باسكەتبول: قازاقستان قۇراماسى ءۇشىنشى مارتە جەڭىسكە جەتتى
ەستەرىڭىزگە سالا كەتەلىك، قازاقستاندىق باسكەتبولشىلار F توبىندا سىنعا تۇسۋدە. قارسىلاستارى - يوردانيا، پالەستينا جانە شري- لانكا قۇرامالارى.
قازاقستاندىقتار پالەستينانى 93:56 ەسەبىمەن جەڭدى. توپتاعى العاشقى ويىندار 2020 -جىلدىڭ 21 - اقپانىندا باستالدى. سول كۇنى قازاقستان پالەستينانى 79:76 ەسەبىمەن جەڭدى. ودان كەيىن 24 -اقپاندا يوردانياعا 68:71 ەسەبىمەن جول بەردى. بۇدان كەيىن كوروناۆيرۋس ينفەكسياسىنا بايلانىستى ويىندار كەيىنگە شەگەرىلدى. ول بيىلعى جىلدىڭ 18 - اقپانىندا قايتا جالعاستى. قالعان ويىنداردىڭ بارلىعى باحرەيندە وتكىزىلەتىن بولىپ شەشىلدى.
سول كۇنى قازاقستاندىق باسكەتبولشىلار شري- لانكانى 111:52 ەسەبىمەن ءسۇرىندىردى. قازاقستان قۇراماسى ءتورت ويىننان كەيىن 7 ۇپاي جيناپ، كوش باسىندا تۇر. ودان كەيىنگى ورىندا ولاردان ەكى ويىننان 4 ۇپاي جيناعان يوردانيا كەلەدى. ال 3 كەزدەسۋ وتكىزگەن پالەستينانىڭ 4، شري- لانكانىڭ 3 ۇپايى بار.
قازاقستان كەلەسى ويىنىن 21 -اقپاندا يوردانياعا قارسى وتكىزەدى. ال 22 -اقپاندا شري- لانكامەن تاعى ءبىر مارتە شەبەرلىك بايقاسادى.
ايتا كەتەيىك، ازيا كۋبوگى 16-28 -تامىز ارالىعىندا يندونەزيادا وتەدى. ءاربىر توپتا ءبىرىنشى جانە ەكىنشى ورىن العان قۇرامالار اتالعان تۋرنيردىڭ فينالدىق كەزەڭىنە تىكەلەي جولداما الادى. ۇزدىك ۇشتىككە ىلىككەندەر قوسىمشا كەزەڭدە سىنعا ءتۇسىپ، جولدامالاردى ساراپقا سالادى.
اۆتور: ءادىلجان ۇمبەت