ديماش قۇدايبەرگەن فاناتتارىمەن تىكەلەي ەفيردە كەزدەسپەك

نۇر-سۇلتان. قازاقپارات - الەمگە تانىمال قازاقستاندىق ءانشى ديماش قۇدايبەرگەن جانكۇيەرلەر قاۋىمىمەن تىكەلەي ەفيردە كەزدەسۋگە ۋادە ەتتى، دەپ حابارلايدى قازاقپارات.

«سالەم، Dears! مەنىڭ العاشقى ونلاين-كونسەرتىمدى كورگەندەرىڭىز ءۇشىن راقمەت! مەن جانە مەنىڭ كوماندام بۇل كەشتى وتە جاقسى وتكىزدى. مەن سىزدەرمەن 31- قاڭتارداعى ونلاين-كونسەرت ەفيرىنەن كەيىن بولاتىن تىكەلەي ەفيردە كەزدەسۋدى اسىعا كۇتەتىنىمدى ايتقىم كەلەدى. مەنىڭ سىزدەرگە ايتارىم بار! مەن سىزدەردى جاقسى كورەمىن! راقمەت!»، - دەپ جازدى ديماش Instagram-پاراقشاسىندا.

شارا بارىسىندا جانكۇيەرلەر ديماشقا سۇراقتارىن قويۋعا، ونلاين-كونسەرت تۋرالى اسەرلەرىمەن بولىسۋگە، سونداي-اق ءارتىستىڭ جوسپارلارى تۋرالى بىلۋگە مۇمكىندىك الادى.

ەسكە سالايىق، ديماش قۇدايبەرگەن TIXR امەريكالىق ستريمينگ-پلاتفورمادا ونلاين-كونسەرت وتكىزگەن بولاتىن. كونسەرتتى 100 ەلدەگى جانكۇيەر تاماشالادى. كوپتەگەن فاناتتىڭ وتىنىشىنە بايلانىستى اتالمىش شوۋ 31- قاڭتار كۇنى نۇر-سۇلتان ۋاقىتىمەن 20:00 دە قايتادان كورسەتىلەدى.

ديماش ونەرسۇيەر قاۋىممەن تىكەلەي ەفيردى وسى كورسەتىلىمنەن كەيىن وتكىزۋدى جوسپارلاپ وتىر.

سونداي-اق بۇعان دەيىن حابارلاعانىمىزداي، جاقىندا قازاقستاندىق ءانشىنىڭ «Golden» انىنە تۇسىرىلگەن جاڭا بەينەبايانى شىعاتىن بولادى.