ماۋلەن اشىمبايەۆ: «اباي- توعجان» قويىلىمى اباي تانۋ ىلىمىنە تىڭ سەرپىن بەرگەن تۋىندى - فوتو
«بىلتىر ەلىمىزدە ابايدىڭ 175 جىلدىعى كەڭىنەن اتالىپ ءوتتى. سونىڭ اياسىندا اۋقىمدى جۇمىس اتقارىلدى. دەگەنمەن، ۇلى ويشىلدىڭ وسيەتتەرىن دارىپتەۋ جولىندا ءبىر جىلمەن شەكتەلىپ قالۋعا بولمايتىنى تۇسىنىكتى. ويتكەنى ءبىزدىڭ ۇلتتىق بولمىسىمىز بەن دۇنيەتانىمىمىزدىڭ قالىپتاسۋىندا حاكىم ابايدىڭ ءرولى ەرەكشە. ءبىز بويىمىزدى دا، ويىمىزدى دا اباي سوزدەرىنە قاراپ تۇزەيمىز. سوندىقتان اقىن مۇراسىن دارىپتەۋ، اسىرەسە، ونى وسكەلەڭ ۇرپاقتىڭ ساناسىنا ءسىڭىرۋ قاشاندا ماڭىزدى»، - دەپ جازدى سەنات ءتوراعاسى Facebook پاراقشاسىندا.
وسى ورايدا ول ەلوردامىزداعى مۋزىكالىق جاس كورەرمەن تەاترىنىڭ يگىلىكتى ءىسىن ەرەكشە اتاپ وتەدى.
«تاياۋدا اتالعان ونەر ورداسىندا «اباي- توعجان» قويىلىمىن تاماشالاپ، كەرەمەت رۋحاني كەشتىڭ كۋاسى بولدىم. بۇعان دەيىن كوبىنە اقىننىڭ ۇلعايعان شاعىن كورىپ كەلسەك، بۇل جولى ءبىز جاس ابايدى كوردىك. ونىڭ كەمەڭگەر بولىپ قالىپتاسۋىنىڭ العاشقى كەزەڭدەرىنە ۇڭىلدىك. اقىن ليريكاسىنىڭ باستاۋىنا نازار اۋداردىق. سول سەبەپتى، اتالعان سپەكتاكلدى اباي تانۋ ىلىمىنە تىڭ سەرپىن بەرگەن تۋىندى دەپ قابىلدايمىن. شىن مانىندە، ويشىلدىڭ ءومىر جولى - كۇرەسكە تولى كۇردەلى جول. ونى اباي مەن توعجاننىڭ ماحابباتىنان دا اڭعارۋ قيىن ەمەس. سونداي كەزەڭدەر اقىن فيلوسوفياسىنىڭ قالىپتاسۋىنا ۇلكەن اسەرىن تيگىزگەنى ءسوزسىز. قويىلىمدا سونىڭ ءبارى ەرەكشە تاپقىرلىقپەن سۋرەتتەلگەن»، - دەدى ماۋلەن اشىمبايەۆ.
سەنات سپيكەرىنىڭ اتاپ وتۋىنشە، بۇل تەاتردىڭ اشىلعانىنا كوپ ۋاقىت بولا قويعان جوق. سوعان قاراماستان اباي ءومىرىن ساحنالاۋ ارقىلى كورەرمەنگە ايتارى مول ونەر ورداسى رەتىندە تانىلىپ وتىر. ونىڭ رەپەرتۋارىندا مۇقاعاليدىڭ، ءشامشىنىڭ شىعارماشىلىعىنا ارنالعان قويىلىمدار دا بار.
«وسى رەتتە تەاتردىڭ اكتەرلەر قۇرامىنا دا توقتالا كەتكەن ءجون. ولاردىڭ قاتارىندا سامال ەسلياموۆا، ايان وتەپبەرگەن، اسىلحان تولەپوۆ سياقتى بەلگىلى دارىن يەلەرىمەن بىرگە جاس تالانتتار دا بار. ونەرسۇيەر قاۋىمعا عاجايىپ كوڭىل- كۇي سىيلاپ جۇرگەن تەاتر اكتەرلەرىنە جانە وسى ۇجىمنىڭ باسشىسى، كاسىبي رەجيسسەر، شەبەر ۇيىمداستىرۋشى اسحات مايامەروۆكە ايرىقشا العىسىمىزدى بىلدىرەمىز. تەاتر - كلاسسيكالىق ونەر. ال، كلاسسيكا قاشاندا بيىك تۇرادى. سول سەبەپتى، جاس تەاتردىڭ عۇمىرى ۇزاق بولارىنا سەنەمىز جانە سوعان تىلەكشىمىز. الار اسۋلارىڭىز كوپ بولسىن. ىندەتتەن تەزىرەك قۇتىلىپ، زال كورەرمەنگە لىق تولاتىن كۇن تۋسىن. قازاق ونەرى جاساي بەرسىن!»، - دەپ ىزگى تىلەگىن جەتكىزەدى سەنات ءتوراعاسى.
