قىتايدا كينوجۇلدىزعا اينالعان ريزا ءالىمجان قىزى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» حالىقارالىق اقپارات اگەنتتىگى شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قىتايدا كينو جۇلدىزىنا اينالعان ريزا ءالىمجان قىزى - CNR

قىتايدىڭ kazakcnr.com سايتىندا سول ەلدە ونەر ورىندە ميلليونداعان باسەكەلەستەرىنىڭ الدىن وراپ، تالانتىمەن تالايدى تاڭداي قاقتىرىپ جۇرگەن قانداسىمىز، بەلگىلى اكتريسا ريزا ءالىمجان قىزى تۋرالى ماقالا جارىق كوردى.

اتالعان ماقالاداعى دەرەكتەرگە سۇيەنسەك، قىتايدا ونەرىمەن كورەرمەن كوزايىمىنا اينالعان ريزا ءالىمجان قىزى كينو سالاسىندا Reyizha Alimjan نەمەسە Rayza دەگەن ەسىمىمەن تانىمال بولعان. ول 1986 -جىلى 15 -شىلدەدە بەيجىڭ قالاسىندا دۇنيەگە كەلگەن. اكەسى ءالىمجان نۇرعازى ۇلى مەن اناسى زايىمحان بەيجىڭ قالاسىنداعى ورتالىق ۇلتتار باسپاسىنىڭ قازاق رەداكسياسىندا جۇمىس ىستەيدى. ولار 1970 -جىلدارى شىڭجاننان بەيجىڭگە ستۋدەنت بولىپ بارىپ، جۇمىس ىستەپ، قونىستانىپ قالعان ەكەن.

«ريزا بەيجىڭدە العاش مەكتەپكە بارعاندا سىنىپتاستارى ءتۇر- سيپاتى وزدەرىنەن وزگەشە، ەرەكشە بالاعا جاتىرقاپ قاراپ، شىڭجان ولكەسىنەن كەلگەنىن ءبىلىپ، «كاۋاپشى» (شاشىلىق ءپىسىرۋشى) دەپ ات قويعان. مۇنى تۇسىنە الماعان ريزا اناسىنان سەبەبىن سۇراعاندا، اناسى «بالام، تەك وقۋىڭدى جاقسى وقى، ءبىلىمدى، جاقسى بالا بولساڭ، ەلدىڭ بارلىعى ساعان قۇرمەتپەن قارايتىن بولادى» دەيدى. بۇل ءسوز ونىڭ جىگەرىن جانىپ، جان- جاقتى تالاپتانۋىنا وڭ اسەرىن تيگىزەدى» دەپ جازىلعان ماقالادا.

اتالعان جازبانىڭ دەرەگىنشە، ريزا ءان ايتۋعا، كىتاپ وقۋعا ىنتالى بولۋىمەن بىرگە، مەكتەپتە ساباعىن دا ۇزدىك وقىعان. ول 15 جاسىندا مودەلدىك الەمگە كەزدەيسوق قادام باسىپ، تانىمال «Ruili» ءسان جۋرنالى ۇيىمداستىرعان بايقاۋعا قاتىسىپ جۇلدەگەر اتانادى. وسىلايشا ريزا «Ruili» جۋرنالىنىڭ تاريحىنداعى مۇقاباسىنا سۋرەتى باسىلعان ەڭ جاس مودەل بولۋمەن بىرگە، 3 جىل وسى باسىلىمدا كەلىسىمشارتپەن جۇمىس ىستەيدى.

ايتسەدە، ريزا مودەل بولۋدان كورى اكتەر بولۋعا ىنتالى بولىپ، 2002 -جىلى بەيجىڭ كينو اكادەمياسىنىڭ اكتەرلىك فاكۋلتەتىنە وقۋعا تۇسەدى. ول كاسىبي ءبىلىم الىپ، وقۋىن اياقتاعان سوڭ «كارتاڭىزدى اشىڭىز» فيلمىنە ءتۇسىپ، كينو يندۋسترياسىنداعى تۇڭعىش ونەر ساپارىن باستايدى. وسىدان كەيىن تالانىتتى قانداسىمىز اۋديتورياسى ۇلكەن قىتايدىڭ كينو يندۋسترياسىنا قۇلاش ۇرىپ، ءوز قولتاڭباسىمەن كورەرمەن ىقىلاسىنا بولەنگەن كوپتەگەن فيلمدەرگە تۇسەدى.

