مەركىدە ليمون وسىرۋمەن اينالىساتىن تۇرعىن ءوزىنىڭ تاجىريبەسىمەن ءبولىستى

مەركى. قازاقپارات - جامبىل وبلىسى مەركى اۋدانىندا جەرگىلىكتى تۇرعىن ليمون وسىرۋمەن اينالىسۋدا، دەپ حابارلايدى قازاقپارات ءتىلشىسى.

جالپى، مەركى اۋدانىندا ءتۇرلى داقىلدار وسىرەتىن 42 جىلىجاي جىل ون ەكى اي جۇمىس ىستەۋدە. ءبىرى قىزاناق، ءبىرى قيار، تىپتەن قۇلپىناي ءوسىرۋدى دە جەتىك مەڭگەرىپ العان.

ال اقتوعان اۋىلىنىڭ تۇرعىنى دانيار ءابدىرازاق جىلىجايدا قازاقستاندىقتارعا بەيتانىس ليمون وسىرۋگە بەل بۋعان. جاس كاسىپكەر 2018-جىلى جىلىجاي سالىپ، وندا قيار وسىرۋمەن اينالىسقان.

كەيىننەن كاسىبىنەن مول تابىس تابۋدى كوزدەپ، ەرەكشە داقىلدى ءوسىرۋدى ويلاستىرادى.

وسىلايشا ليمون ءوسىرۋدى قولعا الا باستايدى. قيار ءوسىرىپ وتىرعان جىلىجايىندا قيار اراسىنا 25 ءتۇپ ليمون كوشەتىن ەگىپ، ونى كۇتىپ، باپتاۋ ادىستەرىن مەڭگەرە باستايدى.

قازىردىڭ وزىندە ليموننان ءونىم الىپ، الداعى ۋاقىتتا بۇكىل ايماقتى ءوز ونىمدەرىمەن قامتاماسىز ەتۋدى جوسپارلاۋدا. جىلىجايدا ليمون ءوسىرۋ يدەياسى دانيارعا وڭتۇستىك كورەيادا تاجىريبەدەن وتكەننەن كەيىن كەلدى. ءدال سول جەردە ول جىلىجايدا ليمون ءوسىرۋ قيىن ەمەس ەكەنىن العاش رەت كوردى.

«شىعىندار مەن كىرىستەر اراسىنداعى ايىرماشىلىقتى ويلاي وتىرىپ، مەن ونىڭ پايدالى ەكەنىن ءتۇسىندىم. ءبىزدىڭ ايماقتاعى اۋا رايى كورەياداعى جاعدايعا وتە ۇقساس. جالعىز ايىرماشىلىق - وندا جەر ىلعالدىلىعى جوعارى. ءبىراق بىزدە جەر قۇنارلى. مەنىڭ مالىم بولعاندىقتان، ارنايى تىڭايتقىشتار قاجەت ەمەس. كوڭ مەن قاراشىرىك وسىمدىكتەردى قورەكتەندىرۋ ءۇشىن قولايلى. ازىرگە 25 كوشەت وتىرعىزدىم. ولار تاشكەنتتەن اكەلىندى. كوشەت قۇنى ءتورت جارىم مىڭ تەڭگە. مەن كاسىپكەرلەرلىك باسقارماسى ارقىلى يننوۆاتسيالىق جوبا رەتىندە ليمون ءوسىرۋ جوباسىن قورعاپ، 2 جارىم ميلليون قايتارىمسىز گرانت جەڭىپ الدىم. وسىلايشا قاجەتتىلىكتەردىڭ بارلىعىن جاساپ الدىم. ليمون بىرنەشە جىلدان كەيىن عانا تولىق جەمىس بەرە باستايدى. 2019-جىلى ءبىر اعاشتان بەس- التى ليمون الدىم. ازىرگە كوشەتتەردى باپتاۋ كەرەك. بىرنەشە جىلدان كەيىن اعاشتار تولىق جەمىس بەرە باستايدى. سول كەزدە ءار تال 50-60 كەلى ءونىم بەرەدى»، - دەيدى دانيار ءابدىرازاق.

كاسىپكەر ليمون اعاشتارىنىڭ اراسىندا قيار ءوسىرىپ وتىر. ول جىلىجايدى ۇستاۋعا جۇمسالاتىن شىعىنداردىڭ كوپ بولىگىن وتەۋگە مۇمكىندىك بەرەدى. قياردى ساتىپ جىلىجايدى جىلىتۋ ءۇشىن العان كومىر، جارىققا كەتىپ جاتقان شىعىندار جاۋىپ وتىر. دانياردان ۇلگى العان اۋدانداعى ءتورت شارۋا جىلىجاي قۇرىلىسىن جۇرگىزىپ، مەملەكەتتىك قولداۋلاردى ءتيىمدى پايدالانىپ، ءارقايسىسى ءجۇز ليمون كوشەتىن وتىرعىزىپ قويعان.