دجو بايدەندى ۇلىقتاۋ ءراسىمى قالاي وتەدى؟
بۇل سالتاناتتى شارا ءار ءتورت جىل سايىن ءداستۇر بويىنشا 20 - قاڭتارعا بەلگىلەنىپ، مىڭداعان كورەرمەن جانە اسكەري پارادپەن ەستە قالاتىن. الايدا كوۆيد ىندەتىنىڭ تارالۋىنا بايلانىستى بيىلعى راسىمگە كوپتەگەن شەكتەۋ قويىلدى.
ۇلىقتاۋ ءراسىمى بيىل قالاي وتەدى جانە قالاداعى قاۋىپسىزدىك شارالارى قانداي دەڭگەيدە؟ ا ق ش تاريحىنداعى پرەزيدەنتتى ۇلىقتاۋدىڭ 59-راسىمىنە دايىندىق جۇمىستارى جالعاسىپ جاتىر. بۇل كۇندەرى ۆاشينگتون قۇددى ءبىر اسكەري ايماققا اينالعانداي. ويتكەنى كۇن تارتىبىندەگى ەڭ ماڭىزدى ماسەلە قاۋىپسىزدىك شارالارى.
رەسمي اقپاراتتار بويىنشا قالاداعى قاۋىپىسىزدىكتى قامتاماسىز ەتۋگە ۇلتتىق گۆارديانىڭ 25000-عا جۋىق ساربازى جۇمىلدىرىلىپ، جۇزدەگەن اسكەري تەحنيكا تارتىلعان. ال قالا 3 نەگىزگى باقىلاۋ ايماعىنا بولىنگەن. سونىمەن قاتار، ورتالىق كوشەلەرىنىڭ بارلىعى جابىلىپ، ارنايى بلوك بەكەتتەر قويىلعان. ۆاشينگتون وكرۋگىنىڭ مەرى ميۋريەل بوۋزەر كاپيتوليگە باسىپ كىرىپ، راديكالدىق ارەكەتكە بارعان ترامپ قولداۋشىلارىنىڭ كەزەكتى شابىلۋى 20 - كۇنى دە بولۋى مۇمكىن دەپ مالىمدەپ، قالاداعى توتەنشە جاعدايدى قاڭتاردىڭ 21-نە دەيىن ۇزارتقان ەدى.
ميۋريەل بوۋزەر، كولۋمبيا وكرۋگىنىڭ مەرى:
- ۇلىقتاۋ ءراسىمى بۇرىنعىدان وزگەشە بولارى ءسوزسىز. پرەزيدەنتتىك بيلىكتىڭ دونالد ترامپتان دجو بايدەنگە بەيبىت فورمادا ءوتۋى ءۇشىن بارلىق جاعداي جاسالۋدا. ءدال قازىر مەن ءوزىم ءۇشىن ەمەس، ەلىمىزدىڭ دەموكراتياسى ءۇشىن الاڭداۋدامىن. ەكى اپتا بۇرىنعى تارتىپسىزدىك پەن شابۋىلدىڭ قايتالانۋىنا جول بەرمەيمىز. ۆاشينگتون قالاسىنىڭ وسىنداي ماڭىزدى شارانى وتكىزەتىنى بارلىعىمىزعا جاۋاپكەرشىلىك ارتادى.
نيۋ- يورك تايمستىڭ مالىمەتى بويىنشا ۆاشينگتوننان بولەك ا ق ش- تىڭ كاليفورنيا، ورەگون، ميچيگان، ۋيسكونسين، جانە كەنتۋكي سياقتى وزگە دە قۇبىلمالى شتاتتارىنىڭ ورتالىقتارىندا دا قاۋىپسىزدىك شارالارى كۇشەيتىلدى. قۇپيا قىزمەت پەن فەدەرالدى تەرگەۋ بيۋروسىنىڭ (FBI) مالىمەتىنشە الاڭداۋعا نەگىز جوق.
بيىلعى ۇلىقتاۋ ءراسىمىنىڭ تاعى ءبىر ەرەكشەلىگى كوۆيد ىندەتىنە بايلانىستى ءداستۇرلى شەرۋ جانكۇيەرسىز وتەدى. امەريكالىقتار ونلاين فورماتتاعى مەرەكەلىك باعدارلاماداردى تاماشالاي الادى. كاپيتوليدىڭ الدىنداعى National Mall الاڭىنا 200 مىڭ جالاۋشا ورناتىلدى. بۇل ۇلىقتاۋ راسىمىنە قاتىسا المايتىن امەريكالىقتاردى بەينەلەيتين سيمۆول رەتىندە ورناتىلدى دەيدى ۇيىمداستىرۋشىلار.
جەرگىلىكتى تۇرعىن:
- بايدەننىڭ ۇلىقتاۋ راسىمىنە وراي قالانىڭ وزگەرگەنى مەنى تاڭ قالدىردى. ۆاشينگتوندا 20 جىلعا جۋىق ءومىر سۇرەمىن. بۇرىن سوڭدى مۇنداي ساقتىق شارالارىن كورمەدىم. بۇل قانشا دەگەنمەن ءبىزدىڭ دەموكراتيامىزدىڭ، بوستاندىعىمىزدىڭ سيمۆولى ەمەس پە؟ ءبىراق قازىر بارلىعى وزگەشە.
ۇلىقتاۋ ءراسىمى امەريكالىقتاردىڭ ىشكى مەيرامى سانالعاندىقتان، ادەتتە شەتەل باسشىلارىنا شاقىرتۋ جىبەرىلمەيدى. الايدا ا ق ش- تىڭ بۇرىنعى پرەزيدەنتتەرىنىڭ ءبىرقاتارى بايدەننىڭ انت قابىلداۋىنا قاتىسادى دەپ كۇتىلىپ وتىر. ولاردىڭ قاتارىندا، باراك وباما، دجوردج بۋش جانە بيلل كلينتون بار. بايدەندى ۇلىقتاۋ ءراسىمى ەرتەڭ ۆاشينگتون ۋاقىتى بويىنشا تۇسكى ساعات 12-دە وتەدى.
www.24.kz