كوروناۆيرۋسپەن اۋىرعان ناۋقاستى ەمدەۋگە قانشا قاراجات كەتەدى

نۇر-سۇلتان. قازاقپارات - ورتالىق كوممۋنيكاتسيالار قىزمەتىندە وتكەن بريفينگتە «الەۋمەتتىك مەديتسينالىق ساقتاندىرۋ قورى» ك ە ا ق مەديتسينالىق كومەكتىڭ ساپاسىن باقىلاۋ دەپارتامەنتىنىڭ ديرەكتورى لاززات شومانوۆا كوروناۆيرۋسپەن اۋىرعان ادامدى ەمدەۋگە قانشا قاراجات كەتەتىنىن ايتتى، دەپ حابارلايدى قازاقپارات ءتىلشىسى.

«كوروناۆيرۋسپەن اۋىرعان ناۋقاستى ەمدەۋعا قانشا قاراجات كەتەتىنى اۋرۋدىڭ قالاي ءوتىپ جاتقانىنا بايلانىستى. سىرقات جەڭىل، ورتاشا نەمەسە اۋىر جاعدايدا ءوتۋى مۇمكىن. ورتاشا دەڭگەيدە اۋىرىپ جاتقان ادامعا 400 مىڭ تەڭگەدەن استام قاراجات كەتەدى. اۋىر تۇردە اۋىرىپ جاتقان ادامعا 800 مىڭ تەڭگەدەن استام قاراجات جۇمسالادى. بۇل سوماعا بارلىق زەرتحانالىق جانە دياگنوستيكالىق قىزمەتتەردىڭ قۇنى، سونداي-اق، ناۋقاستىڭ اۋرۋحانادا الاتىن ەمى كىرەدى»، - دەيدى «الەۋمەتتىك مەديتسينالىق ساقتاندىرۋ قورى» ك ە ا ق مەديتسينالىق كومەكتىڭ ساپاسىن باقىلاۋ دەپارتامەنتىنىڭ ديرەكتورى لاززات شومانوۆا.

ەسكە سالا كەتسەك، «الەۋمەتتىك مەديتسينالىق ساقتاندىرۋ قورىنىڭ» باسقارما ءتوراعاسى بولات توكەجانوۆ وتكەن جىلى كوروناۆيرۋس ينفەكسياسىمەن كۇرەس شەڭبەرىندە ءىس- شارالاردى قارجىلاندىرۋ ءۇشىن مىندەتتى الەۋمەتتىك مەديتسينالىق ساقتاندىرۋ قورىنان 187,7 ميلليارد تەڭگە بولىنگەنىن ايتقان بولاتىن.

اۆتور: زارينا قاھارمان