ءبىرىنشى توپتاعى مۇگەدەكتەرگە كۇتىم جاسايتىن ادامدار ءۇشىن جاڭا جاردەماقى ەنگىزىلمەك

نۇر-سۇلتان. قازاقپارات - بۇگىن ماجىلىستە ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى، دەپ حابارلايدى قازاقپارات ءتىلشىسى.

«زاڭ جوباسى مۇگەدەكتەردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندەگى 2025 -جىلعا دەيىنگى ۇلتتىق جوسپاردى ورىنداۋ (ق ر ءۇ ق 28.05.2019 ج. ) اياسىندا ازىرلەنگەن جانە ۇكىمەتتىڭ زاڭ جوبالاۋ جۇمىستارىنىڭ جوسپارىندا كوزدەلگەن. جوبا نەگىزىنە پارلامەنت سەناتىنىڭ جانە ءماجىلىسىنىڭ جۇمىس توبى مۇشەلەرىنىڭ، ۇكىمەت جانىنداعى مۇگەدەكتىگى بار ادامدار ماسەلەلەرى جونىندەگى ۇيلەستىرۋ كەڭەسىنىڭ، سونداي- اق جۇرتشىلىق پەن ساراپتامالىق قوعامداستىقتىڭ ۇسىنىستارى قابىلداندى. 75 زاڭنامالىق اكتىگە، ونىڭ ىشىندە 10 كودەكسكە وزگەرىستەر مەن تولىقتىرۋلار ەنگىزۋ كوزدەلىپ وتىر»، - دەدى مينيستر.

زاڭ جوباسى مىناداي ماقساتتاردا ازىرلەندى:

- بىرككەن ۇلتتار ۇيىمىنىڭ مۇگەدەكتەردىڭ قۇقىقتارى تۋرالى كونۆەنسياسىنىڭ زاڭناماداعى كەمسىتۋشىلىك تەرميندەردى جويۋ جونىندەگى نورمالارىن يمپلەمەنتاتسيالاۋ؛

- مۇمكىندىگى شەكتەۋلى ادامداردى الەۋمەتتىك قورعاۋدى جەتىلدىرۋ؛

- الەۋمەتتىك قىزمەتتەر پورتالى ارقىلى «ينۆاتاكسي» (2023 -جىلدان باستاپ) جانە ارناۋلى الەۋمەتتىك قىزمەتتەردى الۋعا قۇجاتتاردى رەسىمدەۋ، تابىسى از وتباسىلاردى كەپىلدەندىرىلگەن الەۋمەتتىك توپتامامەن قامتاماسىز ەتۋ؛

- جۇمىسقا ورنالاستىرۋدى ىنتالاندىرۋ جانە مۇگەدەكتىگى بار ادامداردىڭ ەكونوميكالىق بەلسەندىلىگى ءۇشىن مۇمكىندىكتەر جاساۋ؛

- ەڭبەك ارداگەرلەرى ساناتتارىن كەڭەيتۋ؛

- بالا ءبىر جاسقا تولعانعا دەيىن ونىڭ كۇتىمىنە بايلانىستى تابىسىنان ايىرىلعان، ەڭبەك قىزمەتى قايتا باستالعان جاعدايدا تولەنەتىن الەۋمەتتىك تولەمنىڭ كەپىلدىك بەرىلگەن دەڭگەيىن بەلگىلەۋ.

«وسى نورمالار «Nur Otan» پارتياسىمەن قولداۋ تاپقانىن جانە سايلاۋالدى تۇعىرنامادا قامتىلعانىن اتاپ ءوتۋ كەرەك»، - دەدى سەرىك شاپكەنوۆ. وسى ورايدا ول تۇجىرىمدامالىق جاڭالىقتارعا توقتالدى.

«بىرىنشىدەن، مۇگەدەكتىكتىڭ سەبەبىنە قاراماستان 1-توپتاعى مۇگەدەكتىگى بار ادامدارعا كۇتىم جاسايتىن ادامدارعا جاردەماقى ەنگىزۋ. وسى جاردەماقىمەن كۇتىم جاسايتىن قوسىمشا 24 مىڭنان استام ادام قامتىلاتىن بولادى. سونداي-اق، مەديتسينالىق- الەۋمەتتىك كورسەتىلىمدەر نەگىزىندە قاجەتتىلىك دارەجەسىن ەسكەرە وتىرىپ، جەكە كومەكشىنىڭ قىزمەتتەرىن كورسەتۋ تەتىگى وزگەرتىلەتىن بولادى»، - دەدى مينيستر.