الماتىدا يشەميالىق ينسۋلتتى ەمدەۋگە جاساندى ينتەللەكت قولدانىلا باستادى
بۇل انىقتاۋ جۇيەسى «Cerebra» جاساندى ينتەللەكت نەگىزىندە جۇزەگە اسادى. الماتى قالالىق N7 كلينيكالىق اۋرۋحاناسىنىڭ باس دارىگەرى، پروفەسسور ماناس رامازانوۆتىڭ ايتۋىنشا، الماتىلىق جاس ІТ - مامانداردىڭ جاساپ شىعارعان جاڭا جوباسىن العاش بولىپ وسى اۋرۋحانا ەنگىزدى. ازىرگە جۇيە پيلوتتىق رەجيمدە ىستەيدى، الايدا ءوزىنىڭ تيىمدىلىگىن كورسەتىپ تە ۇلگەردى. جاساندى ينتەللەكتىڭ كومەگى تيگەن العاشقى پاتسيەنت تە بار.
N7 كلينيكالىق اۋرۋحانانىڭ قان- تامىرلارى نەيروحيرۋرگياسى بولىمشەسىنىڭ دارىگەرلەرى يشەميالىق ينسۋلت العان 71 جاستاعى پاتسيەنتكە جاساندى ينتەللەكت كومەگىمەن ءبىرىنشى وپەراتسيا جاسادى. پاتسيەنت اتالعان اۋرۋحانانىڭ قابىلداۋ بولىمىنە سول جاق دەنەسى مۇلدەم قيمىلسىز، بەتىندە اسسيمەتريامەن جانە قۇلاعى ەش ەستىمەيتىن جاعدايدا تۇسكەن ەدى. تەز ارادا كومپيۋتەرلىك توموگرافيا جاسالىپ، «Cerebra» جۇيەسىندە وڭدەلدى. شۇعىل تۇردە باس ميىنىڭ وڭ جاق ورتاڭعى ارتەرياسىنا مەحانيكالىق ترومبوەكستراكسيا جاسالدى. وپەراتسيادان كەيىن پاتسيەنت ەسىن جيىپ، ەكى اياعىن تەڭ باساتىن دەڭگەيگە جەتتى، تەك قولىندا السىزدىك بار. پاتسيەنت ەندى وڭالتۋ ەم- شاراسىن قابىلداماق.
قان- تامىرلارى نەيروحيرۋرگياسى بولىمشەسىنىڭ مەڭگەرۋشىسى راۋان قاستەي ينسۋلت كەزىندە ميداعى قان اينالىمىن، اعزا جۇمىسىن قالپىنا كەلتىرۋ باستاپقى «التىن ۋاقىت» سانالاتىن 4,5 ساعاتتا عانا مۇمكىن ەكەنىن ايتادى. اۆتوماتتاندىرىلعان پلاتفورما ينسۋلتتىڭ بار- جوعىن 5-10 مينۋتتا انىقتاپ بەرەدى جانە تەز ارادا باس ميىنىڭ قان تامىرلارىنداعى وزگەرىستى كورسەتەدى. بۇل كلينيكالىق- دياگنوستيكالىق باعدارلاما ينسۋلتتى ەرتە دەڭگەيدە انىقتاپ، بىردەن يشەمياعا ۇشىراعان ايماقتى بىلۋگە، ۋاقىتىندا ەمدەۋدى باستاۋعا، وپەراتسيا جاساۋعا قارسى كورسەتىلىمنىڭ بار- جوعىن انىقتاۋعا، نەمەسە ترومبوليتيكالىق تەراپيا جانە ينسۋلتپەن تۇسكەن پاتسيەنتكە قاجەتتى انىقتاۋ مەن ەمدەۋ شارالارىن اتقارۋعا مۇمكىندىك بەرەدى.
ايتا كەتەيىك، بيىلعى 22 - قاڭتار كۇنى ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى باعدات مۋسين الماتى قالاسىنا جۇمىس ساپارى كەزىندە N7 قالالىق كلينيكالىق اۋرۋحانادا بولعان ەدى. مينيسترگە «Cerebra» باعدارلاماسى تانىستىرىلدى. جۋرناليستەرگە بەرگەن سۇحباتىندا باعدات مۋسين اسىرەسە مەديتسينا سالاسىندا مۇنداي جوبالاردىڭ ماڭىزدىلىعىن جانە جاساندى ينتەللەكت نەگىزىندە ونى ارى قاراي دامىتۋ قاجەتتىگىن اتاپ ءوتتى. جاقىن ارادا «Cerebra» جوباسىن الماتى مەن نۇر- سۇلتان قالالارىنىڭ باسقا دا ءىرى كلينيكالارىندا ەنگىزۋ جوسپارلانىپ وتىر.
اۆتور: گۇلميرا عوسمانالي
