گەرمانيا بيلىگى ەلگە كىرۋ ەرەجەلەرىن كۇشەيتتى
جاڭا شەكتەۋلەر «قاۋىپ- قاتەر اۋماعى» دەپ تانىلعان 20 دان استام مەملەكەتكە قاتىستى قولدانىلادى. بۇل تىزىمدە قازاقستان جوق. وعان ا ق ش، يسپانيا، پورتۋگاليا، ەگيپەت، يزرايل، سونداي- اق بالتىق جاعالاۋى ەلدەرى ەنگەن. گەرمانياداعى جاڭا ەرەجەلەر تۋرالى ەرنات مەلس ۇلى باياندايدى.
ەرنات مەلس ۇلى، ءتىلشى:
- گەرمانياعا «قاۋىپ- قاتەر اۋماعىنان» كەلەتىندەر كوروناۆيرۋس تەستىن كورسەتۋى مىندەتتى. ونى فەدەرالدىق پوليتسيا تەكسەرەدى. سىرتتان كەلگەندەر 10 كۇندىك كارانتيندە بولادى. قازىر فرانكفۋرت پەن ميۋنحەندەگى اۋەجايلاردا جولاۋشىلاردى باقىلاۋ كۇشەيتىلدى. كوروناۆيرۋس مۋتاتسياسى تىركەلگەن ۇلى بريتانيا، يرلانديا، وڭتۇستىك افريكا جانە برازيليادان ورالعاندار تەرىس ناتيجەسى بار انىقتامانى تىركەۋدەن وتپەي تۇرىپ، كورسەتۋى ءتيىس.
يەنس شپان، گەرمانيانىڭ دەنساۋلىق ساقتاۋ ءمينيسترى:
- اۆستراليا، جاپونيا، تايۆان جانە وڭتۇستىك كورەيادا اۋەجايعا كەلگەندەردىڭ ءبارىن تەستىلەۋگە مۇمكىندىك بار. گەرمانيا قۇرلىقتىڭ ورتاسىندا ورنالاسقان عوي. بىزدە شەكارا اشىق تۇر. مىسالى، گەرمانيا مەن نيدەرلاند اراسىندا مىڭداعان ادام قاتىناپ ءجۇر. ءبىراق وڭ وزگەرىس بايقالادى.
ساراپشىلار گەرمانيادا بريتانيالىق، وڭتۇستىكافريكالىق جانە برازيليالىق شتامم تىركەلدى دەپ دابىل قاقتى. ساياساتكەرلەر قوسىمشا شارالار ەنگىزۋدى جالعاستىردى. ماسەلەن، بۇدان بىلاي تۇرعىندار قوعامدىق ورىندار مەن دۇكەندەردە تەك بەتپەردەمەن ءجۇرۋى ءتيىس. بۇرىنعىداي بەتتى ورامالمەن تۇمشالاۋعا بولمايدى. بەتپەردە ءتارتىبىن بۇزعاندارعا 500 ەۋروعا دەيىن ايىپپۇل سالىنادى.
رەزا اماري، فەدەرالدىق پوليتسيا وكىلى:
- ىندەت الەمدە تارالىپ جاتىر. بيزنەسپەن اينالىساتىن جانە ناقتى ءىسى بار ادامدار ءالى ساپاردا ءجۇر. ءبىراق ءبىز مۇنداي ءجۇرىس- تۇرىستى شەكتەۋگە شاقىرامىز.
ەلدە ىندەت ازايسا، 14-اقپاننان كەيىن شەكتەۋلەر الىنۋى مۇمكىن. ءبىراق ءازىر 3 اپتا بويى مەيرامحانالار، باسسەيندەر، مەكتەپتەر جابىق بولادى. جاقىندا جۇرگىزىلگەن ساۋالناماعا قاتىسقانداردىڭ %69 ءى كارانتيننىڭ ۇزارتىلعانىن قولداپتى.
اۆتورلارى: ەرنات مەلس ۇلى، شولپان نايمانبايەۆا
www.24.kz