قاۋىپتى ىندەت «قۇتىرا» باستادى

نۇر -سۇلتان. قازاقپارات - كوروناۆيرۋس ينفەكسياسىن جۇقتىرۋ دەرەگىمەن «قىزىل ايماقتا» «قوناقتاعان» وڭىردە قاۋىپتى ىندەتتىڭ قاۋپى قايتا كۇشەيىپ تۇر.

وبلىستىق سانيتارلىق- ەپيدەميالىق باقىلاۋ دەپارتامەنتى باسپا ءسوز قىزمەتىنىڭ مالىمەتىنشە، وتكەن جىلعى 28-ناۋرىزدان بيىلعى 20-قاڭتارعا دەيىن كوروناۆيرۋس ينفەكسياسىنىڭ 15186 جاعدايى تىركەلدى. ونىڭ ىشىندە 4210 ناۋقاستا قاۋىپتى ۆيرۋستىڭ سيمپتومدى ءتۇرى بار. ال 10976 ناۋقاس سيمپتومسىز تۇرىنە شالدىعىپ وتىر.

اسىرەسە اتىراۋ قالاسى مەن جىلىوي اۋدانىنداعى «تەڭىز» كەنىشىندە ىندەتتى جۇقتىرۋشىلار قاتارى كۇن سايىن كوبەيىپ جاتىر. قازىر وبلىس ورتالىعىندا - 6369، جىلىوي اۋدانىندا 6 708 ناۋقاس تىركەلگەن. ال «تەڭىز» كەن ورنىنداعى مەردىگەر مەكەمەلەردىڭ 5467 جۇمىسشىسى، جىلىوي اۋدانىنىڭ ورتالىعى قۇلسارى قالاسىندا 1241 ناۋقاس بار. سونداي-اق يندەر اۋدانىندا - 406، يساتايدا - 262، قىزىلقوعادا - 487، قۇرمانعازىدا - 385، ماقاتتا - 310، ماحامبەت اۋدانىندا 259 ادامنىڭ قاۋىپتى ىندەتتىڭ «قۇرىعىنا» ىلىنگەنى بەلگىلى بولىپ وتىر.

وسى دەرەكتىڭ وزىنەن كوروناۆيرۋس ينفەكسياسىنىڭ مۇنايلى وڭىردەگى اۋداننىڭ بارىندە تارالعانىن بايقاۋعا بولادى. ماسەلەن، 20-قاڭتارداعى مالىمەتكە قاراعاندا، تاعى 82 ادامنان كوروناۆيرۋس انىقتالدى. ناۋقاستاردىڭ اراسىندا اتىراۋ قالاسىنان 16 ادام بار.

«تەڭىز» كەنىشىندە - 58 جۇمىسشى، قۇلسارى قالاسىنان - 3، يندەر اۋدانىنان - 1، قىزىلقوعادان - 1، قۇرمانعازى اۋدانىنان 3 ادام كوروناۆيرۋسقا شالدىققان. ونىڭ ىشىندە 11 ادام دەنساۋلىق جاعدايىنا بايلانىستى مەديتسينالىق كومەككە جۇگىنسە، 63 ناۋقاستان COVID-19 سكرينيگتەن ءوتۋ كەزىندە تابىلىپتى. سونداي- اق 8 ادام قاۋىپتى ۆيرۋس جۇقتىرعان ناۋقاسپەن قارىم-قاتىناستا بولعان ەكەن.

دەگەنمەن وبلىس اكىمى ماحامبەت دوسمۇحامبەتوۆ ەپيدەميالىق جاعدايدى تۇراقتى دەپ ەسەپتەيدى. اكىمنىڭ ايتۋىنشا، وتكەن اپتادا كوروناۆيرۋس ينفەكسياسىنىڭ 564 جاعدايى تىركەلدى. ونىڭ ىشىندە 379 جاعداي، ياعني 67 پايىزى «تەڭىز» كەن ورنىنداعى ۆاحتالىق قالاشىقتاردا انىقتالدى. وبلىستا تىركەلگەن ىندەتتىڭ 81 پايىزى، سونىمەن قاتار «تەڭىز» كەن ورنىندا انىقتالعان جاعدايدىڭ 89 پايىزى سيمپتومسىز سانالادى. رەپرودۋكتيۆتىك يندەكسى 1،01 پايىزدى قۇرايدى. قازىر وبلىستىڭ باس سانيتار دارىگەرىنىڭ قاۋلىسىمەن «تەڭىز» كەن ورنىنداعى كارانتين مەرزىمى ۇزارتىلىپ، شەكتەۋ شارالارى كۇشەيتىلدى.

- وڭىردە 1933 ينفەكسيالىق توسەكتىك ورىن ازىرلەندى. اۋرۋحانالاردا 4 م ر ت، 12 كومپيۋتەرلىك توموگرافيا، 27 رەنتگەن، 267 وكپەنى جاساندى جەلدەتۋ اپپاراتتارى، 669 وتتەگى كونسەنتراتى، 1 514 پۋلسوكسيمەتر، 6 وتتەگى ستانساسى، 113 جەدەل مەديتسينالىق جاردەم كولىگى، 7 -جىلجىمالى مەديتسينالىق كەشەن بار. كوروناۆيرۋس پنيەۆمونياسى مەن ج ر ۆ ي- مەن سىرقاتتانعان ناۋقاستارعا امبۋلاتورلىق دەڭگەيدەگى مەديتسينالىق كومەكتى 126 موبيلدى توپ كورسەتىپ وتىر. بارلىق مەديتسينالىق مەكەمەدە جەكە قورعانىش قۇرالدارىنىڭ 2-ايلىق قورى بار.

