زەينەتاقى جيناعىن باسپاناعا جۇمساۋ: باستى سۇراقتاردىڭ جاۋابى

نۇر- سۇلتان. قازاقپارات - ورتالىق كوممۋنيكاتسيالار قىزمەتىنىڭ الاڭىندا بۇگىن زەينەتاقىنىڭ ءبىر بولىگىن باسپاناعا جۇمساۋ ماسەلەسىنە قاتىستى باسپا ءسوز ءماسليحاتى ءوتتى.

يندۋستريا جانە ينفراقۇرىلىمدىق دامۋ مينيسترلىگىنىڭ وكىلدەرى مەن «وتباسى بانك» باسشىلارى جيىندا كوپتىڭ كوكەيىندە جۇرگەن باستى سۇراقتارعا جاۋاپ بەردى. وسى رەتتە قازاقپارات ءتىلشىسى وقىرمان قاۋىمعا بۇل باعلارلاماعا قاتىستى باعىت- باعدار بەرەر نەگىزگى ءارى ماڭىزدى مالىمەتتەر لەگىن ۇسىنادى.

زەينەتاقى جيناعىنىڭ ءبىر بولىگىن قانداي جاعدايدا پايدالانۋعا بولادى؟

قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى ەركەبۇلان داۋىلبايەۆ:

- ازاماتتار وزدەرىنىڭ زەينەتاقى جيناقتارىنىڭ ءبىر بولىگىن: - كەپىلدىك بولعان كەزدە تۇرعىن ءۇي قۇرىلىسىنا ۇلەستىك قاتىسۋ تۋرالى شارتتار بويىنشا تۇرعىن ءۇي ساتىپ الۋ كەزىندە نەمەسە ا ك ت بولعان كەزدە كوپپاتەرلى تۇرعىن ۇيدەگى ۇلەستى بەرۋ تۋرالى شارت جاساسۋ كەزىندە؛

- جەر ۋچاسكەسىن ساتىپ الۋدى قوس العاندا جەكە تۇرعىن ءۇي سالۋ ءۇشىن تولىق ەسەپ ايىرىسۋ كەزىندە؛

- يپوتەكالىق قارىز الۋ، تۇرعىن ءۇيدى ساتىپ الۋ، بەرەشەكتى وتەۋ، بانكتەر ارقىلى يپوتەكانى قايتا قارجىلاندىرۋ ءۇشىن باستاپقى جارنا رەتىندە؛

- تۇرعىن ءۇي قۇرىلىسى جيناقتارى جۇيەسى بويىنشا جەر ۋچاسكەسىن ساتىپ الا وتىرىپ، تۇرعىن ءۇي ساتىپ الۋعا نەمەسە جەكە تۇرعىن ءۇي سالۋعا ارنالعان يپوتەكا بويىنشا بەرەشەكتى الۋ، قايتا قارجىلاندىرۋدى وتەۋ كەزىندە؛

- يسلام بانكىنىڭ قارجىلاندىرۋى شەڭبەرىندە ءۇي ساتىپ الۋ جانە وسىنداي قارجىلاندىرۋ بويىنشا بەرەشەكتى وتەۋ كەزىندە؛

- تۇرعىن ءۇي قۇرىلىسى جانە داعدارىسقا قارسى باعدارلامالار شەڭبەرىندە ساتىپ الۋ قۇقىعىمەن بەرىلگەن باسپانانى ۇزاق مەرزىمدى جالداۋ شارتتارى بويىنشا بەرەشەكتى وتەۋ ءۇشىن پايدالانۋىنا رۇقسات ەتىلەدى. سونىمەن قاتار تۇرعىن ءۇيدى جوندەۋ جۇمىستارىنا ءبىر بانكتەن يپوتەكالىق قارىز العان كەزدە پايدالانۋعا جول بەرىلەدى.

ءوتىنىم ناقتى قاي كۇننەن باستاپ قابىلدانادى؟

«وتباسى بانك» ا ق باسقارما ءتوراعاسى ءلاززات يبراگيموۆا:

- ءبىز باعدارلامانىڭ باستالۋىن تاعاتسىزدانا كۇتىپ وتىرمىز. ەرتەڭ ساعات 09.00-دە، ياعني جۇمىس بولمايتىن سەنبى كۇنى ءوتىنىم قابىلداي باستايمىز. ءبىز دەمالىس كۇنىن ارنايى تاڭداپ الدىق. ۋاقىتتىڭ ادامداردىڭ ءبارى ءوتىنىم بەرە الاتىنداي ىڭعايلى بولۋىن كوزدەدىك.

