دەپۋتات مال ۇرلىعىنا قاتىستى كىمدەردىڭ جاۋاپكەرشىلىگىن ارتتىرۋ كەرەكتىگىن ايتتى

نۇر-سۇلتان. قازاقپارات - ءماجىلىستىڭ جالپى وتىرىسىندا دەپۋتات عازيز قۇلاحمەتوۆ شىعىس قازاقستان وبلىسى شارۋالارى شىعىنعا باتىپ جاتقانىن، ولاردىڭ مالى ءجيى ۇرلاناناتىنىن ايتتى، دەپ حابارلايدى قازاقپارات ءتىلشىسى.

ق ح پ فراكسياسىنىڭ دەپۋتاتتىق ساۋالىندا مال ۇرلاۋ، ءشوپ ورتەۋ سياقتى قىلمىستاردىڭ ءبىرقاتار فاكتىسى كورسەتىلگەن.

«مال يەلەرى كۇدىكتىلەردى پوليتسياعا كورسەتكەن كۇننىڭ وزىندە بۇدان ەشقانداي ناتيجە شىقپايتىنىن ايتىپ، دابىل قاعىپ وتىر»، - دەدى دەپۋتات ۇكىمەت باسشىسىنىڭ اتىنا جولداعان ساۋالىندا.

ونىڭ ايتۋىنشا، وبلىستىق پوليتسيا دەپارتامەنتىنىڭ دەرەگىنە قاراعاندا، وڭىردە مال ۇرلىعى 2019 -جىلمەن سالىستىرعاندا 12 پايىزعا تومەندەگەن، ال ءىرى قارا مال باسىنىڭ ءبىر بولىگى زارداپ شەككەندەرگە قايتارىلعان.

الايدا جەرگىلىكتى تۇرعىنداردىڭ پىكىرىنشە، بۇل باعىتتاعى جۇمىس وتە ناشار جۇرگىزىلۋدە. دەپۋتات مال ۇرلاۋ سياقتى ماسەلەلەر فەرمەرلەردىڭ دامۋىنا، اتاپ ايتقاندا، ەلدىڭ ازىق- تۇلىك قاۋىپسىزدىگىن قامتاماسىز ەتۋگە ايتارلىقتاي زيان كەلتىرەتىنىنە توقتالعان.

«تاعى ءبىر ماسەلەنى اتاپ وتكەن ءجون. كاتونقاراعاي اۋدانىندا ەكى ۆەتەرينارلىق زەرتحانا جابىلعاننان بەرى ەكى جىلدان استام ۋاقىت ءوتتى. سالدارىنان اۋدان تۇرعىندارى مال جانە ارا شارۋاشىلىعى ونىمدەرىن زەرتحانالىق ساراپتاماسىز ساتىپ وتىر. نەگىزىنەن مۇنداي ونىمدەردى مەكتەپتەرگە، بالاباقشالارعا، اسحانالارعا، كافەلەرگە، مەيرامحانالارعا تىكەلەي جەتكىزەدى. ال ساراپتاما جۇرگىزۋ جانە ءونىمنىڭ تازالىعىن راستايتىن انىقتاما الۋ ءۇشىن 200 شاقىرىم جەردەگى كورشى اۋدانعا بارىپ-كەلۋدىڭ ءوز قيىندىعى بار»، - دەدى عازيز قۇلاحمەتوۆ.

سونداي-اق دەپۋتاتتىق ساۋالدا مال ۇرلىعى ورىن العان اۋىلدار مەن اۋداندارداعى پوليتسيا باسشىلارىنىڭ قىزمەتتىك جاۋاپكەرشىلىگىن ارتتىرۋ جايىن قاراستىرۋعا كەڭەس بەرىلگەن. ونىڭ ايتۋىنشا، اكىمدەردىڭ جەرگىلىكتى جەرلەردەگى جۇمىسىنا دا سىن كوزبەن قاراعان ءجون.

سونىمەن قاتار اسىل تۇقىمدى مالدى ۇرلاعانى ءۇشىن جازانى قاتاڭداتۋ ماسەلەنى شەشۋگە كومەكتەسەدى دەگەن بولجام بار.

اۆتور: رۋسلان عابباسوۆ