نۇر-سۇلتاندا قانداي مەديتسينالىق قىزمەت تۇرلەرى سۇرانىسقا يە؟

نۇر-سۇلتان. قازاقپارات - م ءا م س جۇيەسى اياسىندا استانالىقتار كوبىنەسە قانداي مەديتسينالىق قىزمەتكە جۇگىنەتىنى انىقتالدى، دەپ حابارلايدى قازاقپارات ءتىلشىسى.

«م ءا م س (مىندەتتى الەۋمەتتىك مەديتسينالىق ساقتاندىرۋ) جۇيەسى ەنگىزىلگەلى ەلوردا تۇرعىندارى اراسىندا ك ت، م ر ت، جوعارى تەحنولوگيالىق مەديتسينالىق قىزمەتتەر، كونسۋلتاتسيالىق-دياگنوستيكالىق، گورموندار، دارۋمەندەر كورسەتكىشتەرىن انىقتايتىن زەرتحانالىق تەكسەرۋلەر جانە وڭالتۋ قىزمەتتەرى جوعارى سۇرانىسقا يە. سونداي-اق، بۇرىن ۆاريكوز، ۋلترادىبىستىق ابلاتسيا، ينەكتسيالىق سكلەروتەراپيا جانە جۇرەك-قان تامىرى اۋرۋلارىن انىقتايتىن كوروناراگرافيالىق زەرتتەۋلەر اقىلى بولاتىن. بۇگىندە پاتسيەنتتەر م ءا م س جۇيەسى ارقىلى اتالعان مەديتسينالىق قىزمەتتەردى تەگىن الا الادى»، - دەدى مەديتسينالىق ساقتاندىرۋ قورى نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.

ودان بولەك، فيليال باسشىسى ەلوردادا مەديتسينالىق قىزمەتتەردىڭ قولجەتىمدىلىگى تۋرالى ايتتى.

«قوردىڭ باستى مىندەتتەرىنىڭ ءبىرى ازاماتتاردى ساپالى مەديتسينالىق قىزمەتپەن قامتاماسىز ەتۋ. وسى ورايدا مەديتسينا ۇيىمدارى كورسەتەتىن قىزمەتتەردىڭ ورىندالۋ ساپاسىنا ساراپتاما جاسالادى. ول تۋرالى مەديتسينا مەكەمەسىمەن جاسالعان كەلىسىمشارتتا كورسەتىلگەن. ەگەر مەكەمەنىڭ مەديتسينالىق جابدىقتارمەن قامتاماسىز ەتىلۋ دەڭگەيى تومەن نەمەسە كادر جەتىسپەۋشىلىگى انىقتالسا، وندا دەنساۋلىق ساقتاۋ باسقارمالارىنا اقپارات جولدانادى. سونىڭ نەگىزىندە، جەتىسپەيتىن قۇرال-جابدىقتار ساتىپ الىنىپ، قاجەتتى ماماندار تارتىلادى. سوندىقتان دا ازاماتتار ءۇشىن قولجەتىمدى جانە ساپالى مەديتسينالىق قىزمەت كورسەتۋ ماسەلەسى ءاردايىم باستى نازاردا»، - دەيدى ول.

بۇعان دەيىن ەلوردادا م ءا م س اياسىندا 100 دەن استام مەديتسينالىق مەكەمە قىزمەت كورسەتەتىنى تۋرالى حابارلاعان بولاتىنبىز.