زەينەتاقى جيناعىن باسپانا ءۇشىن پايدالانۋ ەرەجەلەرى جاريالاندى

None
None
نۇر-سۇلتان. قازاقپارات - ق ر يندۋستريا جانە ينفراقۇرىلىمدىق دامۋ مينيسترلىگى زەينەتاقى تولەمدەرىن تۇرعىن ءۇي جاعدايلارىن جاقسارتۋ ءۇشىن پايدالانۋ ەرەجەلەرىن جاريالادى، دەپ حابارلايدى قازاقپارات.

21- قاڭتار كۇنى بەكىتىلگەن قۇجاتتىڭ تولىق ءماتىنى zan.gov.kz سايتىندا ورنالاستىرىلدى.

تۇرعىن ءۇي جاعدايىن جاقسارتقىسى كەلەتىندەر ءبىرجولعى زەينەتاقى تولەمىن كەلەسى ماقساتتارعا پايدالانا الادى:

- تۇرعىن ءۇيدى ساتىپ الۋ-ساتۋ، جەكەشەلەندىرۋ، ءبولىپ تولەۋ، ايىرباستاۋ (ايىرباس جاساۋ) شارتتارى بويىنشا، تۇرعىن ءۇي قۇرىلىسىنا ۇلەستىك قاتىسۋ تۋرالى زاڭناماعا سايكەس تۇرعىن ءۇي قۇرىلىسىنا ۇلەستىك قاتىسۋ تۋرالى شارتتار بويىنشا؛

- جەكە تۇرعىن ءۇي سالۋ ءۇشىن (نىسانالى ماقساتى بار جەر ۋچاسكەسىن ساتىپ الۋدى قوسا العاندا - جەكە تۇرعىن ءۇي قۇرىلىسى نەمەسە جەكە قوسالقى شارۋاشىلىق) تولىق ەسەپ ايىرىسۋ؛

- يپوتەكالىق تۇرعىن ءۇي قارىزىن الۋ ءۇشىن باستاپقى جارنا ەنگىزۋ؛

- تۇرعىن ءۇي قارىزدارىن ءىشىنارا نەمەسە تولىق وتەۋ، يپوتەكالىق تۇرعىن ءۇي قارىزىن قايتا قارجىلاندىرۋ؛

- يپوتەكالىق تۇرعىن ءۇي قارىزىن ءىشىنارا نەمەسە تولىق وتەۋ، تۇرعىن ءۇي قۇرىلىس جيناقتارى جۇيەسى بويىنشا جەكە تۇرعىن ءۇي سالۋ (نىسانالى ماقساتى بار جەر ۋچاسكەسىن ساتىپ الۋدى قوسا العاندا - جەكە تۇرعىن ءۇي قۇرىلىسى نەمەسە جەكە قوسالقى شارۋاشىلىق)، تۇرعىن ءۇي قارىزىن الۋ؛

- يسلام بانكىنىڭ قارجىلاندىرۋى شەڭبەرىندە تۇرعىن ءۇيدى ساتىپ الۋ، يسلام بانكىنىڭ تۇرعىن ءۇي ساتىپ الۋ جونىندەگى مامىلەنى قارجىلاندىرۋى شەڭبەرىندە بەرەشەكتى ءىشىنارا، تولىق وتەۋ؛

- تۇرعىن ءۇي قۇرىلىسى باعدارلامالارى مەن داعدارىسقا قارسى باعدارلامالار شەڭبەرىندە بەرىلگەن ساتىپ الۋ قۇقىعىمەن تۇرعىن ءۇيدى ۇزاق مەرزىمدى جالداۋ شارتتارى بويىنشا بەرەشەكتى ءىشىنارا نەمەسە تولىق وتەۋ.

ايتا كەتەيىك، ق ر ازاماتتارى ءبىرجولعى زەينەتاقى تولەمدەرىن اتالعان ماقساتتارعا شەكتەۋسىز پايدالانا الادى. سونداي-اق ءبىرجولعى زەينەتاقى تولەمىن الۋشىنىڭ جۇبايى (زايىبى) جانە (نەمەسە) جاقىن تۋىستارى اتىنان ءوتىنىش بەرۋشىگە (- لەرگە) تيەسىلى ءبىرجولعى زەينەتاقى تولەمدەرىن اتالعان ماقساتتارعا پايدالانۋعا رۇقسات بەرىلگەن.

ول ءۇشىن تاراپتار جەكە كابينەتتە ءبىرجولعى زەينەتاقى تولەمدەرىن بەرۋ تۋرالى كەلىسىم جاساسادى.

كەلىسىم ولاردىڭ ە ت س ق نەمەسە نەكەنى (ەرلى-زايىپتىلىقتى) نەمەسە تۋىستىق قاتىناستاردى راستايتىن قۇجاتتاردى قوسا بەرە وتىرىپ، ۋاكىلەتتى وپەراتوردىڭ ىشكى قۇجاتىندا بەلگىلەنگەن وزگە دە ەلەكتروندىق تاسىلمەن كۋالاندىرىلادى.

ءمالىم بولعانداي، جەكە مەنشىكتە تۇرعىن ءۇيدىڭ بولۋى ءبىرجولعى زەينەتاقى تولەمىن پايدالانۋعا رۇقسات بەرۋدەن باس تارتۋ ءۇشىن نەگىز بولا المايدى. الايدا، زەينەتاقى شوتىنداعى قاراجات قولما- قول اقشا رەتىندە بەرىلمەيدى.

ەسكەرتىلىپ وتكەندەي، جىلجىمايتىن مۇلىكتى ءوزىنىڭ جۇبايىنان (زايىبىنان)، جاقىن تۋىستارىنان ساتىپ الۋعا بولمايدى. بۇدان بولەك، قازاقستان رەسپۋبليكاسىنىڭ زاڭناماسىندا كوزدەلگەن تارتىپپەن سوت شەشىمى بويىنشا جىلجىمايتىن مۇلىكتى وتكىزۋ جاعدايلارىن قوسپاعاندا، ءبىرجولعى زەينەتاقى تولەمدەرىن پايدالانا وتىرىپ 5 (بەس) جىل ىشىندە مەنشىككە رەسىمدەلگەن جىلجىمايتىن مۇلىكتى وتكىزۋگە جول بەرىلمەيدى.

ەسكە سالساق، 2- قاڭتاردا ق ر پرەزيدەنتى زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتار زەينەتاقى جيناقتارىن پايدالانا الۋ ءۇشىن «جەتكىلىكتىلىك شەگى» بەلگىلەندى.

زەينەتاقى شوتىنداعى قاراجاتتى جانە تۇرعىن ءۇي جاعدايىن جاقسارتۋ ءۇشىن پايدالانۋعا بولاتىن سومانى بىرنەشە جولمەن تەكسەرۋگە بولادى. ب ج ز ق- داعى قاراجاتىن كىمدەر جانە قالاي پايدالانا الاتىنى بۇعان دەيىن حابارلاندى.

سوڭعى جاڭالىقتار