قازاقستاندىقتار ءسابيدى تەرەزەدەن قۇلاپ كەتۋدەن قورعايتىن قۇرىلعى ويلاپ تاپتى

اقتوبە. قازاقپارات - اقتوبەدەگى نازاربايەۆ زياتكەرلىك مەكتەبىنىڭ وقۋشىلارى ءسابي ءومىرىن ساقتاپ قالاتىن اقىلدى تەرەزە ويلاپ تاپتى.

ونەرتاپقىشتار اۆتورلىق قۇقىقتى يەلەندى، دەپ حابارلايدى قازاقپارات ءتىلشىسى.

نازاربايەۆ زياتكەرلىك مەكتەبىنىڭ 11-سىنىپ وقۋشىلارى ايكەن التاي مەن ايدانا كەنجەبايەۆا «Savvywindow» اۆتوماتتاندىرىلعان تەرەزە جوباسىن ءساتتى اياقتاپ، جاڭا تۋىندىنىڭ اۆتورلىق قۇقىعىن يەلەندى. ولار كوپقاباتتى تۇرعىن ءۇيدىڭ جوعارى قاباتىنداعى قاۋىپسىزدىكتى قامتاماسىز ەتۋ ءۇشىن ارنايى قۇرىلعى قوندىرعان.

«تەرەزەنى اشۋ ءۇشىن ارنايى قۇپيا سان سۇرالادى. اشقان سوڭ سيگنال قايتا ءتۇسىپ، تەرەزەنى لەزدە جابۋعا مۇمكىندىك بار. ياعني، 90 سانتيمەتر اۋماقتا دىبىس سەزىلسە، كۇرت قۇلىپتالادى. مۇنداي تەرەزە بالالى وتباسىلار ءۇشىن ءتيىمدى»، - دەدى جوبا اۆتورىنىڭ ءبىرى ايكەن التاي.

جوبانى ىسكە اسىرۋعا مەكتەپتىڭ ينفورماتيكا جانە فيزيكا پاندەرىنىڭ مۇعالىمى كومەكتەستى.

جەتەكشىلەرى «اقىلدى تەرەزەنى» تەك پاتەرگە ەمەس، مەكتەپ، بالاباقشاعا قوندىرۋعا كەڭەس بەرەدى.

«جاز ايى باستالعاندا بالالاردىڭ تەرەزەدەن قۇلاپ كەتۋ دەرەگى تىركەلەدى. ءبىر جىلدان استام ۋاقىت بۇرىن يدەيانى ىسكە اسىرۋ جولىن ىزدەدىك. ال «اقىلدى تەرەزەنى» ءبىر ايدا جاساپ، ىسكە قوستىق. ءدال وسى جوبا ەلىمىزدە جوق. وقۋشىلار اۆتورلىق قۇقىقتى يەلەندى»، - دەدى نازاربايەۆ زياتكەرلىك مەكتەبىنىڭ مۇعالىمى اقزات قاۋىسوۆا.

ايتا كەتەيىك، اقتوبەدە 2018-جىلى 1 بالا تەرەزەدەن قۇلاپ، كوز جۇمسا، 2019-جىلى 2 ءسابي جاراقاتتانىپ، بىرەۋى مەرت بولعان. بىلتىر 2 بالا دەنە جاراقات الىپ، ەكەۋى كوز جۇمدى.