باكتەريادان قورعايتىن اقىلدى بەتپەردە پايدا بولدى

نۇر-سۇلتان. قازاقپارات - امەريكالىق زەرتتەۋشىلەر ادامدى باكتەريادان قورعايتىن ارنايى سۇزگى ورناتىلعان بەتپەردە شىعاردى، دەپ حابارلايدى «حابار 24».

يننوۆاتسيالىق ماسكا ىشىندەگى اۋانى سالقىنداتا الادى. ناتيجەسىندە ادامنىڭ بەتى مۇلدە تەرلەمەيدى ەكەن. تاعى ءبىر ەرەكشەلىگى - بەتپەردە قاراڭعى جەردە جارىق شاشىپ، باسقالارعا كورىنىپ تۇرادى. سونداي- اق وندا ۋلتراكۇلگىن شامدار مەن ميكروفون بار. ازىرگە ماسكا اق جانە قارا ءتۇستى بولىپ شىعادى. ونىڭ باعاسى ءالى ناقتىلانباعان. ءبىراق كومپانيا وكىلدەرىنىڭ ايتۋىنشا، اقىلدى بەتپەردە جاقىندا جاپپاي ساتىلا باستايدى.

كۋشال تاندون، كومپانيا وكىلى:

- مىنە، بەتپەردەنىڭ ەكى نۇسقاسى. ءبىز فورماسىن كەلتىرۋگە جانە دۇرىس سيليكوندى استارىن جاساۋعا كوپ ۋاقىت جۇمسادىق. ونداعى ويىمىز، ۇزاق كيىلسە ەكەن دەيمىز. ال مىناۋ - ميكروبتاردى وتكىزبەي ۇستاپ قالاتىن سۇزگىلەرى.