+7 (701) 759 90 19
-18 °С : نۇر-سۇلتان
1 °С : الماتى
USD 414.94 EUR 504.03
RUB 5.59 CNY 64.22
جاڭالىقتار

سپورتشىلاردىڭ ءومىرىن جالماعان اۋە اپاتتارى. جاعا ۇستاتارلىق ستاتيستيكا

25 قاڭتار 10:33
:ءبولىسۋ
سپورتشىلاردىڭ ءومىرىن جالماعان اۋە اپاتتارى. جاعا ۇستاتارلىق ستاتيستيكا

نۇر-سۇلتان. قازاقپارات - برازيليادا فۋتبولشىلار مىنگەن ۇشاق اپاتقا ۇشىراپ، التى ادام قازا تاپتى. ولاردىڭ بەسەۋى جولاۋشىلار بولسا، بىرەۋى ۇشقىش.

تاريحقا كوز جۇگىرتسەك، سپورتشىلاردىڭ ءومىرىن جالماعان اۋە اپاتتارى ءبىر بۇل وقيعامەن شەكتەلمەيدى. ەستەرىڭىزدە بولسا، وسىدان ءبىر جىل بۇرىن، 26 - قاڭتاردا ا ق ش- تان جەتكەن قارالى حابار جەتكەن ەدى. ا ق ش- تىڭ كالاباساس (كاليفورنيا شتاتى) قالاسىندا بولعان تىكۇشاق اپاتىنان ايگىلى باسكەتبولشى كوبي برايانت قازا تاپتى. اۋە كولىگى لاس- ۆيردجەنسكە جاقىن ماڭايداعى شالعاي اۋداندا جەرگىلىكتى ۋاقىتپەن تاڭعى ساعات 10 كەزىندە اپاتقا ۇشىراعان. بورتتا باسكەتبولشىنىڭ 13 جاسار دجاننا ماريا دا بولعان. تىكۇشاقتاعىلاردىڭ ەشقايسىسى امان قالماعان.

*

ال 2019 -جىلدىڭ 21- قاڭتارىندا ارگەنتينالىق شابۋىلشى ەميليانو سالا مىنگەن جالعىز موتورلى ۇشاق لا- مانش بۇعازىندا راداردان كورىنبەي كەتكەن بولاتىن. نانت قالاسىنان كارديففكە باعىت العان ۇشاقتاعىلاردىڭ بارلىعى قازا تاپقان. 2010 -جىلدان بەرى فرانسۋز كلۋبتارىندا ونەر كورسەتكەن سالانىڭ ۋەلس كومانداسىنا اۋىسقانى سول ەدى. 1948 -جىلدىڭ 18 - قاراشاسىندا لا- مانش بۇعازىندا بولعان اۋە اپاتىنان سول كەزدەگى چەحوسلوۆاكيا قۇراماسىنىڭ التى حوككەيشىسى كوز جۇمدى. ولار مىنگەن قوسموتورلى ۇشاق پاريجدەن لوندونعا باعىت العان بولاتىن. سەبەبى قۇرامانى تۇماندى البيوندا بىرنەشە جولداستىق كەزدەسۋ كۇتىپ تۇرعان. اۋە كەمەسى قالىڭ تۇماننان باعىتىنان جاڭىلىپ، راداردان عايىپ بولعان.

*

قايعىلى جايت يتاليا سپورتىن دا اينالىپ وتپەگەن. 1949 -جىلدىڭ 4 - مامىرىندا «تورينو» فۋتبول كلۋبىنىڭ ۇشاعى پورتۋگاليادان قايتىپ كەلە جاتىپ تۋرين قالاسىنا جاقىن جەردەگى تاۋ شاتقالىنا سوقتىعىسادى. سۇم اجال كوماندانىڭ جۇرەگى سانالعان كاپيتان ۆالەنتينو ماتستسولانى قوسا ەسەپتەگەندە 18 فۋتبولشىنىڭ ءومىرىن قيدى. ودان بولەك باقيلىققا اتتانعاندار قاتارىندا تىلشىلەر مەن رەسمي وكىلدەر جانە اعىلشىن باپكەرى لەسلي ليۆسي بار.