ءوتىنىمدى قايدا جولداۋ كەرەك؟

«وتباسى بانك» ا ق باسقارما ءتوراعاسى ءلاززات يبراگيموۆا:

- سايتتىڭ اتىن العاش رەت جاريا ەتەيىن. ول - enpf-otbasy.kz. بۇل – ب ج ز ق- مەن ءبىزدىڭ بىرلەسە اتقارعان اسا اۋقىمدى جۇمىسىمىز. 2020 -جىلدان بەرى وسى اۋقىمدى جۇمىستى بىرلەسە اتقارىپ كەلەمىز. سول سەبەپتى سايتتىڭ اتاۋىندا ەكى ورگاننىڭ دا اتىن ەنگىزۋدى ءجون دەپ شەشتىك. قازىر وعان كىرسەڭىز، سەرۆيستىڭ 23-قاڭتاردان ساعات 09.00 دە جۇمىستى باستايتىنى جازىلىپ تۇر. سەرۆيس تولىعىمەن دايىن. كەشە رەداكسيالىق وزگەرىستى ەنگىزدىك.

زەينەتاقىنى الۋعا ءوتىنىم بەرۋدەن باستاپ پايداعا جاراتۋعا دەيىنگى الگوريتم قانداي؟

«وتباسى بانك» ا ق ورتالىق فيليالىنىڭ ديرەكتورى جانسۇلتان ماتايەۆ:

- وسى باعدارلاماعا قاتىسقىسى كەلەتىن ازاماتتار ءبىرىڭعاي زەينەتاقى جيناعى قورىنداعى ءوزىنىڭ جيناعىن ەسەپتەۋى كەرەك. ودان كەيىن «وتباسى بانكىندە» نەمەسە ءوز قالاۋى بويىنشا ەكىنشى دەڭگەيلى بانكتەردەن ارنايى شوت اشۋى كەرەك. ءۇشىنشى قادام: ەرتەڭ، ياعني 23-قاڭتاردان ساعات تاڭەرتەڭگى 09.00-دە «وتباسى بانكتە» پورتالى اشىلادى. سول پورتالعا ازاماتتار ءوزىنىڭ ەلەكتروندى قولتاڭباسى ارقىلى كىرەدى. ول پورتالعا ازاماتتار جەتكىلىكتى دەڭگەيدەن ارتىق سومانى قاي ماقساتقا پايدالاناتىنىن كورسەتىپ، ءوتىنىم بەرەدى. ال ءوتىنىم زەينەتاقى قورىنا جولدانادى. بەس كۇننىڭ ىشىندە ول جاقتان جاۋاپ كەلىپ، ماقۇلدانعاننان كەيىن ازامات «وتباسى بانكتىڭ» پورتالى ارقىلى راستايتىن قۇجاتتاردى تىركەپ، ارنايى ەسەپشوتىنداعى اقشانى ءوزى كورسەتكەن رەكۆيزيتتەر بويىنشا ساتىپ الۋشىعا، نە بولماسا يپوتەكانى وتەۋگە جولدايدى.

قازىرگى جەكە ءۇيىمدى جوندەۋ ءۇشىن زەينەتاقىنىڭ ءبىر بولىگىن الا الام با؟

«وتباسى بانك» ا ق ورتالىق فيليالىنىڭ ديرەكتورى جانسۇلتان ماتايەۆ:

- ەرەجەگە سايكەس، ازاماتتار مەنشىگىندەگى ءۇيدى جوندەۋگە قاراجاتتى جۇمساۋعا مۇمكىندىگى جوق. تەك ساتىپ العان ءۇيىنىڭ جوندەۋ جۇمىسىنا عانا زەينەتاقىنىڭ ءبىر بولىگىن الۋعا رۇقسات ەتىلەدى.

زەينەتاقىنىڭ ءبىر بولىگىن دەپوزيتكە اۋدارۋعا بولا ما؟

«وتباسى بانك» ا ق ورتالىق فيليالىنىڭ ديرەكتورى جانسۇلتان ماتايەۆ:

- بەكىتىلگەن ەرەجەلەرگە سايكەس، زەينەتاقىنىڭ شەكتى مولشەرىنەن ارتىق سومانى دەپوزيتكە سالىپ قويۋعا رۇقسات جوق. ول سومانى العاشقى جارنا رەتىندە ەگەر ءسىز تۇرعىن ءۇي جيناق جۇيەسىنە قاتىسپاي، بىردەن كەرەكتى سومانىڭ 50 پايىزى رەتىندە سالىپ، ءۇي الۋىڭىزعا بولادى. ءبىراق ول اقشانى الىپ، دەپوزيت رەتىندە ءوسىرىپ، مەملەكەتتىك سىياقىنى الام دەۋگە مۇمكىندىك جوق.

