الماتى تۇرعىنى ۇيىندە سويلەيتىن ساۋىسقان ۇستايدى

None
None
نۇر-سۇلتان. قازاقپارات - الماتى تۇرعىنى ولەگ پروحوروۆ كوپقاباتتى ۇيدە ساۋىسقان ۇستايدى، دەپ حابارلايدى «حابار 24». دالا قۇسىنىڭ قامقور قولدا تۇرىپ جاتقانىنا 8 جىل بولىپتى.

قولعا ۇيرەنگەنى سونشالىق، قازىر قۇستار قوجايىننىڭ ءسوزىن قايتالايدى ەكەن. ساۋىسقاننىڭ مۇنداي ەرەكشە قاسيەتى بارىن بيولوگ ماماندار دا راستاپ وتىر. الماتىلىق ولەگ پروحوروۆ «ساۋىسقان ۇستايمىن دەگەن ويىم بولعان ەمەس»، - دەيدى. 2013 -جىلى كوكتەمدە قاتتى جەل تۇرىپ، ءۇيىنىڭ جانىنداعى بيىك قاراعاشتان ساۋىسقاننىڭ ۇياسى قۇلايدى. سەرۋەندەپ ءجۇرىپ كورشىسى ەكەۋى اۋلادان بالانىڭ جۇدىرىعىنداي ءتورت بالاپاندى تاۋىپ الادى. وكىنىشكە قاراي، سارى اۋىز بالاپانداردىڭ بىرەۋى عانا امان الىپ قالىپتى.

ولەگ پروحوروۆ، قالا تۇرعىنى:

- ساۋىسقان بالاپانىن ءار ءۇش ساعات سايىن تاماقتاندىرادى. ەگەر اس ءىشۋ رەتى بۇزىلسا، بۇل وتە قاۋىپتى. السىرەگەن بالاپاندى ءتىرىلتۋ وڭاي بولمادى. جۇندەرى دە شىقپاعان قىزىلشاقا ەدى. ينتەرنەتتەن قارادىم. شپريتسپەن تاماقتاندىرىپ، بەتى بەرى قارادى. بالكوندا ۇستاپ، باقتىم. اشىق بولسا دا، ۇشىپ كەتپەدى. نەگىزى ساۋىسقان ءۇش كۇن ادامنىڭ قولىندا تۇرسا، ءوزىنىڭ بۇرىنعى ورتاسىنا قايتىپ ورالمايدى ەكەن.

ولەگ اسىراندىسىنا بارسيك دەپ ات قويعان. ءبىراز ۋاقىت وتكەن سوڭ ول كسيۋشا اتتى ساۋىسقاندى دا قامقورلىعىنا الدى. قاناتى سىنعان قاۋقارسىز قۇستى ەمدەپ، قاتارعا قوسقان. قازىر بارسيك پەن كسيۋشا ەركىن ۇشا الادى دەمەسەڭ، ناعىز ءۇي قۇسىنا اينالعان. جالپى، بۇل دالا قۇسىنىڭ تابيعاتىنا جات ەمەس. مامانداردىڭ ايتۋىنشا، ساۋىسقان وتە بەيىمدەلگىش قۇس. ۇيرەتسەڭ، ءتىلى دە شىعادى.

ولەگ پروحوروۆ، قالا تۇرعىنى:

- ادامعا وتە جاقىن. قولعا العانىمىزعا 7 اي بولعاندا ايەلىم ۇيدەن تەلەفون شالىپ، ساۋىسقاننىڭ سويلەگەنىن ايتتى. مەن نەگىزى كەز كەلگەن نارسەگە سەنە بەرمەيمىن. ۇيگە كەلدىم. ساۋىسقانىم ءۇنسىز وتىر. ءبىر ۋاقىتتا بارسيك، بارسيك دەپ سايراي جونەلدى. قازىر تۇشكىرسەڭ دە، جوتەلسەڭ دە قايتالايدى.

ساۋىسقانعا قاتىستى حالقىمىزدا ىرىمدار دا كەزدەسەدى. سەرگەك جاندارعا «ساۋىسقانداي ساق» دەپ تەڭەۋ ايتادى. ساۋىسقان شىقىلىقتاسا، قوناق كەلەدى دەپ جورىعان. دالا قۇسىنىڭ ەرەكشەلىگىن عالىمدار دا زەرتتەپتى. ايتۋلارىنشا، ساۋىسقان - قارعا تۇقىمداستاردىڭ ىشىندەگى ەڭ وتىرىقشى قۇس. سونداي- اق ەرەكشە زەيىنگە يە.

المات ابايەۆ، زوولوگيا ينستيتۋتىنىڭ عىلىمي قىزمەتكەرى:

- ساۋىسقانعا قاتىستى بىرنەشە تاجىريبە جۇرگىزىلگەن. ول - اينادان ءوزىنىڭ بەينەسىن تانيتىن جالعىز قۇس. ولاردىڭ ءتىپتى ساناي الاتىن قابىلەتى بارىن عالىمدار دالەلدەگەن. سونىمەن قاتار ساۋىسقان اعاشتىڭ بۇتاعىمەن ۇياسىن سىپىرىپ، قاجەتسىز قوقىستان تازارتا الادى.

تاعى ءبىر قىزىق دەرەك، ساۋىسقاندار جىلتىر زاتقا قۇمار كەلەدى ەكەن. ءبىر ۋىس جاڭعاق پەن جىلتىراق سىمدار، جىپتەر قويىلعان تاجىريبەدە دالا قۇسى تاعامنان گورى، كوزگە تۇسەر جىلتىراققا كوپ كوڭىل اۋدارعان. مۇنداي زاتتاردى ول ۇيا سالۋعا پايدالانادى ەكەن.

اۆتورلار: گۇلجان كولەن قىزى، كەنجە امرايەۆ، نۇرداۋلەت جاقسىبايەۆ

www.24.kz

سوڭعى جاڭالىقتار