*

ارادا ءبىر جىل وتپەي جاتىپ، 1950 -جىلدىڭ 5 - قاڭتارىندا سۆەردلوۆسكىدەگى اۋا رايىنىڭ قولايسىزدىعى لي 2 ۇشاعىنىڭ اپاتقا ۇشىراۋىنا سەبەپ بولىپ، بورتتاعى ك س ر و ا ا ك سەگىز حوككەيشىسى، باپكەر، دارىگەر مەن ماسساجيست قازا تاپتى.

*

1958 -جىلدىڭ 6 - اقپانىندا بولعان ميۋنحەندەگى اۋە اپاتى - الەمدى دۇرسىلكىندىرگەن وقيعا. بريتانيانىڭ British European Airways اۋە كومپانياسىنا تيەسىلى Airspeed AS.57 Ambassador ۇشاعى ميۋنحەنگە جانارماي قۇيۋ ءۇشىن توقتاپ، قايتا باعىتىن جالعاستىرماق بولادى. اۋەگە كوتەرىلۋ ءۇشىن جىلدامدىقتى ءتيىستى دەڭگەيدە ارتتىرا الماعان اۋە كەمەسى ۇشىپ- قونۋ جولاعىنىڭ سوڭىندا تۇرعان قاقپاعا بارىپ سوقتىعىسقان. ەۋروپا چەمپيوندارى كۋبوگىنىڭ شيرەك فينالدىق ويىنىندا بەلگرادتىڭ «سرۆەنا زۆەزدا» كلۋبىمەن كەزدەسكەن «مانچەستەر يۋنايتەد» ءدال وسى ۇشاقپەن ۇيلەرىنە ورالۋى ءتيىس ەدى. تەڭ اياقتالعان ماتچتا اعىلشىن كلۋبى جارتىلاي فينالعا شىعۋعا مۇمكىندىك العان. الايدا.. . ۇشاقتا بولعان 44 ادامنىڭ 24 ءى كوز جۇمسا، ونىڭ ىشىندە سەگىز فۋتبولشى، كلۋبتىڭ ءۇش قىزمەتكەرى مەن سەگىز ءتىلشى بار. ءتىرى قالعان سولتۇستىكيرلانيالىق قاقپاشى گارري گرەگگ جاراقاتتانعان ارىپتەستەرىنىڭ امان قالۋىنا سەپ بولدى. ودان بولەك تانىمال باپكەر مەتت باسبي مەن كوشباسشى بوببي چارلتوننىڭ دا كورەر جارىعى بار ەكەن.

*

1960 -جىلدىڭ 16- شىلدەسىندە كوپەنگاگەن قالاسىنىڭ ماڭىنداعى كاسترۋپ اۋەجايىنا قونباق بولعان اۋە كەمەسى اپاتقا ۇشىراپ، سەگىز ادامنىڭ ءومىرى قيىلدى. ولاردىڭ ءبارى دانيانىڭ ەكىنشى قۇراماسىنىڭ فۋتبولشىلارى بولاتىن. اياقدوپ شەبەرلەرى ريمدەگى وليمپيادا ويىندارىنا دايىندىق جۇرگىزىپ جاتقان. قايعىلى وقيعاعا قاراماستان دانيانىڭ فۋتبول وداعى ءتورتجىلدىقتىڭ باستى دوداسىنا قاتىسۋدان باس تارتقان جوق.

*

1961 -جىلدىڭ 15- اقپانىندا نيۋ يورك - بريۋسسەل باعىتىمەن ۇشىپ كەلە جاتقان «بوينگ 707» ۇشاعىنان اقاۋ شىعىپ، Sabena كومپانياسىنا تيەسىلى اۋە كەمەسىندە بولعان 72 ادامنىڭ بىردە- ءبىرى امان قالعان جوق. جەردەگى تاعى ءبىر ادام دا قازا تاپتى. بورتتاعى مانەرلەپ سىرعاناۋدان ا ق ش قۇراماسى (34 سپورتشى مەن باپكەر) پراگاداعى الەم بىرىنشىلىگىنە بارا جاتقان ەكەن. سول جىلى چەمپيونات وتكەن جوق.