زەينەتاقى قاراجاتىن الۋدا تۇرعىن ءۇيدى 5 جىلعا دەيىن ساتۋعا تىيىم سالۋ ءتارتىبى قانداي؟ قۇرىلىس جانە تۇرعىن ءۇي- كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى ەركەبۇلان داۋىلبايەۆ:

- سۇراق وتە ماڭىزدى. ويتكەنى بۇل - كوپ ادامنىڭ كوكەيىندە جۇرگەن اڭگىمە. بۇگىنگى بەكىتىلگەن ەرەجەگە سايكەس، بەس جىلدىق شەكتەۋ تەك ءبىر جولعى زەينەتاقى تولەمىن پايدالانا وتىرىپ، مەنشىككە رەسىمدەلگەن، وتەلمەگەن بەرەشەگى بار يپوتەكالىق تۇرعىن ءۇيدى ساتۋعا جول بەرىلمەيدى. تەك يپوتەكاعا، زايمعا الىنعان ۇيلەر. ونىڭ ىشىندە دە 2021 -جىلعى 1 -قاڭتاردان بەرى، ەرەجە كۇشىنە ەنگەن ۋاقىتتان كەيىنگى العان يپوتەكاعا بايلانىستى بولادى. قالعان بارلىق جاعدايدا ەشقانداي شەكتەۋ جوق. ياعني ەگەر ءسىز تۇرعىن ءۇيدى وزىڭىزگە جەكە مەنشىككە ساتىپ الاتىن بولساڭىز (ب ج ز ق- داعى قاراجاتىڭىزعا) كەز كەلگەن ۋاقىتتا قايتا ساتۋعا قۇقىعىڭىز بار.

زەينەتاقى قارجىسىن ەمدەلۋگە الۋ ەرەجەلەرى قاشان جاريالانادى؟

«وتباسى بانك» ا ق باسقارما ءتوراعاسى ءلاززات يبراگيموۆا:

ەمدەلۋگە جۇمساۋ جونىندە ايتار بولساق، ءبىز ازىرگە تەك ءبىرىڭعاي وپەراتور فۋنكتسياسىن اتقارۋعا كەلىسىم بەردىك. سول سەبەپتى ۇكىمەت قاۋلىسىندا ەمدەلۋگە بايلانىستى تولەمنىڭ ءبارى «وتباسى بانك» ارقىلى وتەتىنى ناقتى جازىلعان. بۇل ەرەجەلەر وسى ايدىڭ سوڭىنا دەيىن دايىن بولادى. قازىرگى تاڭدا ىشكى نورماتيۆ پروتسەدۋرالارىنا سايكەس، بۇل ماسەلە مەملەكەتتىك ورگاندارمەن تالقىلانىپ جاتىر. سودان كەيىن دەنساۋلىق ساقتاۋ ءمينيسترىنىڭ بۇيرىعىن ادىلەت مينيسترلىگىنە تىركەۋ كەرەك.

- تۋىس ادامدار زەينەتاقى جيناعىنا ءبىر- بىرىنەن ءۇي ساتىپ السا بولا ما؟

«وتباسى بانك» اق باسقارما ءتوراعاسى ءلاززات يبراگيموۆا :

- ەڭ باستىسى، وپەراتسيانىڭ ءبارى قولما- قول اقشاسىز جۇرگىزىلەتىنىن اتاپ ءوتۋ كەرەك. الدامشى كەلىسىمشارتتاردىڭ الدىن الىپ، اقشانى امالداپ الىپ شىعۋ جاعدايىنا جول بەرمەس ءۇشىن تۋىسقان ادامدار اراسىنداعى كەلىسىمشارتتارعا تىيىم سالىنادى. ياعني، مەن ءوزىمنىڭ باۋىرلارىمنان، سىڭلىلەرىمنەن، اتامنان نەمەسە اجەمنەن ءۇي نەمەسە پاتەر ساتىپ الا المايمىن. وسىلايشا، ەرەجەلەردە بۇكىل مەحانيزم جازىلعان.