جامبىلدىق ديقاندار كوكتەمگى دالا جۇمىستارىن باستاپ كەتتى

تاراز. قازاقپارات - جامبىل وبلىسىمەن ىرگەلەس جاتقان جامبىل اۋدانىنىڭ ەڭبەككەرلەرى كوكتەمگى دالا جۇمىستارىن باستاپ كەتتى.

ديحاندار قازىر جەر جىرتىپ، ەگىس القاپتارىن ازىرلەۋدە، دەپ حابارلايدى قازاقپارات ءتىلشىسى.

جامبىل اۋدانىندا اعىمداعى جىلى 13000 گەكتارعا جازدىق ارپا سەبۋ جوسپارلانعان. ول ءۇشىن 2080 توننا تۇقىم دايىندالىپتى. قازىر شارۋاشىلىقتار اۋا رايىنىڭ قولايلىلىعىن پايدالانىپ كوكتەمگى دالا جۇمىستارىن باستاپ ۇلگەرگەن.

«قازىر الدىمىزدا كوكتەمگى ەگىس جۇمىستارىن ساپالى جانە دەر كەزىندە وتكىزۋ مىندەتى تۇر. اۋداندا ۇستىمىزدەگى جىلى اۋىل شارۋاشىلىعى داقىلدارىنىڭ ەگىس كولەمى 57371 گەكتاردى قۇرايدى دەپ جوسپارلانۋدا. بۇل وتكەن جىلعى ەگىس كولەمىمەن سالىستىرعاندا 568 گەكتارعا ارتىق. وسى ورايدا جازدىق ارپا، كوكونىس-باقشا جانە مال ازىعى داقىلدارىنىڭ ەگىس كولەمدەرى ۇلعايتىلادى. جازدىق داقىلداردى ورنالاستىرۋ ءۇشىن اۋدان بويىنشا 28460 گەكتار سۇدىگەر كوتەرىلدى»، - دەيدى اۋداندىق اۋىل شارۋاشىلىعى ءبولىمىنىڭ باسشىسى قانات تەمەشبايەۆ.

كوكتەمگى دالا جۇمىستارىن باستاعانداردىڭ ءبىرى - اقباستاۋ اۋىلدىق وكرۋگى اۋماعىندا ورنالاسقان «شاريپوۆ» شارۋا قوجالىعى.

«اۋا رايى دا قولايلى بولىپ تۇر. ارپا، بيداي، جۇگەرى ەگەمىز دەپ جوسپارلاعان 100 گەكتار جەرىمىزدى دايىنداپ جاتىرمىز. الدىندا 220 گەكتار جەردى قىزىلشاعا دايىندادىق. وتكەن جىلى 100 گەكتار ەككەنبىز. جاقسى ءونىم الدىق. بيىل قىزىلشا ەگەتىن جەردىڭ كولەمىن ۇلعايتتىق»، - دەيدى اگرونوم فارۋح يۋنۋسوۆ.

قازىر ەگىس القابىندا 5 تراكتور جەر جىرتۋ ۇستىندە. شارۋاشىلىق سۋ تاپشىلىعىن بولدىرماۋ ماقساتىندا بىلتىر تامشىلاتىپ سۋارۋ ءادىسىن قولدانعان.

ايتا كەتۋ كەرەك، شارۋا قوجالىقتارىندا كوكتەمگى دالا جۇمىستارىن اتقاراتىن تەحنيكالاردى جوندەۋ اياقتالعان. بيىل اۋدان كولەمىندە پايدالانىلاتىن تراكتورلار سانى 389 دانا بولسا، ونىڭ 364 ءى جوندەلىپ، كوكتەمگى دالا جۇمىستارىنا ساقاداي ساي.