*

1961 -جىلدىڭ 3 -ءساۋىرى. بۇل جولى چيلي چەمپيوناتىنىڭ ءبىرىنشى ديۆيزيونىنداعى وڭتۇستىك ايماقتىڭ «گرين كروسس» (سانتياگو) كلۋبى مىنگەن ۇشاق كورديلەر تاۋىندا اپات بولىپ، 24 ادام كوز جۇمدى.

*

بوليۆيانىڭ ەڭ تانىمال «سترونگەست» كلۋبىنىڭ 19 ويىنشىسى مەن باسشىسى مىنگەن ۇشاق 1969 -جىلدىڭ 26- قىركۇيەگىندە اند تاۋلارىندا اپات بولادى. كوماندا لا- پاس قالاسىنا كەلە جاتقان. وكىنىشكە قاراي، 74 ادام مەرت بولىپ، بۇل جايت ەلدەگى ەڭ ءىرى اۋە اپاتى رەتىندە تىركەلدى. قايعىلى وقيعانى كوپشىلىك «ۆيلوكوداعى قاسىرەت» دەپ تە اتايدى.

*

1970 -جىلدىڭ 1-ساۋىرىندە كراسنويار تۇبىندە ان 24 ۇشاعى اپاتقا ۇشىراپ، جولاۋشىلاردىڭ بارلىعى قازا تاپتى. ولاردىڭ اراسىندا ۆولەيبولدان جاستار قۇراماسى دا بولعان.

*

ا ق ش- تىڭ ۆيردجينياسىندا 1970 -جىلدىڭ 14 - قاراشاسىندا تىركەلگەن اۋە اپاتى 37 سپورتشىنىڭ ءومىرىن قيدى. ولاردىڭ بارلىعى امەريكاندىق فۋتبولدان مارشالل ۋنيۆەرسيتەتى كومانداسىنىڭ (حانتينگتون، باتىس ۆيردجينيا) وكىلدەرى بولاتىن. بورتتا جانكۇيەرلەر، سپورت كافەدراسىنىڭ جەتەكشىسىن قوسا ەسەپتەگەندە بارلىعى 75 ادام بولسا، ونىڭ بىردە- ءبىرى ءتىرى قالعان جوق. جان تۇرشىگەرلىك وقيعادان قازا تاپقانداردى ەستە ساقتاۋ ءۇشىن ۋنيۆەرسيتەت اۋلاسىندا مەموريالدى سۋبۇرقاق ورناتىلدى. جىل سايىن 14-قاراشادا ونداعى سۋ توقتاتىلادى. بۇل اۋە اپاتىنان قيىلعان ءومىردى اڭعارتادى.

*

يسپانيادا جولداستىق كەزدەسۋ وتكىزۋدى ۇيعارعان ءالجيردىڭ «ەير- ليكۆيد» اۋەسقوي كلۋبىنىڭ وكىلدەرى پيرەنەي تۇبەگى ەلىنە جەتە الماي كوز جۇمدى. بۇل 1970 -جىلدىڭ 31 - جەلتوقسانى بولاتىن.

*

1972 -جىلدىڭ 13 - قازانى. چيلي استاناسى سانتياگونى بەتكە العان مونتيەۆيدەونىڭ (ۋرۋگۆاي) رەگبي كومانداسى دا ءوزىنىڭ ءبىرقاتار ويىنشىسىنان وسى تاۋدا بولعان اپاتتا ايىرىلىپ قالدى. FH 227 ۇشاعىندا 45 بولسا، سونىڭ تەك 16-سى ءتىرى قالعان ەكەن.

