اقتاۋلىق وقۋشى جىلىجاي سۋاراتىن روبوت قۇراستىردى
روبوتتى تەحنيكا سالاسىندا جاڭا جوبانى وتكەن جىلى قولعا العان. قازىر ماكەت تۇرىندەگى روبوتتى مەكتەپ جىلىجايىندا سىناقتان وتكىزىپ ءجۇر. اقىلدى قۇلتەمىر وزدىگىمەن توپىراقتىڭ ىلعالىن ولشەيدى. سودان سوڭ قاجەتتى مولشەردە عانا سۋ شاشىپ، وسىمدىكتەردىڭ سولىپ قالماۋىنا سەپتەسەدى. وقۋشى قىز ەندى جوباسىن جەتىلدىرىپ، GPS قۇرىلعىسىن ورناتۋدى كوزدەيدى. 16 جاستاعى ونەرتاپقىش ناۋرىزدا وتەتىن رەسپۋبليكالىق IT سايىسقا قاتىسۋدى جوسپارلاپ وتىر.
ديانا قۋانباي، جوبا اۆتورى:
- كارانتين ۋاقىتىندا اتا- اجەمنىڭ ۇيىندە تۇرعان بولاتىنمىن. سول كەزدە اتامنىڭ كۇندەلىكتى ەگىن سۋاراتىنىن كورىپ، كەيبىر جەرلەردە قۇرعاق، كەي جەردە ىلعال بولاتىنىن كوردىم. كەيبىر وسىمدىكتەردىڭ ىلعالدىڭ كوپ بولۋىنان ءولىپ تە قالعانىن كوردىم. سوندىقتان وسى ىلعالدىلىقتىڭ وسىمدىكتىڭ وسۋىنە قانداي اسەرى بار ەكەنىن زەرتتەي كەلە نەگە وزدىگىنەن ادامنىڭ كومەگىنسىز ارەكەت جاساي الاتىن ماشينا ويلاپ تاپپاسقا دەگەن وي كەلدى. ماڭعىستاۋ ولكەسىندە قۇرعاقشىلىقپەن كۇرەسۋدە جانە كوگالداندىرۋدا ءوزىنىڭ ۇلەسىن قوسادى دەپ سەنەمىن.
www.24.kz