قازاقستاندا كولىكتى قايتا تىركەۋ قىزمەتى جەڭىلدەدى

نۇر-سۇلتان. قازاقپارات - قازاقستاندا كولىكتى قايتا تىركەۋ جۇمىسى ەداۋىر جەڭىلدەدى.

بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين جەلىدەگى پاراقشاسىندا جازدى، دەپ حابارلايدى قازاقپارات ءتىلشىسى.

«مەن مينيستر لاۋازىمىنا كىرىسكەننەن كەيىن بىردەن ارنايى ح ق و- لاردىڭ جۇمىسىمەن تانىسقانمىن. سول كەزدىڭ وزىندە ادامداردىڭ كوپتىگىنەن تۋىندايتىن قاربالاستى قالاي ەڭسەرۋگە بولاتىنىن ويلانا باستادىم. ءبىز كوماندامىزبەن بىرگە بۇل ماسەلەنى شەشۋدىڭ بىردەن-ءبىر جولى - قىزمەتتى ونلاين فورماتقا اۋىستىرۋ ەكەنىن بىردەن ۇقتىق. Egov پورتالىندا بۇل قىزمەتتى ەلەكتروندى فورماتقا قالاي ىسكە اسىرۋعا بولاتىنىن ءوزىم دە كورىپ، قاسىمدا كەڭەسشى وتىرسا دا ەكى ساعات ۋاقىتىم كەتىپ ەدى»، - دەدى مينيستر.

باعدات مۋسين سول سەبەپتى ىشكى ىستەر مينيسترىنە بۇل پروتسەستى تولىق قايتا قاراۋدى ۇسىنعانىن، ونى بانكتەرگە ەنگىزۋ كەرەكتىگىن ايتقانىن جازدى.

«ءبىز بۇگىن رەسمي تۇردە اۆتوكولىكتى قايتا تىركەۋ قىزمەتىن ىشكى ىستەر مينيسترىمەن بىرگە Kaspi.kz ءموبيلدى قوسىمشاسى ارقىلى ىسكە قوسامىز. ەندىگارى اۆتوكولىكتى قايتا تىركەۋ ءۇشىن ارنايى ح ق و- عا بارۋدىڭ قاجەتى جوق. Kaspi.kz نەمەسە باسقا دا بانكتەردىڭ مەملەكەتتىك قىزمەتتەر ايدارىنا كىرىپ، اۆتونى قايتا تىركەي بەرىڭىز. حالىق بانك ءدال قازىرگى ۋاقىتتا وسىعان ۇقساس قىزمەتتى، اتاپ ايتقاندا نەسيەگە ساتىلعان اۆتوكولىكتى قايتا تىركەۋ قىزمەتى بويىنشا جۇمىس جۇرگىزۋدە»، - دەدى ول.