مەملەكەت باسشىسى جاڭادان قۇرىلعان قارجىلىق مونيتورينگ اگەنتتىگى ءتوراعاسىن قابىلدادى
قاسىم- جومارت توقايەۆقا جاڭادان قۇرىلعان قازاقستان رەسپۋبليكاسىنىڭ قارجىلىق مونيتورينگ اگەنتتىگىنىڭ الداعى جوسپارلارى، جاقىندا تاراتىلعان قارجى مونيتورينگى كوميتەتىنىڭ 2020 -جىلى اتقارعان جۇمىستارىنىڭ قورىتىندىلارى تۋرالى باياندالدى.
پرەزيدەنتكە قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس- قيمىل جونىندەگى ەۋرازيالىق توپ شەڭبەرىندە اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبىنىڭ (FATF) نورمالارىن ىسكە اسىرۋدى ءوزارا باعالاۋدىڭ ەكىنشى كەزەڭىن وتكىزۋگە دايىندىق بارىسى تۋرالى اقپارات بەرىلدى.
قاسىم- جومارت توقايەۆ جانات ەليمانوۆقا كولەڭكەلى ەكونوميكاعا قارسى ءىس- قيمىل جونىندەگى جۇمىستى كۇشەيتۋدى، بۇل رەتتە بيزنەسىن ادال ىستەپ وتىرعان كاسىپكەرلەردىڭ مۇددەسىن قورعاۋدى جانە ولاردىڭ جۇمىسىنا ءجونسىز ارالاسۋعا جول بەرمەۋدى تاپسىردى.
ەسكە سالا كەتەيىك، ءبىز بۇعان دەيىن قازاقستاندا قارجىلىق مونيتورينگ اگەنتتىگى قۇرىلعانىن حابارلاعان بولاتىنبىز. قازاقستاندا جاڭادان قۇرىلعان قارجىلىق مونيتورينگ اگەنتتىگىنە جانات قالدىبەك ۇلى ەليمانوۆ ءتوراعا بولىپ تاعايىندالدى.