دانيال احمەتوۆ وسكەمەندەگى قۇرىلىس جۇمىستارىن سىنعا الدى

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ وسكەمەن قالاسىنداعى تۇرعىن ءۇي قۇرىلىسىن جانە پايدالانۋعا بەرۋ كورسەتكىشىن سىنعا الدى، دەپ حابارلايدى قازاقپارات ءتىلشىسى.

وتكەن جىلى وڭىردە 519,8 مىڭ شارشى مەتر تۇرعىن ءۇي پايدالانۋعا بەرىلىپ، جولداردىڭ %85 جوندەلدى. وبلىس ەكونوميكاسىنا 714,5 ميلليارد تەڭگە ينۆەستيتسيا تارتىلدى. بۇل كورسەتكىش 2019-جىلمەن سالىستىرعاندا %112 وسكەن. سونىمەن قاتار «بيزنەستىڭ جول كارتاسى-2025» باعدارلاماسى اياسىندا ءىسىن جاڭا باستاعان كاسىپكەرلەرگە 517 ميلليون تەڭگە مولشەرىندە 106 گرانت بەرىلدى. دەسە دە ءبىرقاتار قالالار مەجەلى كورسەتكىشتەرگە قول جەتكىزە الماعان.

وسى رەتتە ايماق باسشىسى دانيال احمەتوۆ ورىنباسارى باقىتجان باياحمەتوۆ پەن وسكەمەن قالاسىنىڭ اكىمى جاقسىلىق وماردى تۇرعىن ءۇي قۇرىلىسى مەن پايدالانۋعا بەرۋ جۇمىستارىنىڭ باياۋلىعى ءۇشىن سىنعا الدى.

«بىلتىر قول جەتكىزگەن وڭ كورسەتكىشتەرگە جانە تۇرعىن ءۇيدى پايدالانۋعا بەرۋ جوسپارىن %117,4 اسىرا ورىنداعانىمىزعا قاراماستان، وسكەمەندە وسى باعىتتا جۇمىستار سىلبىر جۇرگىزىلگەن. %69 دەگەن وتە تومەن كورسەتكىش. بۇل قالا اكىمى جاقسىلىق ومار مەن مەنىڭ ورىنباسارىم باقىتجان باياحمەتوۆ جىبەرگەن قاتەلىك. مۇنىمەن قويماي ولار بيىلعى قازان ايىنا دەيىن ءبىر دە ءبىر شارشى مەتر تۇرعىن ءۇيدى پايدالانۋعا بەرۋدى جوسپارلاپ تا وتىرعان جوق. ال قاراجات %100 بولىنگەن. سوندىقتان جۇماعا دەيىن بۇل ماسەلەنى شەشۋدى تاپسىرامىن، - دەدى ش ق و اكىمى.

سونداي-اق ءوڭىر باسشىسى سەمەي، وسكەمەن، ريددەر قالالارىنداعى بالاباقشا كەزەگى ماسەلەسىنە توقتالدى.

«ورىنباسارىم الىشەر مارحاباتقا، سونداي-اق سەمەي، وسكەمەن، ريددەر جانە كۋرچاتوۆ قالالارىنىڭ اكىمدەرىنە مەملەكەتتىك-جەكەشەلىك ارىپتەستىك اياسىندا بەلسەندى جۇمىس ىستەۋدى تاپسىرامىن. ون كۇن ىشىندە ماعان ناقتى ۇسىنىس ەنگىزىڭىزدەر»، - دەدى دانيال احمەتوۆ.