فۋتبولدان قازاقستان قۇراماسى جاڭا جۇيەنى ىسكە قوستى
قازاقستان فۋتبول فەدەراتسياسىنىڭ باسپا ءسوز قىزمەتى مالىمەتىنشە، قازاقستاندىق كلۋبتاردا ونەر كورسەتەتىن فۋتبولشىلاردىڭ ءدال قازىرگى مەزەتتەگى فيزيكالىق جاعدايلارى تەكسەرىلىپ، ولاردىڭ كورسەتكىشتەرى ارنايى بازاعا ەنگىزىلدى.
الداعى ۋاقىتتا قۇراما كومانداعا الىناتىن ويىنشىلاردىڭ ناتيجەلەرى وسى قوردان الىنىپ، ولاردىڭ ءار ۋاقىتتا قانداي پروگرەسس جاساعانى بەلگىلى بولماق. سونىمەن قاتار، 6 اي بۇرىن الىنعان ناتيجەسىنەن تومەن كورسەتكىش تىركەگەن فۋتبولشى كەرىسىنشە فيزيكالىق تۇرعىدان ناشارلاپ كەتكەنىن دە انىق اڭعارۋعا بولادى دەيدى باس باپكەر تالعات بايسۋفينوۆ.
ول قاراعاندىلىق «شاحتەر» كومانداسىنىڭ ويىنشىلارىن تەكسەرىستەن وتكىزىپ، ءوز پىكىرىن ءبىلدىردى.
«ءبىز بەلگىلى باپكەر پاۆەل چەرەپانوۆپەن بىرلەسە وتىرىپ بۇكىل فۋتبولشىنىڭ ءدال قازىرگى فيزيكالىق جاعدايىن ولشەپ، سەرۆەرگە تىركەپ قويۋدى ءجون ساناپ وتىرمىز. مۇنداي جۇيە قازاق فۋتبولىندا بۇرىن بولعان. ءبىراق، ءبىزدىڭ قازىر ىستەپ جاتقان جۇيەمىز ءسال كەڭەيتىلگەن، تولىقتىرىلعان نۇسقا بولادى. مىسالى، قازىر «شاحتەر» فۋتبول كلۋبىنىڭ ويىنشىلارىن تۇگەلىمەن تەكسەرىپ الدىق. ولاردىڭ ىشىندە جاس اياقدوپشىلار دا بار. بالكىم ولار پرەمەر-ليگا ويىندارىندا وزدەرىن كورسەتىپ، تالانتتارىن تانىتاتىن بولسا، وسىندا جيناپ العان ساندارعا بايلانىستى ءبىز قورىتىندى شىعارامىز. كەلەسى ءبىر وقۋ-جاتتىعۋ جيىنىنا شاقىرعان كەزدە وسىنداي تەستتى تاعى ءبىر مارتە قايتالاپ الامىز»، - دەيدى قازاقستان قۇراماسىنىڭ باس باپكەرى.