«الىبەك قورىقپا»: ەلوردالىق پوليسەيلەر تەرەزە الدىنداعى ءسابيدى قۇتقاردى

نۇر- سۇلتان. قازاقپارات - ەلوردادا ءتورتىنشى قاباتتاعى پاتەردىڭ اشىق تۇرعان تەرەزەسىنىڭ جاقتاۋىنا شىعىپ كەتكەن ءسابي قۇتقارىلدى، دەپ حابارلايدى قازاقپارات ءتىلشسى.

نۇر- سۇلتان قالالىق پوليتسيا دەپارتامەنتىنىڭ مالىمەتىنشە، قالا تۇرعىندارىنىڭ ءبىرى 102 نومىرىنە قوڭىراۋ شالىپ، ە-16 كوشەسى بويىنداعى تۇرعىن ءۇي پاتەرىنىڭ بىرىندە اشىق تۇرعان تەرەزەگە كىشكەنتاي بالا شىعىپ العانىن، جىلاپ اناسىن شاقىراتىندىعىن جانە ونىڭ قۇلاپ كەتۋ قاۋپى بار ەكەندىگىن حابارلاعان. وقيعا ورنىنا پاترۋلدىك پوليتسيا ەكيپاجى جىبەرىلگەن. پوليتسيا كاپيتانى ادىلەت دالابايەۆ پەن اعا لەيتەنانت اۋەلحان مۇتالحان 4- قاباتتاعى پاتەردى بىردەن تاپقانىمەن ەسىگى سىرتىنان جابىق بولعان.

«ولار بالانى سوزگە اينالدىرىپ، پاتەردىڭ ىشىنە كىرگىزە الدى جانە ەسىكتىڭ سىرتىنان سابيمەن سويلەسىپ، كوڭىلىن اۋلاۋعا تىرىسقان. 6 جاسار بالا ۇيدە جالعىز قالعان ءارى وتە قورقاتىندىعىن ايتقان. وسى ۋاقىتتا پوليتسيا قىزمەتكەرلەرى پاتەردىڭ جالعا بەرىلگەندىگىن انىقتاپ، قوجايىنىنا قوڭىراۋ شالعان. ولار دەرەۋ جەتىپ، ەسىكتى اشىپ بەرۋىن وتىنەدى. پاتەرگە كىرگەن پوليتسيا قىزمەتكەرلەرى بالانىڭ ءدىن- امان ەكەندىگىنە كوز جەتكىزگەننەن كەيىن وسى ۋاقىتتا ۇيىنە قاراي اسىعىپ كەلە جاتقان اناسىن كۇتتى. بالا امان- ەسەن اتا- اناسىنا تاپسىرىلدى. ولارعا بالانى الداعى ۋاقىتتا جالعىز قالدىرماۋ تۋرالى ەسكەرتۋ جاسالدى»، - دەپ اتاپ وتەدى دەپارتامەنتتەن.