باقىتجان ساعىنتايەۆ: پاندەمياعا قاراماستان مەگاپوليس ەكونوميكاسىندا ءوسىم بار
وتكەن جىلعى الەۋمەتتىك-ەكونوميكالىق دامۋ قورىتىندىلارى تۋرالى دەرەكتى فيلمدە ايتىلعان مالىمەتتەرگە سايكەس، ك ۆ ي بويىنشا سانيتارلىق-ەپيدەميولوگيالىق جاعدايدىڭ تۇراقتانۋى الماتى ەكونوميكاسىنىڭ بازالىق سالالارىندا ءوسۋدى قامتاماسىز ەتۋگە مۇمكىندىك بەردى.
مىسالى، ونەركاسىپتىڭ %4,6 ءوسۋى قامتاماسىز ەتىلدى، قۇرىلىس جۇمىستارىنىڭ كولەمى %10,6 ۇلعايدى، تۇرعىن ءۇيدى پايدالانۋعا بەرۋ- %14,2، بايلانىس قىزمەتتەرىنىڭ كولەمى %8,2 ءوستى.
«ءبىز تەرىس (كەرى) سەناريدى ىسكە اسىرۋعا جول بەرمەدىك جانە ءىس جۇزىندە بارلىق ەكونوميكالىق كورسەتكىشتەردى ارتتىردىق. ساۋداداعى، تاسىمالداۋداعى جانە قويمالاردا ساقتاۋداعى قۇلدىراۋدىڭ ەكونوميكانىڭ باسقا سالالارىنداعى وسىممەن وتەلۋىنە قول جەتكىزدىك. سونىمەن قاتار، ءبىز جاڭا پەرسپەكتيۆالى سەكتورلاردى - سيفرلاندىرۋ مەن سمارت يندۋستريانى، كرەاتيۆتى ەكونوميكا مەن ءتۋريزمدى دامىتۋعا سەرپىن بەرە الدىق»، - دەدى باقىتجان ساعىنتايەۆ.
بىلتىر الماتىدا 2,4 ميلليون شارشى مەتردەن استام تۇرعىن ءۇي پايدالانۋعا بەرىلدى. نەگىزگى كاپيتالعا سالىنعان ينۆەستيتسيالار كولەمى ناقتى كولەمنىڭ %17,2 وسۋىمەن 971,2 ميلليارد تەڭگەگە جەتتى. 76,3 مىڭ جاڭا جۇمىس ورنى قۇرىلدى، ونىڭ ىشىندە مەملەكەتتىك باعدارلامالار بويىنشا - 46,3 مىڭ. بيىل 50 مىڭعا جۋىق جۇمىس ورنىن قۇرۋ جوسپاردا. الەۋمەتتىك قولداۋعا ەرەكشە كوڭىل بولىنبەك. 28 مىڭعا جۋىق مۇمكىندىگى شەكتەۋلى ادام وڭالتۋمەن جانە الەۋمەتتىك قىزمەتتەرمەن قامتاماسىز ەتىلەدى.