شىعىس قازاقستاندا كوروناۆيرۋس جۇقتىرعاندار ازايىپ كەلەدى

وسكەمەن. قازاقپارات - شىعىس قازاقستان وبلىسىندا كوروناۆيرۋس جۇقتىرعاندار ازايىپ كەلەدى، دەپ حابارلايدى قازاقپارات ءتىلشىسى.

وڭىردە كوروناۆيرۋس ينفەكتسياسى بويىنشا ەپيدەميولوگيالىق جاعداي تۇراقتانۋدا. بۇل تۋرالى بريفينگ بارىسىندا ش ق و سانيتارلىق-ەپيدەميولوگيالىق باقىلاۋ دەپارتامەنتىنىڭ وكىلى قانات تۇرديەۆ مالىمدەدى.

«وبلىس بويىنشا رەپرودۋكتيۆتىك ساننىڭ ورتاشا كورسەتكىشى -%1 دى قۇرايدى، ال سوڭعى ءبىر اپتا ىشىندە اۋرۋدىڭ ءوسۋ قارقىنى - %0,2. بۇگىندە شىعىس قازاقستان كوروناۆيرۋس بويىنشا ەپيدەميولوگيالىق جاعدايدى باعالاۋ ماتريتساسىنا سايكەس بۇرىنعىداي «جاسىل ايماقتا» تۇر. پاندەميا باستالعاننان بەرى وبلىس اۋماعىندا كوروناۆيرۋس ينفەكتسياسىنىڭ 19835 جاعدايى تىركەلگەن»، - دەدى ول.

قانات تۇرديەۆتىڭ ايتۋىنشا، 2021-جىلعى 1- قاڭتاردان باستاپ وبلىس بويىنشا 176 مونيتورينگتىك توپ 544 رەيد جۇرگىزگەن. ناتيجەسىندە كارانتين تالاپتارىن بۇزعان 69 نىسان انىقتالدى. شەكتەۋ شارالارىن ساقتاماعاندارعا 2 ميلليون تەڭگەدەن استام ايىپپۇل سالىنعان.

«ش ق و باس مەملەكەتتىك سانيتاريالىق دارىگەرى مىندەتىن اتقارۋشىنىڭ 22- قاڭتارداعى قاۋلىسىنا سايكەس كارانتين 7- اقپانعا دەيىن ۇزارتىلدى. سونداي-اق 25- قاڭتاردان باستاپ ش ق و مەن پاۆلودار وبلىسىنىڭ شەكاراسىنا ەكى سانيتارلىق بەكەت قويىلدى. بۇعان كوروناۆيرۋس ينفەكتسياسى ءورشىپ كەتكەن پاۆلوداردىڭ «قىزىل» ايماققا كىرۋى سەبەپ بولدى. ەگەر كورشىلەس الماتى، قاراعاندى وبلىستارىندا ەپيدەميولوگيالىق جاعداي ناشارلاي باستاسا وندا شىعىس قازاقستاننىڭ سىرتقى شەكارالارىنا قوسىمشا سانيتارلىق بەكەتتەر ورناتىلۋى مۇمكىن»، - دەپ تولىقتىردى ش ق و بويىنشا سانيتارلىق-ەپيدەميولوگيالىق باقىلاۋ دەپارتامەنتىنىڭ وكىلى.