سونداي-اق تاۋلىگىنە 7 مىڭعا جۋىق زەرتتەۋ جۇرگىزەتىن 11 پ ت ر زەرتحاناسى جۇمىس ىستەپ تۇر. ىندەت باستالعاننان بەرى وبلىستا 575 مىڭ زەرتتەۋ جۇرگىزىلدى. سوڭعى اپتادا ورتاشا تاۋلىكتىك كورسەتكىش 3975 تەستىنى قۇرادى. بيىلعى قاڭتاردا جۇرگىزىلگەن پ ت ر زەرتتەۋلەردىڭ سانى وتكەن جىلدىڭ جەلتوقسانداعى كورسەتكىشپەن سالىستىرعاندا 23 پايىزعا ارتىپ وتىر، - دەيدى م. دوسمۇحامبەتوۆ.

« قىزىل ايماقتاعى» اتىراۋدا كوروناۆيرۋس ينفەكسياسى نەگە ءورشي بەرەدى؟ ارينە بۇل ساۋال جەرگىلىكتى اتقاۋشى بيلىكتى عانا ەمەس، تۇرعىنداردى دا مازالايتىنى داۋسىز. دارىگەرلەردىڭ ايتۋىنشا، بۇعان جاسىرىن وتكىزىلەتىن وتباسىلىق شارالاردىڭ اسەرى ءتيىپ وتىر. وسى ورايدا ۇكىمەت جانىنداعى كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ مالىمەتىنە سۇيەنسەك، بيىلعى 1-10-قاڭتاردا موبيلدىك توپتار 903 رەيد جۇرگىزىپ، 3769 نىساندى تەكسەردى. رەيد كەزىندە سانيتاريالىق- ەپيدەميالىق، كارانتيندىك شەكتەۋ تالاپتارىن بۇزۋدىڭ 28 دەرەگى انىقتالدى. ماسەلەن، قىزىلقوعا اۋدانىندا وتباسىلىق ءىس- شارالاردى وتكىزۋگە تىيىم سالىنعانىنا قاراماستان، وسى كۇندەرى ەكى ۇيلەنۋ تويى وتكىزىلىپتى. ال اتىراۋ قالاسىندا باس مەملەكەتتىك سانيتارلىق دارىگەردىڭ قاۋلىسىنا سايكەس قىزمەتىنە تىيىم سالىنعان «رەگيونبەت» لوتو كلۋبى كەلۋشىلەردى جاسىرىن قابىلداعانى بەلگىلى بولدى.

سونداي- اق جىلىوي اۋدانىنداعى «تەڭىز» ۆاحتالىق قالاشىعىندا بەتپەردە رەجىمىن ساقتاماۋدىڭ 2، بەكىتىلگەن جۇمىس رەجىمىن بۇزۋدىڭ 1 دەرەگى انىقتالدى. وسىنداي دەرەككە قاتىستى 22 ماتەريال ءالى قارالىپ جاتىر. موبيلدى توپتار مەن جەرگىلىكتى پوليتسيا دەپارتامەنتىنەن تۇسكەن ماتەريالدارعا قاتىستى «اكىمشىلىك قۇقىق بۇزۋشىلىق تۋرالى» كودەكسىندەگى 425-بابىنىڭ 1-بولىگىنە سايكەس جالپى سوماسى 547975 تەڭگەنىڭ 6-ايىپپۇلى سالىندى.

قازىر رەسەي فەدەراتسياسىمەن شەكاراداعى قۇرمانعازى اۋدانىندا سانيتارلىق- كارانتيندىك بەكەت جۇمىس ىستەيدى. مۇندا تاۋلىك بويى ادامداردىڭ ەل اۋماعىنا كىرۋىنە مونيتورينگ جۇرگىزىلەدى. سونداي- اق شەكارادان انىقتاماسى جوق قازاقستان ازاماتتارى پ ت ر- تەستتەن وتەدى. كارانتيندىك شەكتەۋ شارالارى ەنگىزىلگەننەن بەرى اتىراۋ وبلىسىنا 18526 ادام كەلگەن. شەكارادان وتۋشىلەرگە 2 128 پ ت ر زەرتتەۋ جۇرگىزىلدى. سونىڭ ناتيجەسىندە كوروناۆيرۋس ينفەكسياسىنىڭ 9 جاعدايى انىقتالدى. پ ت ر- تەست وتكىزۋ ءۇشىن كارانتيندىك ستاتسيونارلارعا ەلىمىزدىڭ 273 ازاماتى ورنالاستىرىلدى. ەل اۋماعىنا 246 شەتەلدىك ازامات جىبەرىلگەن جوق.

اتالعان بەكەتتەن سوڭعى ءبىر تاۋلىكتە قازاقستاننىڭ 82 ازاماتى وتكەن. ونىڭ ىشىندە 17 جاياۋ جۇرگىنشى، جۇك كولىكتەرىنىڭ 65 جۇرگىزۋشىسى بار. پ ت ر- تەست جاسالعان 11 ادامدا زەرتتەۋ قورىتىندىسى تەرىس ناتيجە كورسەتىپتى. الايدا رەسەي فەدەراتسياسىنىڭ ءبىر ازاماتىندا پ ت ر- تەست ناتيجەسى تۋرالى انىقتاماسى بولماعان. سول سەبەپتەن وعان شەكارادان وتۋگە تىيىم سالىندى.

اتىراۋ وبلىسى

egemen.kz