الماتىدا جول تالعامايتىن كولىك «سەرگەك» كامەرالارىن الداماق بولعان

None
None
الماتى. قازاقپارات - الماتىدا جول تالعامايتىن كولىكتىڭ جۇرگىزۋشىسى «سەرگەك» كامەرالارىن الداماق بولعان، دەپ حابارلايدى قازاقپارات ءتىلشىسى.

پوليتسيانىڭ مالىمەتىشە، 35 جاستاعى «نيسسان پاترول» اۆتوكولىگىنىڭ جۇرگىزۋشىسى جول قوزعالىسى ەرەجەلەرىن بۇزا وتىرىپ، جازادان جالتارۋ ماقساتىندا كولىكتىڭ الدىڭعى ءنومىرىن اۋدارىپ جۇرگەن.

«سەرگەك» اۆتوماتتاندىرىلعان جۇيەسىنە مونيتورينگ جۇرگىزۋ كەزىندە الدىڭعى ءنومىردى جاسىرۋ ماقساتىندا ءنومىردى اۋدارىپ وتىراتىن ارنايى مەحانيكالىق جابدىق ورناتقان بۇزۋشى انىقتالدى.

بەينەكامەرالارعا جاقىنداعان كەزدە جول تالعامايتىن كولىكتىڭ جۇرگىزۋشىسى كولىك قۇرالىن باسقارۋ پۋلتى ارقىلى قۇرىلعىعا سيگنال جىبەرىپ، مەملەكەتتىك ءنومىردى جاسىرىپ وتىرعان.

ول ءوز كولىگىنىڭ مەملەكەتتىك ءنومىرىن جاسىرۋ ارقىلى جول قوزعالىسى ەرەجەلەرىن بۇزدى. دەمەك ول جول قوزعالىسىنىڭ باسقا قاتىسۋشىلارىنا قاساقانا قاۋىپ ءتوندىردى. قۇقىق بۇزۋشى ۇستالىپ، اكىمشىلىك زاڭناماعا سايكەس جاۋاپكەرشلىككە تارتىلدى. ول ءبىر جىل مەرزىمگە كولىك قۇرالىن باسقارۋ قۇقىعىنان ايىرىلدى، سونداي-اق وعان 20 ا ە ك كولەمىندە ايىپپۇل تولەۋگە تۋرا كەلەدى»، - دەدى الماتى قالالىق پ د اكىمشىلىك پوليتسيا باسقارماسىنىڭ باستىعى جاندوس مۇراتاليەۆ.

ونىڭ ايتۋىنشا، بىلتىر وسىعان ۇقساس قۇقىق بۇزۋشىلىقتار ءۇشىن 3192 جۇرگىزۋشى اكىمشىلىك جاۋاپكەرشىلىككە تارتىلدى. مەملەكەتتىك تىركەۋ بەلگىسىن جاسىرۋعا ارنالعان ءارتۇرلى قوندىرعىلار مەن جالعان نومىرلەردى ورناتۋ جول قوزعالىسى ەرەجەلەرىن قاساقانا بۇزۋ بولىپ ەسەپتەلەدى.

«جۇرگىزۋشىلەرگە قالا ىشىندە ورناتىلعان كامەرالاردىڭ بارلىعى دۇرىس جۇمىس ىستەپ تۇرعانىن جانە ءتۇرلى زاڭ بۇزۋشىلىقتاردى تىركەيتىنىن ەسكەرتكەن ءجون. جول - قاتەلىكتەردى كەشىرمەيتىنىن ءاردايىم ەستە ۇستاۋ كەرەك»، - دەدى جاندوس مۇراتاليەۆ.

سوڭعى جاڭالىقتار