كوروناۆيرۋس جۇقتىرعان مەيرامبەك بەسبايەۆ قازاقستاندىقتاردى ساق بولۋعا شاقىردى

الماتى. قازاقپارات - قازاقستاننىڭ ەڭبەك سىڭىرگەن قايراتكەرى، «مۋزارت» توبىنىڭ ءانشىسى مەيرامبەك بەسبايەۆ ءوزىنىڭ دەنساۋلىعى تۋرالى ايتتى، دەپ حابارلايدى قازاقپارات ءتىلشىسى.

«ەڭ اۋەلى ەمىمە شيپا بەرىپ، ەل قاتارىنا قايتا قوسقان اللاعا سانسىز شۇكىرلىك. مەنىڭ تىلەۋىمدى تىلەپ وتىرعان اتا- اناما، وتباسىما، باۋىرلارىما، ونەردەگى اعا- اپكەلەرىمە، دوستارىما مىڭ العىس. ەس بىلگەلى بەرى ەلىم الاقانىنا سالىپ الديلەپ كەلەدى. قادىرلى اعايىن، سىزدەردىڭ تىلەكتەرىڭىزگە باسىمدى ءيىپ راحمەتىمدى ايتامىن. اق حالاتتى ابزال جاندارعا العىسىم شەكسىز» - دەپ جازدى ءانشى Instagram -داعى پاراقشاسىندا.

سونداي- اق، ول قازاقستاندىقتاردى ساقتانۋعا جانە دەنساۋلىقتارىن كۇتۋگە شاقىردى.

«اينالايىن اعايىن، ىندەتتىڭ بارى راس. ساقتانىڭىزدار. كۇتىنىڭىزدەر. ءبىرىنشى بايلىق دەنساۋلىق ەكەنىن ەستە ۇستايىقشى. قورىتا كەلە، مەن ءۇشىن الاڭداعان بارشاڭىزعا راحمەت. مەن سىزدەردى جاقسى كورەمىن. اۋىرماڭىزدار»، - دەدى ول.

بۇعان دەيىن مەيرامبەك بەسبايەۆتىڭ كوروناۆيرۋسپەن اۋرۋحاناعا تۇسكەنىن حابارلاعان بولاتىنبىز.

اۆتور: الما مۇقانوۆا