جانىڭ جاي تاباتىن ءۇش ارەكەت

نۇر-سۇلتان. قازاقپارات - تۇلعا قالىپتاستىرۋ باعىتىنداعى كەڭەسشى، پسيحولوگ ءارى بىرنەشە كىتاپتىڭ اۆتورى مارك مەنسون «ءوزىڭدى جاقسى سەزىنۋ» ءۇشىن ىستەۋ كەرەك ءۇش ءادىستى ۇسىندى.

وعان تەراپيا، كۇندەلىك جۇرگىزۋ جانە مەديتاتسيا كىرەدى.

تەراپيا

بىرەۋگە ىشكى جان-دۇنيەمىزدى اقتارىپ، ماسەلەمىزدى اشىپ ايتقاندا جەڭىلدەپ قالاتىنىمىز راس. سول سەبەپتى تەراپيانىڭ بەرەر پايداسى زور. تەراپيا وتكەندەردىڭ كوبى ۋاقىت وتكەن سوڭ ءوزىن جاقسى سەزىنىپ، ارتىق ۋايىم-قايعىدان ارىلادى.

پسيحولوگيادا تەراپيانىڭ ونداعان ءتۇرى بار. ونىڭ ىشىندە وتباسى تەراپياسى كەڭىنەن تاراعان. دەگەنمەن ءار ادام ساناسىنا، مىنەزىنە جانە پروبلەماسىنا قاراي قاي تەراپيادان وتەتىنىن ءوزى تاڭداۋى شارت. عالىمدار تەراپيانىڭ ءبارى دە ناتيجە بەرەتىنىن ايتادى. بىرنەشە مارتە جاسالعان زەرتتەۋگە سايكەس تەراپيانىڭ بارلىق ءتۇرى ءارتۇرلى دارەجەدە كومەگىن تيگىزەدى.

كۇندەلىك جۇرگىزۋ

تەراپياعا ۇقساس ءادىس - كۇندەلىك جۇرگىزۋ. تاريحتا عۇلامالار كوبىرەك ويلاۋ ءۇشىن كۇندەلىك جۇرگىزگەن. وتكەن عاسىردىڭ 60-70-جىلدارى كۇندەلىك جۇرگىزۋدىڭ تەراپيالىق كومەگى بار ەكەنى انىقتالدى. سول جىلدارى پسيحولوگتار پروبلەماسىن ايتىپ كەلگەن ادامدارعا كۇندەلىك جۇرگىزۋگە كەڭەس بەرگەن. ناتيجەسىندە بۇل ءادىس ادامنىڭ پسيحولوگياسى مەن ءوزىن جاقسى سەزىنۋىنە ەداۋىر اسەر ەتەتىنى بەلگىلى بولعان.

مەديتاتسيا

بۇل - كەيىنگى كەزدە كەڭىنەن تاراي باستاعان ءادىس. قازىر الەمنىڭ ءار جەرىندە ءتۇرلى ءىس-شارادا، جينالىستا، مەكتەپتە، ءتىپتى، تۇرمەدە مەديتاتسيانىڭ ءرولى ارتىپ كەلەدى.

مەديتاتسيا - رۋحاني جاتتىعۋ. ەگەر سپورت دەنەڭىزدى شىنىقتىرىپ، تارتىپكە باۋلىسا، مەديتاتسيا جانىڭىزدىڭ، رۋحىڭىزدىڭ، ويىڭىزدىڭ تازارىپ، «شىنىعۋىنا» سەپ بولادى.

تەراپيا، كۇندەلىك جۇرگىزۋ جانە مەديتاتسيانى نە بىرىكتىرەدى؟

بۇل ادىستەر جان-تىنىشتىعىن بەرىپ، مازالاپ جۇرگەن ارتىق ويدان قۇتىلۋعا كومەكتەسەدى. تەراپيا اداممەن سويلەسۋ ارقىلى وي مەن سەزىمدى جەتكىزۋگە مۇمكىندىك بەرەدى. ال كۇندەلىككە مازالاپ جۇرگەن وي مەن سەزىمدى جازامىز. مەديتاتسيا وي مەن سەزىمدى باسقارۋعا، ونى قاداعالاۋعا ۇيرەتەدى.

massaget.kz