قازاقستان اۋىر اتلەتيكا فەدەراتسياسى نيدجات راحيموۆتى قورعاۋ ءۇشىن زاڭگەر ىزدەپ جاتىر

نۇر-سۇلتان. قازاقپارات - قازاقستان اۋىر اتلەتيكا فەدەراتسياسى دوپينگ داۋىنا ىلىككەن اۋىر اتلەت نيدجات راحيموۆتى قورعاۋ ءۇشىن حالىقارالىق بىلىكتى زاڭگەردى ىزدەپ جاتىر، دەپ حابارلايدى قازاقپارات.

«حالىقارالىق تەستينگ اگەنتتىگى (ITA) ۇلتتىق قۇراما مۇشەسى نيجات راحيموۆتىڭ اتىنا تاعىلعان ايىپتارعا بايلانىستى سپورتشى فەدەراتسياعا ءوزىنىڭ كىناسىزدىگىن قورعاۋعا نيەت ءبىلدىرىپ، قۇقىقتىق قولداۋ كورسەتۋ تۋرالى ءوتىنىش بەردى. ITA حابارلاماسىنا سايكەس اتلەت ءوزىنىڭ جازباشا تۇسىنىكتەمەسىن 1- اقپانعا دەيىنگى مەرزىمدە ۇسىنۋى قاجەت. بۇل رەتتە قوسىمشا تارتىپتىك تىڭداۋ سۇرالۋى مۇمكىن، ونىڭ بارىسىندا سپورتشى ءوز دالەلدەرىن ءوزى ايتۋعا مۇمكىندىگى بولادى»، - دەلىنگەن فەدەراتسياسىنىڭ تاراتقان مالىمدەمەسىندە.

فەدەراتسيا سونىمەن قاتار قازىرگى ۋاقىتتا فەدەراتسيا لوزاننا قالاسىنىڭ حالىقارالىق سپورت تورەلىگىن قوسا العاندا بارلىق ينستانتسيالاردا ءوز قۇقىقتارى مەن مۇددەلەرىن قورعاۋ ءۇشىن حالىقارالىق تاجىريبەسى بار جوعارى بىلىكتى زاڭگەردى تارتۋ ماسەلەسىن پىسىقتاپ جاتىر.

«دوپينگكە نولدىك توزىمدىلىك قاعيداتىن ۇستانا وتىرىپ، فەدەراتسيا بۇل ءىستى وبەكتيۆتى تەرگەۋگە مۇددەلى جانە ءىستى قاراۋ بارىسى تۋرالى اقپارات بەرەدى»، - دەلىنگەن مالىمدەمەدە.

ەسكە سالا كەتسەك نيدجات راحيموۆ 2016-جىلى ءزار تالداۋىن الماستىردى دەپ ايىپتالۋدا. ءدال وسىنداي ايىپپەن 2017-جىلعى ەۋروپا چەمپيونى دۋميترۋ كاپتاري دا سپورتتان ۋاقىتشا شەتتەتىلگەن بولاتىن. ول داۋعا قاتىستى نيدجات راحيموۆتىڭ ءوزى دە مالىمدەمە تاراتقان ەدى.