ەكى كلينيكالىق زەرتتەۋ قورىتىندىسى قازاقستاندىق ۆاكسينانىڭ قاۋىپسىز ەكەنىن كورسەتتى - ق ر د س م
بۇل تۋرالى ق ر دەنساۋلىق ساقتاۋ مينيسترلىگىنەن ءمالىم ەتتى، دەپ حابارلايدى قازاقپارات.
قازىرگى كەزدە ق ر ب ع م عىلىم كوميتەتىنىڭ بيولوگيالىق قاۋىپسىزدىك ماسەلەلەرى ۇلتتىق عىلىمي- زەرتتەۋ ينستيتۋتىنىڭ عالىمدارى شىعارعان COVID-19 ۆيرۋسىنا قارسى يناكتيۆتەلگەن QazCovid-in ۆاكسيناسى كلينيكالىق زەرتتەۋدىڭ Ⅲ فازاسىنا كىرىپ وتىر. زەرتتەۋگە ءۇش مىڭ ادام قاتىسۋدا.
QazCovid-in يناكتيۆتەلگەن ۆاكسينانىڭ نەگىزىنە يناكتيۆتەلگەن ۆيرۋس جانە زيانسىز اديۋۆانت سالىنعان. سوندىقتان پرەپارات ۆاكسينالىق پرەپاراتتاردىڭ وزگە تيپتەرىمەن سالىستىرعاندا كەپىلدى تۇردە قاۋىپسىز بولىپ تابىلادى.
QazCovid-in ۆاكسيناسى جانۋارلارعا (اق تىشقان، ەگەۋقۇيرىق، سيريالىق الاقورجىن، قويان، كۇزەن جانە مايمىل) كلينيكاعا دەيىنگى زەرتتەۋدەن وتكەن. كلينيكالىق زەرتتەۋدىڭ ءبىرىنشى فازاسى 18-50 جاس ارالىعىنداعى 44 ەرىكتىگە جۇرگىزىلگەن، ال زەرتتەۋدىڭ ەكىنشى فازاسىنان 18 جانە ودان ەرەسەك جاستاعى 200 ەرىكتى ءوتتى.
«كلينيكالىق زەرتتەۋدىڭ I/II فازالارىنىڭ ارالىق ەسەپتەرىنىڭ قورىتىندىسى COVID-19 ۆيرۋسىنا قارسى وتاندىق QazCovid-in ۆاكسيناسىنىڭ قاۋىپسىزدىگى مەن يممۋندىلىعىن كورسەتتى. QazCovid-In وتاندىق ۆاكسيناسى بويىنشا كلينيكالىق زەرتتەۋدىڭ 1 جانە Ⅱ فازالارىنىڭ ارالىق ەسەبى الىندى، ونىڭ قورىتىندىسىنا سايكەس بۇلشىقەت ىشىنە ءبىر جانە ەكى رەت ەنگىزۋ كەزىندە جاقسى توزە الۋشىلىق پەن قاۋىپسىزدىك اتاپ وتىلگەن. ۆاكسينانىڭ SARS- CoV-2 ۆيرۋسىنا قاتىستى جوعارى يممۋنوگەندى بەلسەندىلىگى انىقتالعان»، - دەپ اتاپ ءوتتى ق ر دەنساۋلىق ساقتاۋ مينيسترلىگىنەن.
بۇگىندە كلينيكالىق زەرتتەۋدىڭ Ⅲ فازاسى جۇرگىزىلۋدە، وعان ءتۇرلى جاستاعى 3 مىڭ ەرىكتى قاتىسۋدا. كلينيكالىق زەرتتەۋلەر الماتى جانە تاراز قالالارىنىڭ كلينيكالىق بازالارىندا وتكىزىلىپ جاتىر. ق ر ب ع م «بيولوگيالىق قاۋىپسىزدىك پروبلەمالارىنىڭ عىلىمي- زەرتتەۋ ينستيتۋتى» ر م ك QazCovid-In ۆاكسيناسىنا 2020 -جىلدىڭ 15 - جەلتوقساننان باستاپ ۋاقىتشا تىركەۋ كۋالىگىن بەردى. ونەركاسىپ سەريالارىنىڭ ءوندىرىسى اعىمداعى جىلدىڭ ءساۋىر ايىنىڭ سوڭىنا جوسپارلاندى.
اۆتور: زارينا تۋعانبايەۆا