ەكى مىڭنان استام بالا قوسىمشا جاردەماقى الادى - ەڭبەك ءمينيسترى
بۇل تۋرالى بۇگىن ماجىلىستە زاڭ جوباسىن تانىستىرۋ بارىسىندا قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ءمالىم ەتتى، دەپ حابارلايدى قازاقپارات ءتىلشىسى.
ايتا كەتەيىك، بۇگىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.
«ءومىر ءسۇرۋ مەن دەنساۋلىقتىڭ قىزمەت ەتۋىنىڭ، شەكتەلۋىنىڭ حالىقارالىق سىنىپتاماسىنا سايكەس 7 جاستان 16 جاسقا دەيىنگى بالالاردى مۇگەدەكتىك توپتارى بويىنشا ءبولۋ كوزدەلەدى. بۇل شارا بالالار سىرقاتىنىڭ اۋىرلىق دارەجەسىنە بايلانىستى جاردەماقى مولشەرىن سارالانعان تۇردە بەلگىلەۋگە مۇمكىندىك بەرەدى. بۇل رەتتە، جاردەماقى مولشەرى 16,7 پايىزدان %37 پايىزعا دەيىن ۇلعايتىلادى. جاڭاشىلدىق 31 مىڭنان استام مۇمكىندىگى شەكتەۋلى بالاعا قاتىستى بولادى»، - دەدى مينيستر. ونىڭ ايتۋىنشا، بۇل نورما بايقوڭىردا تۇراتىن مۇگەدەك بالالارعا بەرىلەتىن ارناۋلى مەملەكەتتىك جاردەماقى مولشەرىنە دە وڭ اسەرىن تيگىزەدى. وسى ورايدا 207 بالا قامتىلادى. بۇدان بولەك مينيستر مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا جاردەماقىلاردى ءبىر مەزگىلدە الۋ قۇقىعىن بەرۋ تەتىگىنە توقتالدى.
«بۇل اسىراۋشىسىنان ايىرىلعان جانە قۇرامىندا مۇگەدەك بالالارى بار وتباسىلاردىڭ تابىس دەڭگەيىن ارتتىرۋعا مۇمكىندىك بەرەدى. اتالعان نورما ەنگىزىلگەن كەزدە 2 مىڭنان استام بالا مۇگەدەكتىگى بويىنشا جاردەماقىمەن قوسا اسىراۋشىسىنان ايىرىلۋ بويىنشا جاردەماقى الاتىن بولادى. قازىرگى ۋاقىتتا ولار تاڭداۋى بويىنشا جاردەماقىنىڭ ءبىر ءتۇرىن عانا الىپ وتىر.