ول كومەديالىق «سۋايتتار شايقاسى» كينوسىندا، پاتشا ورداسىنداعى كۇندەس حانىمدار تۋرالى «گارەمدەگى چجۋان حۋاننىڭ ءومىرى» تەلەحيكاياسىندا، بۇگىنگى قالا ومىرىندەگى ماحاببات تاقىرىبى ارقاۋ بولعان «ماحاببات پا، وعان مەن دايىن» تەلەفيلمىندە جانە «ماحاببات بۇيرىقتان اسا المايدى»، «ءبىز عانا بىلەتىن مەكەن»، «شىندىق ايتىلمايتىن ايماق»، «قارلى دالاداعى ايەل پاتشا»، «قۋعىنداۋ» سەكىلدى كوپتەگەن فيلمدە ءرولىن ءساتتى سومداپ شىعادى.

ريزا 2017 -جىلى «قۋعىنداۋ» فيلىمىندەگى ءرولى ءۇشىن XX شاڭحاي حالىقارالىق كينو فەستيۆالىندە «ب ا ق- تىڭ نازارىن ءجيى اۋدارعان اكتريسا» نوميناتسياسىندا ماراپاتتالادى. ال، 2019 -جىلى «چاڭانداعى ءبىر تاۋلىك» اتتى تەلەفيلمىندەگى ءرولى ءۇشىن قىتايدىڭ Huading بايقاۋىندا ەڭ «ۇزدىك اكتريسا» اتانادى. سونداي- اق، ريزانىڭ 2020 -جىلى تۇسكەن «تاۋ- تەڭىزدەي ماحاببات» فيلمى 2021 -جىلدىڭ قاڭتار ايىندا كورەرمەنگە جول تارتىپ، حالىقتىڭ جاقسى باعاسىنا يە بولدى. سونىمەن بىرگە ريزا تاعى ءبىر سوڭعى قۋانىشتى جاڭالىعىن كوپشىلىكپەن Weibo جەلىسىندە ءبولىسىپ، ءوزىنىڭ انا اتانىپ، قىزى دۇنيەگە كەلگەنىن جاريالادى.

تاريحي تۇلعالاردىڭ ەسىمى قانشا بالاعا قويىلعان – Kaznews

Kaznews اقپارات اگەنتتىگى موڭعوليادا بالاعا قويىلعان تاريحي تۇلعالاردىڭ ەسىمىنە قىسقاشا زەرتتەۋ جاساپ كوردى.

«حالىقتىڭ ارداقتىسى بولعان ادامداردىڭ اتىن قويۋ - سول ادامداردىڭ ەسىمىن ۇمىتتىرماۋ، ۇرپاقتىڭ ەسىنە سالۋ سياقتى ماڭىزعا يە. ستاتيستيكالىق مالىمەتتەرگە جۇگىنسەك، موڭعول حالقى تەمۇۇجين ەسىمىن 7852 بالاعا، ءسۇحبااتار ەسىمىن 4272، ماندۋحاي ەسىمىن 1072 بالاعا، بورتە ەسىمىن 714 بالاعا، شىڭعىس ەسىمىن 648 بالاعا بەرگەن.

ال، ەلدىڭ باتىس ولكەسىن مەكەن ەتكەن قازاق حالقى جانىبەك ەسىمىن 419 بالاعا، باۋىرجان ەسىمىن 368 بالاعا، نۇرسۇلتان ەسىمىن 316 بالاعا، مۇستافا ەسىمىن 307 بالاعا، رامازان ەسىمىن 224 بالاعا، اباي ەسىمىن 83 بالاعا، ءاليحان ەسىمىن 76 بالاعا، مۇحامەد ەسىمىن 66 بالاعا، شىڭعىس ەسىمىن 38 بالاعا بەرگەن ەكەن. ەلىمىزدە سوڭعى جىلدارى ەڭ كوپ قويىلعان ۇل بالانىڭ ەسىمدەرى - ەراسىل 419، ءنۇرالي 414، ءالي 335 بولسا، قىزدار اراسىندا - ءامينا 2280 (موڭعول، قازاق) ، ارۋجان 497، جانەركە 496، ايزەرە 402، ايارۋ 394، ءمادينا 390، كاۋسار 344 كوپ كەزدەسەدى»، - دەپ جازادى KAZNEWS پورتالى.