*

ۇشاق اپاتىنان كوز جۇمعان گرەحەم حيلل «فورمۋلا-1-گە» قاتىساتىن Embassy Racing with Graham Hill كومانداسىنىڭ وكىلى بولاتىن. التى ادامعا شاقتالعان «پايپەر اتستەك» ۇشاعى فرانسياداعى جارىستان لوندونعا قايتىپ كەلە جاتقان. الايدا جارتى جولدا اقاۋدان جەرگە قۇلادى.

*

1979 -جىلدىڭ 11-تامىزىندا بولعان اۋە اپاتى سول كەزدەگى «پاحتاكور» كلۋبىنىڭ جانكۇيەرلەرىن قان جىلاتتى. ك س ر و چەمپيوناتى اياسىندا «دينامومەن» كەزدەسۋ ءۇشىن مينسكىنى بەت العان كلۋب 8400 مەتر بيىكتىكتە تۋ-134 ۇشاعىمەن سوقتىعىسىپ، بورتتاعى 17 ويىنشى مەن باپكەرلەر قازا تاپتى. قايعىلى جايتتان سوڭ وزبەكستان كومانداسى ەرىكتىلەر ەسەبىنەن كۇشەيتىلىپ، فۋتبولدان ك س ر و چەمپيوناتىنىڭ رەگلامەنتىنە «پاحتاكوردىڭ» ءۇش جىل بويى جوعارى ليگادا ورنىن ساقتاپ قالۋ تۋرالى باپ ەنگىزىلگەن.

*

1980 -جىلدىڭ 14- ناۋرىزىندا ۆارشاۆا تۇبىندە بولعان اۋە اپاتى دا كوپشىلىكتىڭ جادىنان شىعا قويماعان بولار. سەبەبى ۇشاقتىڭ جارىلۋىن لاڭكەستەردىڭ ءىسى دەپ جورامالداعاندار بار. پولشانىڭ يل-62 اۋە كەمەسىندە بوكستان اقش قۇراماسىنىڭ 22 وكىلى، ونىڭ ىشىندە 14 سپورتشى بار. قازا تاپقانداردىڭ جالپى سانى - 87 ادام.

*

ال 1987 -جىلدىڭ 8 -جەلتوقسانىندا بولعان قايعىلى جايت «اليانس ليماعا» اۋىر سوققى بولىپ ءتيدى. ۇلتتىق چەمپيوناتتان قايتىپ كەلە جاتىپ پەرۋدەن سولتۇستىككە قاراي 6 ميل جەردە، تەڭىز ۇستىنە قۇلاعان ۇشاقتا ويىنشىلار، كوماندا باسشىلارى مەن جانكۇيەرلەردى قوسا ەسەپتەگەندە 43 ادام بولعان.

*


امستەردامنان شىققان ۇشاق سۋرينام استاناسى پاراماريبو شاھارىنداعى اۋەجايعا قونۋ كەزىندە اپاتقا ۇشىرايدى. بۇل 1989 -جىلدىڭ 7 - ماۋسىمى بولاتىن. كوز جۇمعان 23 فۋتبولشى سۋرينام ۇلتىنىڭ وكىلدەرى. ولار اتاجۇرتىنا تۋرنير اياسىندا جەرگىلىكتى ءۇش كلۋبپەن كەزدەسۋ ءۇشىن كەلە جاتقان. 178 جولاۋشى مەن ەكيپاجدىڭ 9 وكىلىنىڭ ىشىنەن نەبارى 11 ادام ءتىرى قالعان.

*

فۋتبولدان زامبيا قۇراماسىنىڭ 18 اياقدوپ شەبەرى 1993 -جىلدىڭ 27-ساۋىرىندە مەرت بولدى. الەم چەمپيوناتىنا ىرىكتەۋ ماتچتارى اياسىندا سەنەگالمەن كەزدەسۋگە اتتانعان زامبيا قۇراماسىنىڭ ۇشاعى گابون جاعالاۋى ماڭىندا تەڭىزگە قۇلاعان.

