سادىر جاپاروۆ رەسمي تۇردە قىرعىزستان پرەزيدەنتى قىزمەتىنە كىرىستى

بىشكەك. كابار- قازاقپارات - بۇگىن وتكەن ۇلىقتاۋ راسىمىندە سادىر جاپاروۆ انت بەردى.

ودان كەيىن قىرعىزستان ورتالىق سايلاۋ كوميتەتىنىڭ ءتورايىمى نۇرجان شايلدابەكوۆا سادىر جاپاروۆقا پرەزيدەنت كۋالىگىن، توسبەلگى جانە شتاندارتتى تابىستادى، دەپ حابارلايدى قازاقپارات كابار اگەنتتىگىنە سىلتەمە جاساپ.

وسىلايشا، سادىر جاپاروۆ رەسمي تۇردە پرەزيدەنت قىزمەتىنە كىرىستى. رەسمي راسىمگە ءبىر مىڭنان استام قوناق قاتىستى.

اتاپ وتكەندە، ەلدىڭ تانىمال قايراتكەرلەرى، جوگوركۋ كەنەش دەپۋتاتتارى، ەكس-پرەزيدەنتتەر، پارلامەنتتىڭ بۇرىنعى سپيكەرلەرى، بۇرىنعى پرەمەر-مينيسترلەر، قىرعىزستان كونفەسسيالارىنىڭ باسشىلارى، ديپلوماتيالىق كورپۋس پەن حالىقارالىق ۇيىمداردىڭ وكىلدەرى، اقساقالدار جانە قاراپايىم ازاماتتار قاتىستى. سونداي-اق راسىمگە جاپاروۆتىڭ وتكەن سايلاۋداعى قارسىلاستارى شاقىرىلدى.

ەسكە سالا كەتسەك، 10-قاڭتار كۇنى قىرعىزستاندا مەرزىمىنەن بۇرىن پرەزيدەنت سايلاۋى بولىپ ءوتتى. سايلاۋ قورىتىندىلارى بويىنشا 79,2 پايىز داۋىس جيناعان سادىر جاپاروۆ جەڭىسكە جەتتى.

اۆتور: زارينا تۋعانبايەۆا