قاڭتاردا 110 ميلليون دوللارلىق تەرى ەكسپورتقا شىقتى - TRT

تۇركيانىڭ تەرى جانە تەرى ونىمدەرى سەكتورىندا وتكەن ايدا 110 ميلليون 259 مىڭ دوللارلىق ەكسپورت جاسالدى، دەپ حابارلايدى تۇركيا راديو تەلەۆيزيا پورتالى.

«تۇركيا تەرى كاسىپورنىنىڭ ەكسپورتىندا 69 ميلليون 859 مىڭ دوللارمەن ىستانبۇل العاشقى ورىنعا شىقتى. بۇل - تەرى جانە تەرى ونىمدەرى سەكتورىنىڭ 63 پايىزى. تەرى جانە تەرى ونىمدەرى سەكتورىندا ەڭ كوپ ەكسپورت جاسالعان ەل گەرمانيا بولدى. گەرمانياعا وتكەن اي 10 ميلليون 330 مىڭ دوللارلىق ەكسپورت جاسالدى. رەسەي 8 ميلليون 858 مىڭ دوللارلىق ەكسپورتپەن ەكىنشى، يتاليا 5 ميلليون 487 مىڭ دوللارلىق ەكسپورتپەن ءۇشىنشى ورىندى يەلەدى»، - دەپ جازادى TRT.

حيۋا قالاسىندا يۋنەسكو حالىقارالىق مادەني فورۋمى وتەدى – ءوزا

يۋنەسكو- نىڭ قولداۋىمەن وزبەكستاننىڭ حيۋا قالاسىندا «ورتالىق ازيا وركەنيەتتەر توعىسىندا» اتتى حالىقارالىق مادەني فورۋم وتەدى، دەپ جازادى وزبەكستاننىڭ ءوزا مەملەكەتتىك اقپارات اگەنتتىگى.

«يۋنەسكو بىرنەشە جىلدار بويى ورتالىق ازيانىڭ ورتاق تاريحى مەن مادەني مۇراسىنا نازار اۋدارىپ كەلەدى. وسىعان وراي ۇيىمدا «جىبەك جولى» جوباسى ىسكە قوسىلىپ، وندا مادەنيەتتىڭ، گاسترونوميانىڭ جانە ءسان ونەرىنىڭ دامۋىنداعى ساۋدا جولدارىنىڭ بىرەگەي توعىسۋىنىڭ ءرولى تۋرالى، سپورت ويىندارىنىڭ تارالۋى، ساياحاتشىلارعا قاۋىپ توندىرەتىن ينفەكتسيالار تۋرالى كوبىرەك ماالىمەتتەر بىلۋگە مۇمكىندىك بەرەدى. يۋنەسكو حيۋا قالاسىندا وتەتىن حالىقارالىق مادەني فورۋمىن «وسى ايماقتىڭ جالپى مادەنيەتى مەن مۇراسىن زەرتتەۋگە جانە ناسيحاتتاۋعا مۇمكىندىك بەرەدى» دەپ سانايدى»، - دەپ جازادى «ءوزا» اگەنتتىگى.

قازاقستان سوچيدە وتەتىن «سيريا بەيبىتشىلىگى» كەلىسسوزىنە قاتىسادى – فارس

قازاقستان س ءى م- ءنىڭ ارنايى وكىلى رەسەيدىڭ شاقىرۋىمەن سوچيدە وتەتىن «سيريا بەيبىتشىلىگى» اتتى ون بەسىنشى حالىقارالىق كەلىسسوزگە قاتىسادى، دەپ جازادى «فارس» اقپارات اگەنتتىگى.

«ب ۇ ۇ باس حاتشىسىنىڭ ارنايى وكىلى گەير پەدەرسەن مەن رەسەيدىڭ پرەزيدەنتىنىڭ سيريا ىستەرى جونىندەگى ارنايى وكىلى الەكساندر لاۆرەنتيەۆ قازاقستانداعى «سيريا بەيبىتشىلىگى» ۇدەرىسىنىڭ ىلگەرىلەۋىن وڭ باعالاپ، كەلىسسوزدىڭ كەلەسى كەزەڭىنىڭ نۇر- سۇلتان قالاسىندا وتەتىنىنە ءۇمىت ءبىلدىردى» دەپ جازادى Рarstoday .

اۆتور: باقىتجول كاكەش