ايدا بالايەۆا: وتاندىق تەلەۆيزيانىڭ كونتەنتى مەن ساپاسىن كۇشەيتۋ كەرەك
بۇگىن اقپارات جانە قوعامدىق دامۋ ءمينيسترى ايدا بالايەۆانىڭ قازاقستاندىق تەلەۆيزيادا وتاندىق كونتەنتتى دامىتۋ بويىنشا جاس رەجيسسەرلەرمەن كەزدەسۋى ءوتتى. ايدا بالايەۆا جاستارعا مينيسترلىكتىڭ قازاقستاندىق تەليەۆيزياداعى ساپالى كونتەنتتى دامىتۋ بويىنشا، ونىڭ ىشىندە قوعامدى مازالايتىن جانە ەرەكشە يدەولوگيالىق ماڭىزى بار وزەكتى تاقىرىپتارعا ارنالعان سەريالدار، دەرەكتى فيلمدەر، ارنايى باعدارلامالار جاساۋ بويىنشا جۇرگىزىپ جاتقان جۇمىستارى تۋرالى ايتتى.
«ءبىزدىڭ مينيسترلىك مەملەكەتتىك تاپسىرىستىڭ جانە مەملەكەتتىك اقپاراتتىق تاپسىرىس شەڭبەرىندە جىل سايىن ەلۋگە جۋىق تەلەحيكايالاردىڭ ءتۇسىرىلىمىن قامتاماسىز ەتەدى؛ ال دەرەكتى فيلمدەردىڭ سانى جۇزدەن اسادى. ولاردىڭ كەيبىرەۋلەرى كورەرمەندەر اراسىندا تانىمال بولسا، كوپشىلىگىنىڭ ساپاسى، وكىنىشكە قاراي، سىن كوتەرمەيدى»، - دەدى مينيستر.
سونىمەن قاتار، مينيستر ۆەدومستۆونىڭ الداعى 2022 -جىلى تۇسىرەتىن تەلەسەريالدار مەن دەرەكتى فيلمدەرىنىڭ ۇزدىك سسەنارييلەرىن دايىنداۋعا بايقاۋ جاريالاپ جاتقانىن اتاپ ءوتتى.
«ونىڭ نەگىزگى تاقىرىپتارى مينيسترلىكتىڭ سايتىندا جاريالاناتىن تاقىرىپتىق جوسپارلار تىزىمىندە كورسەتىلگەن»، - دەدى ايدا بالايەۆا.
جالپى، مينيسترمەن كەزدەسۋگە وتاندىق قىزىقتى جوبالاردى قۇرۋدا تاجىريبەسى بار 29 جاس رەجيسسەر قاتىستى. ايدا بالايەۆا جاس رەجيسسەرلەردى ءدال وسى 2021 -جىلى مينيسترلىككە جانە مەملەكەتتىك تەلەارنالارعا سەريالدار مەن فيلمدەردىڭ جاڭا سسەناريلەرىن ۇسىنۋعا شاقىردى. ءىس- شاراعا قاتىسۋشىلار مينيسترلىككە قازاقستاندىق تەلەۆيزيادا ەرەكشە، قىزىقتى جانە ساپالى كونتەنت قۇرۋدا جاڭا جوبالاردى ۇسىنۋعا نيەتى مەن دايىندىعىن ءبىلدىردى.