرا وتىرىپ، الەۋمەتتىك ءامياندى ەنگىزۋ جوسپارلانۋدا»، - دەدى ەربولات دوسايەۆ.
ونىڭ ايتۋىنشا مەزەتتىك تولەمدەر جۇيەسىن دامىتۋ ارقىلى ۇلتتىق تولەم جۇيەسىن قۇرۋ جانە تولەم كارتوچكالارىنىڭ بانكارالىق جۇيەسىن ۇيىمداستىرۋ جۇمىسى جالعاسادى. بۇل حالىق پەن بيزنەس ءۇشىن ترانزاكتسيالىق شىعىنداردى تومەندەتۋگە، قارجىلىق قىزمەتتەردىڭ قولجەتىمدىلىگىن ارتتىرۋعا جانە قارجى نارىعىنداعى باسەكەلەستىكتى كەڭەيتۋگە مۇمكىندىك بەرەدى.