جەڭىس قاسىمبەك تۇرعىن ءۇي كەزەگىنە تەكسەرۋ جۇرگىزۋدى تاپسىردى

قاراعاندى. قازاقپارات - قاراعاندى وبلىسىندا تۇرعىن ءۇي كەزەگى وقتىن-وقتىن تەكسەرىلىپ تۇراتىن بولدى.

ءوڭىر باسشىسى جەڭىس قاسىمبەك تۇگەندەۋ جۇرگىزۋدى تاپسىردى، دەپ حابارلايدى قازاقپارات ءتىلشىسى.

مەملەكەت باسشىسىنىڭ تۇرعىن ءۇيدىڭ قولجەتىمدىلىگىن ارتتىرۋ تۋرالى تاپسىرماسىن ورىنداۋ ونلاين اپپاراتتىق كەڭەستە تالقىلاندى.

«2020-جىلى وبلىس بويىنشا كەزەكتە تۇرعان 1528 ادام پاتەر الدى. ونىڭ ىشىندە كوممۋنالدىق تۇرعىن ءۇي قورىنان - 897، يپوتەكالىق نەسيەلەۋ باعدارلاماسى بويىنشا - 102، «قازاقستاننىڭ تۇرعىن ءۇي قۇرىلىس جيناق بانكى» ا ق جەلىسى بويىنشا نەسيە تۇرعىن ءۇيى - 124، «باقىتتى وتباسى» باعدارلاماسى بويىنشا - 365 جانە دەمەۋشىلەر ەسەبىنەن - 40. وتكەن جىلدان باستاپ «شاڭىراق» پيلوتتىق جوباسى بويىنشا تۇرعىن ءۇي قارىزىن بەرۋ باستالدى، بۇل - «نۇرلى جەر» باعدارلاماسىنىڭ جاڭا باعىتى»، - دەدى ەنەرگەتيكا جانە ت ك ش باسقارماسىنىڭ باسشىسى ۇلانتاي ۇسەنوۆ.

ونىڭ ايتۋىنشا، وبلىستا تۇرعىن ءۇي ماسەلەسىن شەشۋ جەدەلدەتىلدى. بيىل 662 مىڭ شارشى مەتر تۇرعىن ءۇي سالۋ جوسپارلانىپ وتىر - بۇل 2020-جىلعا قاراعاندا 1/4 ەسە كوپ.

«نۇرلى جەر» باعدارلاماسى بويىنشا جالعا بەرىلەتىن جانە نەسيەلىك تۇرعىن ءۇي قۇرىلىسىنا، قايتالاما نارىقتان پاتەر ساتىپ الۋعا قاراجات ءبولىندى. جىل قورىتىندىسى بويىنشا كەزەكتە تۇرعان 2900 ادامعا تۇرعىن ءۇي بەرۋ جوسپارلانۋدا.

«قۇرىلىس جانە تۇرعىن ۇيمەن قامتاماسىز ەتۋ ماسەلەلەرى - وڭىرلەر اكىمدەرى جۇمىسىنىڭ باسىم باعىتى. «نۇرلى جەر»، «باقىتتى وتباسى» باعدارلامالارىنىڭ ۋاقىتىلى ىسكە اسىرىلۋىن قامتاماسىز ەتۋدى تاپسىرامىن. تۇرعىن ۇيگە كەزەكتە تۇرعانداردىڭ تىزىمدەرىنە مەزگىل- مەزگىل تۇگەندەۋ جۇرگىزۋ قاجەت. جاڭا قۇرىلىس اتالمىش يندۋستريانى دامىتۋدى تالاپ ەتەدى. ول ءۇشىن جەرگىلىكتى وندىرۋشىلەرگە قولداۋ كورسەتۋ قاجەت»، - دەپ اتاپ ءوتتى وبلىس اكىمى جەڭىس قاسىمبەك.