ەربولات دوسايەۆ تەڭگە باعامىنا قاتىستى تۇسىنىك بەردى

نۇر-سۇلتان. قازاقپارات - ۇكىمەتتىڭ كەڭەيتىلگەن قۇرامداعى وتىرىسىندا ۇلتتىق بانك ءتوراعاسى ەربولات دوسايەۆ تەڭگە باعامىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«2020 -جىلى قازاقستاننىڭ ۆاليۋتا نارىعى كۇردەلى كۇتپەگەن وزگەرىستەردى وتكەردى. جاھاندىق پاندەميا جانە شيكىزات نارىقتارىنداعى كۇتپەگەن وزگەرىستەر 2020 -جىلعى ناۋرىزدا تەڭگە باعامىنىڭ 17 پايىزعا 448,5 تەڭگەگە دەيىن السىرەۋىنە اكەلدى. وسىنىڭ اياسىندا ۇلتتىق بانك ۇكىمەتپەن بىرلەسىپ، ىشكى ۆاليۋتا نارىعىندا تۇراقتىلىقتى قامتاماسىز ەتۋ بويىنشا شارالار كەشەنىن قابىلدادى»، - دەدى ە. دوسايەۆ.

ونىڭ ايتۋىنشا، ءتيىستى قابىلدانعان شارالاردىڭ ارقاسىندا تەڭگەنىڭ ايىرباستاۋ باعامى السىرەۋىن ءبىرشاما وتەپ، 2020 -جىلدىڭ سوڭىنا قاراي 6,1 پايىزعا 420,91 تەڭگەگە دەيىن نىعايدى.

«ناتيجەسىندە، دامۋشى نارىقتار ۆاليۋتالارىنىڭ ايتارلىقتاي السىرەۋى اياسىندا تەڭگەنىڭ باعامى ءبىر جىل ىشىندە تەك 10 پايىزعا تومەندەدى. 2021 -جىلى وزگەرمەلى باعام رەجيمىن نىعايتۋ جانە ۇلتتىق قوردىڭ اكتيۆتەرىن كونۆەرتاتسيالاۋ جانە نارىقتىڭ قۇبىلمالىلىعىن رەتتەۋ وپەراتسيالارىن جۇرگىزۋ كەزىندە نارىقتىق قاعيداتتاردى ساقتاۋ بويىنشا ودان ءارى شارالار قابىلداناتىن بولادى»، - دەدى ۇ ب باسشىسى. ونىڭ سوزىنە قاراعاندا، 2015 -جىلدان بەرى بايقالعان تولەم بالانسىنىڭ سوزىلمالى تاپشىلىعى سىرتقى جاعدايلاردىڭ ناشارلاۋى اياسىندا كۇشەيە تۇسكەن.

اۆتور: رۋسلان عابباسوۆ