مەمورگاندار زاڭ نورمالارىن حالىققا قاراپايىم تىلمەن تۇسىندىرەتىن بولادى

None
None
نۇر-سۇلتان. قازاقپارات - الداعى ۋاقىتتا مەملەكەتتىك ورگاندار قابىلدانعان زاڭ نورمالارىن حالىققا قاراپايىم تىلمەن تۇسىندىرەتىن بولادى.

بۇل تۋرالى ق ر ادىلەت ءمينيسترى مارات بەكەتايەۆ ايتتى، دەپ حابارلايدى قازاقپارات ءتىلشىسى.

ايتا كەتەرلىگى، بۇگىن سەناتتىڭ جالپى وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە نورماشىعارماشىلىقتى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قابىلدانعان بولاتىن.

وسى قۇجاتتى تالقىلاۋ بارىسىندا سەناتور دانا نۇرجىگىت زاڭدى ازىرلەۋشىلەر ءبىر ماسەلەگە نازار اۋدارۋى قاجەتتىگىن ايتتى.

«ءبىز شىن مانىندە حالىق ۇنىنەن قۇلاق اساتىن مەملەكەت قۇرامىز دەسەك، مىنا ءبىر ماسەلەگە نازار اۋدارۋىمىز قاجەت. وڭىرلەرگە ءىس- ساپار بارىسىندا بايقاعانىم، حالىق قابىلدانىپ جاتقان زاڭداردان كوپ جاعدايدا بەيحابار. ياعني، پارلامەنتتە قابىلدانعان زاڭ وڭىرلەرگە، حالىققا جەتكىزىلمەيدى. كەزدەسۋدە ازاماتتارىمىزدىڭ كوبىسىنىڭ سۇراعى الىپ-قاشپا اڭگىمەلەرگە نەگىزدەلگەن. سول سەبەپتى حالىققا زاڭدى اشىق، قاراپايىم تۇردە تۇسىندىرە الۋ جانە ونى بارىنشا تاراتۋ ماسەلەسىن كۇشەيتۋ قاجەت. مىنە، وسىنىڭ سالدارىنان الەۋمەتتىك جەلىدەگى بلوگەرلەر، تاۋەلسىز ساراپشىلار زاڭدى ءوز پايىم، تۇسىنىگى شەڭبەرىندە تالداپ، تالقىلاپ جاتادى. ال ءتيىستى مەملەكەتتىك ورگاننىڭ تۇسىندىرمەسى كەشىگىپ بارىپ، قوعام قىزۋ تالقىلاعاننان كەيىن عانا رەسمي تۇردە تاراتىلا باستايدى. دەمەك، حالىق پەن بيلىك اراسىنداعى مەدياكوممۋنيكاتسيادا پروبلەما بار»، - دەدى دانا نۇرجىگىت.

وسى ورايدا سەناتور ادىلەت مينيسترىنەن تالقىلانعان قۇجاتتا كوزدەلگەن زاڭ جوباسى مەن قابىلدانعان زاڭدى اقپاراتتىق ءتۇسىندىرۋ باعدارلاماسىنىڭ ورىندالۋىن كىم قاداعالايتىندىعىن جانە ورىندالۋ تەتىكتەرىن ءتۇسىندىرۋدى سۇراعان ەدى.

«زاڭدى ءتۇسىندىرۋ جانە اقپاراتتىق سۇيەمەلدەۋ باعدارلاماسىنىڭ ورىندالۋىن ادىلەت مينيسترلىگى مەن اقپارات جانە قوعامدىق دامۋ مينيسترلىگى قاداعالايدى. مۇنداي باعدارلاما زاڭ جوباسىنىڭ نورمالارىن ازاماتتارعا تۇسىندىرۋگە باعىتتالعان ءىس-شارالاردى كوزدەيدى. بۇل ءىس-شارالار جاڭا قۇقىقتار مەن مىندەتتەردى حالىققا تۇسىنىكتى تىلدە جەتكىزۋدى قامتاماسىز ەتەدى. مىسالى، زاڭ جوبالار ازىرلەنگەن كەزدە ازىرلەۋشى ورگاندار اشىق قوعامدىق تالقىلاۋلار وتكىزەدى. ب ا ق- قا بريفينگ ۇيىمداستىرادى. ال زاڭ قابىلدانعاننان كەيىن ازىرلەۋشى ورگاندار تاجىريبەلىك نۇسقاۋلار بەرىپ، ارناۋلى بەينەروليكتەر جاسايدى جانە ينتەرنەتكە ورنالاستىرادى. باسقا دا تاسىلدەردى قولداۋى مۇمكىن»، - دەپ جاۋاپ بەردى مينيستر.

سوڭعى جاڭالىقتار