ۆاكسينا العانىما ءبىر اپتا بولدى، كوڭىل-كۇيىم جاقسى - مەديتسينا مامانى

كوكشەتاۋ. قازاقپارات - ۆاكسينا العان ءبىر اپتانىڭ ىشىندە كوڭىل- كۇيىمە كەرى اسەرىن تيگىزەتىن جاعداي بولعان جوق.

بۇل تۋرالى كوكشەتاۋ قالاسىنداعى باستاپقى مەديتسينالىق- سانيتارلىق كومەك كورسەتۋ ورتالىعىنىڭ اۋماقتىق ءبولىم مەڭگەرۋشىسى ماقپال ايتبايەۆا ايتتى، دەپ حابارلايدى قازاقپارات ءتىلشىسى

دارىگەردىڭ ايتۋىنشا، ءوزى جۇمىس ىستەيتىن ەمحانادا ۆاكسينالاۋ ناۋقانى اقپاننىڭ 2 سىندە باستالدى.

ونىڭ ىشىندە العاشقى لەگتە 2 مەدبيكە مەن 3 دارىگەر، بارلىعى 5 ادام ەكپە الدى. بارلىعىندا اسقىنۋ مەن اۋىتقۋ بەلگىلەرى بايقالعان جوق. كەلەسى قاتاردا تاعى 6 قىزمەتكەر مەن 4 وقىتۋشىعا ۆاكسينا سالىندى. بۇدان بولەك، تاعى 15 قىزمەتكەرگە ۆاكسينا سالۋ جوسپارلانىپ وتىر.

«ۆاكسينا سالعىزعان ادامنىڭ ارتەريالدى قىسىمى، باسقا دا ستانيتسيونارلىق وزگەرىستەرى جارتى ساعات بويى باقىلانىپ وتىرادى. سونىمەن بىرگە، ءۇش كۇن بويى اۋىر جۇمىس ىستەمەۋى، الكوگولدىك ىشىمدىك ىشپەۋى جانە ۆاكسينا سالعان جەرگە سۋ تيگىزبەۋى ءتيىس. ءوزىم ۆاكسينا العاننان بەرى ءبىر اپتا بويى دارىگەردىڭ باقىلاۋىندا بولدىم. وسى ۋاقىتتا كوڭىل-كۇيىم جاقسى»، - دەدى ماقپال ايتبايەۆا.

سونىمەن قاتار، ول ۆاكسينادان قورقۋدىڭ قاجەتى جوق ەكەنىن، بۇل ەكپە قازىرگى ەپيدەميولوگيالىق جاعدايدى نازارعا وتىرىپ، ادامداردىڭ كوروناۆيرۋسپەن اۋرۋى مەن ودان بولاتىن ءولىم-ءجىتىم سانىن ازايتۋعا باعىتتالعانىن اتاپ ءوتتى.

«ءبىزدىڭ قازىر الىپ وتىرعان ۆاكسينامىز «گام- كوۆيد- ۆاك» (سپۋتنيك V) ەكى كومپونەنتتەن تۇرادى. اقپاننىڭ 2 دە ءبىز ءبىرىنشى كومپونەنتىن الساق، ەندى 21 كۇننەن كەيىن ەكىنشى كومپونەنتىن الامىز. سوندا ءبىز ۆاكسينالاۋدىڭ تولىق ساتىسىنان وتەمىز. ۆاكسينا ادامداردىڭ كوروناۆيرۋسكە شالدىعۋىنىڭ الدىنا الۋعا جانە ودان بولاتىن ءولىم سانىن ازايتۋعا باعىتتالىپ وتىر»، - دەپ تولىقتىردى ماقپال ايتبايەۆا.

وسى رەتتە، ول ۆاكسينا الۋعا كەلىسىم بەرگەن ادامدار تۋرالى مالىمەتتەر ارنايى بازاعا ەنگىزىلەتىن جەتكىزدى.

«بازادا ول ادامنىڭ ارتەريالدىق قان قىسىمى، جۇرەك قاعىسى، دەنە قىزۋى، وزگە دە قوسىمشا اۋرۋلارى بار- جوعى تۋرالى تولىق مەديتسينالىق مالىمەتتەرى بولادى. ونى جوعارى جاقتاعى باسشىلار كەز كەلگەن ۋاقىتتا قاراپ باقىلاي الادى»، - دەپ تۇيىندەدى كوكشەتاۋ قالاسىنداعى باستاپقى مەديتسينالىق- سانيتارلىق كومەك كورسەتۋ ورتالىعىنىڭ اۋماقتىق ءبولىم مەڭگەرۋشىسى ماقپال ايتبايەۆا.

ايتا كەتەيىك، اقمولا وبلىسىندا ۆاكسينا سالۋ جۇمىسى 24 ەگۋ پۋنكتىندە جۇرگىزىلۋدە. كەيىن قالعان پارتيا تۇسكەن كەزدە قالعان ەگۋ كابينەتتەرى مەن كوشپەلى بريگادالاردى ىسكە قوسۋ جوسپارلانۋدا. 1104 مەديتسينا قىزمەتكەرى جۇمىسقا تارتىلىپ، دايىندالدى. قازىرگى كەزدە، وبلىس بويىنشا 500-دەن استام اقمولالىق كوروناۆيرۋس ينفەكسياسىنا قارسى ۆاكسينا العان.