بەردىبەك ساپاربايەۆ اۋدان اكىمدەرىنە: كابينەتتە وتىرماي، اۋىلعا بارىپ ادامدارمەن كەزدەسىڭىزدەر

تاراز. قازاقپارات - جامبىل وبلىسىنىڭ اكىمى بەردىبەك ساپاربايەۆ كەزەكتى اپپاراتتىق كەڭەستە اۋدان اكىمدەرىنىڭ سالاداعى ينۆەستيتسيا تارتۋ بويىنشا ءالسىز جۇمىستارىن سىنعا الدى، دەپ حابارلايدى قازاقپارات ءتىلشىسى.

اۋىل شارۋاشىلىعى باسقارماسىنىڭ باسشىسى قايرات امانوۆ ىسكە اسىرىلعان جوبالار مەن الداعى جوسپارلار، سونداي-اق اگروسەكتورعا ينۆەستيتسيا سالۋعا كەدەرگى كەلتىرىپ وتىرعان ماسەلەلەر تۋرالى جان-جاقتى باياندادى.

2020-جىلى جامبىل وبلىسىندا اۋىل شارۋاشىلىق سالاسىندا 295 ميلليارد تەڭگە تارتىلىپ، 2019-جىلمەن سالىستىرعاندا ءوسىم 113 پايىزدى قۇرادى جالپى، وڭىردە بىلتىر 18 جوبا ىسكە اسىرىلدى دەسەك، ولاردىڭ بەسەۋى مال شارۋاشىلىعىن دامىتۋعا، التاۋى - ءونىمدى قايتا وڭدەۋگە، تورتەۋى - ينتەنسيۆتى باقتار قۇرۋعا، ۇشەۋى - قۇس شارۋاشىلىعىنا قاتىستى.

قايرات امانوۆتىڭ وڭ بولجامدارىنا قاراماستان، ايماق باسشىسى بەردىبەك ساپاربايەۆ اۋداندار مەن تاراز قالاسىنىڭ اكىمدەرىنە اگروسەكتورعا ينۆەستيتسيا تارتۋعا قاتىستى كوپتەگەن سۇراق جولدادى.

ينۆەستيتسيالار تارتۋ مەن اۋىلشارۋاشىلىق تەحنولوگيالارىنىڭ جاڭا تۇرلەرىن ەنگىزىۋدىن ماڭىزدىلىعىن اتاپ وتكەن وبلىس اكىمى ءاربىر جوبانى مۇقيات زەردەلەۋدى، ونى ىسكە اسىرۋ بارىسىندا ينۆەستوردىڭ قانداي كەدەرگىلەرگە كەز بولىپ جاتقانىن انىقتاۋدى جانە قولداۋ كورسەتۋدى تاپسىردى.

بەردىبەك ساپاربايەۆ بيىل كەم دەگەندە 34 ميلليارد تەڭگە ينۆەستيتسيا تارتۋ كەرەكتىگىن تىلگە تيەك ەتىپ، ءتيىستى تۇلعالارعا تاپسىرما جۇكتەدى.

«اۋىل شارۋاشىلىعى سالاسىندا ينۆەستورلاردى تارتۋعا قاتىستى احۋال اۋىز تولتىرىپ ايتارلىقتاي ەمەس. اگرارلىق ءوڭىر ءۇشىن 29,5 ميلليارد تەڭگە ينۆەستيتسيا وتە از. بىزگە سالا ينۆەستورلارىنا دەگەن جاڭاشا كوزقاراس قاجەت. بۇل باسىم باعىتتاردىڭ ءبىرى بولۋى ءتيىس، ينۆەستورلاردى تارتۋ ءۇشىن بارلىق جاعداي جاسالۋى كەرەك»، - دەدى ءوڭىر باسشىسى.

ول جەكە ينۆەستيتسيالاردى تارتۋ الەۋمەتتىك ماسەلەلەردى دە شەشۋدىڭ ءتيىمدى كوزى ەكەنىن باسا ايتتى.

«كابينەتتە وتىرىپ، وزدەرىڭىزدى ۇلكەن باستىق سەزىنبەي، اۋىلدىق وكرۋگتەرگە بارىڭىزدار، ادامدارمەن كەزدەسىڭىزدەر. ەستەرىڭىزدە بولسىن، ينۆەستيتسيا تارتۋعا ينۆەستورلار ەمەس، ءبىز مۇددەلىمىز»، - دەدى بەردىبەك ساپاربايەۆ اكىمدەرگە.

سونىمەن قاتار، وبلىس اكىمى سۋارۋدىڭ زاماناۋي تەحنولوگيالارىن ەنگىزۋ جانە اۋىل شارۋاشىلىعى تەحنيكالارى پاركىن جاڭارتۋ بويىنشا جۇمىستاردى جالعاستىرۋدى تاپسىردى.