قاراعاندىدا حالىق ءارتىسى مەرۋەرت وتەكەشوۆانىڭ مەرەيتويىنا ارنالعان كورمە اشىلدى

قاراعاندى. قازاقپارات - ن. ۆ. گوگول اتىنداعى قاراعاندى وبلىستىق امبەباپ عىلىمي كىتاپحاناسىندا تانىمال قازاقستاندىق جانە كەڭەستىك تەاتر جانە كينو اكتريساسى مەرۋەرت وتەكەشوۆاعا ارنالعان كورمە وتۋدە.

ول قازاقستاندىق كينونىڭ جاۋھارى دەپ تانىلعان «قىز جىبەك» كينوەپوپەياسىمەن تانىمال بولدى، دەپ حابارلايدى قازاقپارات ءتىلشىسى.

جۇبايى قۇمان تاستانبەكوۆپەن بىرگە مەرۋەرت وتەكەشوۆا «شوقان ءۋاليحانوۆ»، «ايداھار جىلى»، «پروۆينتسيالىق رومان» فيلمدەرىندە تۇسكەن. ەكسپوزيتسيانى ونەر ادەبيەتى ءبولىمى ۇيىمداستىردى. كورمە 25- اقپاندا اياقتالادى. بۇل كۇن كەزدەيسوق تاڭدالعان جوق. ءدال سول كۇنى اكتريسا 70 جاسقا تولادى.

«قىز جىبەك» فيلمى تۋرالى كىتاپتار وقىرماندار اراسىندا ۇلكەن سۇرانىسقا يە. ولاردىڭ نەگىزىندە رەفەراتتار جازادى، بەينە پرەزەنتاتسيالار جاسايدى. اكتريسا مەرۋەرت وتەكەشوۆانىڭ داڭقى جىلدار وتە كەلە اسقاقتاي تۇسۋدە. ءبىز وتكەن جىلى وسىنداي كورمە وتكىزۋدى جوسپارلاعان بولاتىنبىز»، - دەيدى ونەر ادەبيەتى ءبولىمىنىڭ باسشىسى بالجان وسپانقۇلوۆا.

ونىڭ ايتۋىنشا، مەرۋەرت وتەكەشوۆا قاراعاندى ونىڭ سۇيىكتى قالالارىنىڭ ءبىرى ەكەنىن بىرنەشە رەت ايتقان. بالجان وسپانقۇلوۆانىڭ جەكە مۇراعاتىندا اكتريسامەن بايلانىستى سيرەك كەزدەسەتىن فوتوسۋرەت ساقتالعان. 70-جىلداردىڭ ورتاسىندا تۇسىرىلگەن سۋرەتتە كەنت تاۋلارىنىڭ فونىندا اكتەر ۋايس سۇلتانعازين، كىتاپحانا قىزمەتكەرىنىڭ اكەسى مەن اعاسى جانە مەرۋەرت وتەكەشوۆا بەينەلەنگەن.

«سول كەزدەرى اتاقتى اكتەرلەر ءجيى شالعايداعى ەلدى مەكەندەردى ارالايتىن. ءبىزدىڭ سوۆحوز بولعان كەزدە مەن كىشكەنتاي ەدىم. فرۋنزە (قازىر بۇل اۋىل «امانجولوۆ» اتىنداعى) اتىنداعى اۋىلعا م. اۋەزوۆ اتىنداعى قازاق اكادەميالىق دراما تەاترىنىڭ ترۋپپاسى كەلدى.

«قوزى كورپەش-بايان سۇلۋ» پەساسىمەن كەلگەنى ەسىمدە. جاقىن ماڭداعى سوۆحوزداردان دا كوپتەگەن ادامدار جينالدى»، - دەپ ەسكە الادى بالجان وسپانقۇلوۆا.

وسى سۋرەتتەن باسقا، كورمەدە مۇحتار وتەبايەۆتىڭ دومبىراسىندا ورىندالعان جانە فاريدا ءشارىپوۆانىڭ وقىعان ولەڭدەرى جازىلعان ۆينيلدى پلاستينكا، «قازاقستان كينوسىنىڭ انتولوگياسى» CD- ديسكىسى ۇسىنىلدى.

«قىز جىبەك» ەپوسىنىڭ باسىلىمدارى، عابيت مۇسىرەپوۆ پەن گۇلفايرۋس يسمايلوۆانىڭ ەڭبەكتەرى كوپتەگەن كىتاپتار مەن جۋرنالداردى قامتيدى. ونىڭ ىشىندە سيرەك كىتاپتار اراسىندا «قازاقستان كينوسى» دا بار.

باسىلىم 2003-جىلى ش. ايمانوۆ اتىنداعى «قازاق فيلمنىڭ» تاپسىرىسىمەن جارىق كوردى. كىتاپحانا قىزمەتكەرلەرى مەرۋەرت وتەكەشوۆامەن ونىڭ قاتىسۋىمەن تىكەلەي ەفير وتكىزۋ جونىندە كەلىسسوزدەر جۇرگىزۋدە. ناقتى كۇنى تۋرالى كەيىنىرەك الەۋمەتتىك جەلىلەردە حابارلانادى.