*

2008 -جىلدىڭ 24-تامىزىندا بىشكەكتەن (قىرعىزستان) تەگەرانعا ۇشقان «بوينگ 737» اۋە كەمەسى اپات بولىپ، سالدارىنان 90 ادام، ونىڭ ىشىندە ۆولەيبولدان يراننىڭ جاستار قۇراماسىنىڭ 10 وكىلى قازا تاپتى.

*

2009 -جىلعى 15-شىلدەدە ەريەۆانعا اتتانعان دزيۋدودان يراننىڭ جاستار قۇراماسى دا اپاتقا ۇشىرايدى. ولار ارمەنيادا وقۋ- جاتتىعۋ جيىندارىن وتكىزىپ، كەيىننەن ۆەنگريادا وتەتىن جارىسقا قاتىسادى دەپ جوسپارلانعان ەدى. اۋە كەمەسىندەگى 168 ادامنىڭ ەشقايسىسىن امان الىپ قالۋ مۇمكىن بولمادى.

*

2011 -جىلى 7- قىركۇيەكتە رەسەيدىڭ ياروسلاۆل وبلىسىنداعى «تۋنوشنا» اۋەجايىنان اسپانعا كوتەرىلمەك بولعان ياك 42 ۇشاعى اپاتقا ۇشىراپ، مينسكىدەگى ماتچقا بارۋى ءتيىس «لوكوموتيۆ» حوككەي كلۋبىنىڭ وكىلدەرى كوز جۇمدى. ەكەۋى عانا امان قالعان - حوككەيشى الەكساندر گاليموۆ پەن بورتينجەنەر الەكساندر سيزوۆ. الايدا 12-قىركۇيەكتە گاليموۆ ماسكەۋدەگى حيرۋرگيا ينستيتۋتىندا كوز جۇمدى.

*

2015 -جىلدىڭ 9-ناۋرىزى. ارگەنتينانىڭ لا- ريوحا پروۆينتسياسىندا ەكسترەمالدى رەاليتي- شوۋدىڭ ءتۇسىرىلىمى كەزىندە ەكى تىكۇشاق بەتپە- بەت كەلىپ، ناتيجەسىندە ون ادام كوز جۇمدى: جەرگىلىكتى ەكى ۇشقىش پەن فرانتسيانىڭ سەگىز ازاماتى. ال ولاردىڭ ۇشەۋى تانىمال سپورتشىلار: 25 جاستاعى ءجۇزۋشى كاميل ميۋففا، 28 جاستاعى بوكسشى الەكسيس ۆاستەن جانە 57 جاستاعى ياحتاشى فلورانس ارتو.

*

كولۋمبيادا برازيليانىڭ «شاپەكوەنسە» كلۋبى وكىلدەرىنىڭ ءومىرىن جالماعان اپات ءالى ەستە. 2016 -جىلدىڭ 28-قاراشاسىندا بوليۆيانىڭ Lamia كومپانياسىنىڭ Avro RJ85 لاينەرى سانتا- كرۋس- دە- لا- سەررادان شىعىپ، (برازيليا) مەدەلينگە (كولۋمبيا) باعىت العان ەدى. وكىنىشكە قاراي، ۇشاق ءتيىستى جەردەن 18 شاقىرىم قاشىقتىقتا تاۋعا سوعىلادى. بورتتاعى ەكيپاجدىڭ توعىز وكىلى مەن 68 جولاۋشىنىڭ اراسىنان تەك التى ادام ءتىرى قالدى: ەكى ەكيپاج وكىلى - اۆيامەحانيك ەرۆين تۋميري جانە ستيۋاردەسسا حيمەنا سۋارەس، فۋتبولشىلار دانيلو (كەيىننەن اۋرۋحانادا كوز جۇمدى) ، جاكسون فولمان، الان رۋشەل، نەتو جانە رافاەل حەنزەل ەسىمدى جۋرناليست.

اۆتورى: ءمادينا اسىلبەك

www.24.kz


#الةم  
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات