ءۇندىستاندا سيىر قۇقىن قورعايتىن جاڭا زاڭدى بۇزعان العاشقى ادام قاماۋعا الىندى
جۇرگىزۋشى ءوز جۇك كولىگىمەن ءىرى قارا مالدى تاسىمالداعان ەكەن. ۇندىلەر دىنىندە سيىر قاسيەتتى جانۋار سانالادى. بەلسەندىلەر «كولىك جۇرگىزۋشى سيىرلاردى قورلادى» دەپ ساناپ، ونى تاياققا جىققان. قاتتى جاراقاتتانعان ول اۋرۋحانادا جاتىر. ءبىراق جازىلعاننان كەيىن سوت الدىندا جاۋاپ بەرۋى ءتيىس.
2020 - جىلدىڭ ورتاسىندا قابىلدانعان زاڭعا حالىقتىڭ ءبىرازى قارسىلىق تانىتقان ەدى. ونسىز دا ۇندىلەر دىنىندە قاسيەتتى سانالاتىن سيىرلار تالاي جانجال تۋدىردى. سوڭعى 4 جىلدا سيىردى سويعان 30 داي مۇسىلمان قازا تاپتى. ۇكىمەت بۇل زاڭ وسىنداي قاقتىعىستاردى بولدىرمايدى دەپ ۇمىتتەندى. الايدا ادام قۇقىقتارىن قورعاۋشىلاردان بولەك، اتالعان زاڭعا فەرمەرلەر دە قارسى شىقتى.
كامىليت ەداتوديكا، فەرمەر:
- ەندى اۋىل شارۋاشىلىعىمەن اينالىسۋعا قورقىپ، زور شىعىنعا باتىپ وتىرمىن. مەن مالدى ازاپقا سالمايمىن، سيىرلارىمدى جاقسى كۇتەمىن، تەك ءسۇتىن عانا ساۋامىن. ءبىراق مەنىمەن ارازداسقان بىرەۋ ماعان جالا جاپسا، بىردەن قاماۋعا الادى. ءوز شتاتىمىزدا ءبىز نارازىلىق شارالارىن وتكىزدىك، ويتكەنى دىنگە دە دۇرىس اقىلمەن قاراۋ كەرەك.
زاڭ بويىنشا العاشقى بولىپ كارناتاكا شتاتىنىڭ تۇرعىنىنا ايىپ تاعىلدى. قوعام بەلسەندىلەرى ول سيىرلاردى قاۋىپسىزدىك شارالارىن ساقتاماي تاسىمالداعان دەپ ساناعان. جۇرت پوليتسيانى كۇتپەي، ونى تاياققا جىقتى. قازىر ول اۋرۋحانادا جاتىر. كەيىن ءۇش جىلعا سوتتالىپ، بىرنەشە مىڭ دوللار مولشەرىندە ايىپپۇل تولەۋى مۇمكىن.
فارۋح تاپا، جانۋارلاردى قورعاۋ قوزعالىسىنىڭ بەلسەندىسى:
- جاڭا زاڭ تاربيەگە جاقسى سالادى دەپ سانايمىز. ءبىرىنشى رەت ۇستالسا، بىرنەشە جىل تۇرمەدە وتىرىپ، 7 مىڭ دوللارعا دەيىن ايىپپۇل تولەيدى. ال قىلمىسىن قايتالاسا، جەتى جىلعا بوستاندىعىنان ايىرىلىپ، 13 مىڭ دوللار تولەيدى.
جەرگىلىكتى بيلىك داۋعا ۇلاسقان ءىس بويىنشا تۇسىنىك بەرگەن جوق. شتات پوليتسياسى كۇشتى اسىرا قولدانعان بەلسەندىلەردىڭ ارەكەتىنە دە قۇقىق تۇرعىسىنان باعا بەرەتىنىن مالىمدەدى. الايدا بيلىك بۇل زاڭدى وزگەرتپەيتىنىن مالىمدەدى.