قازاقستاندا ەت ايتارلىقتاي قىمباتتادى

نۇر-سۇلتان. قازاقپارات - قازاقستاندا ءبىر جىل ىشىندە ەت، اسىرەسە سيىر ەتى، جىلقى ەتى مەن قوي ەتى قىمباتتادى. ەتتىڭ كەي ءتۇرى بىردەن 16 پايىزعا قىمباتتاعان، - دەپ حابارلايدى Energyprom.

ساراپشىلاردىڭ مالىمەتىنشە، 2020-جىلدىڭ ءۇشىنشى توقسانىندا ءاربىر قازاقستاندىق ورتا ەسەپپەن 21,3 كەلى ەت پەن ەت ءونىمىن تۇتىنعان. بۇل 2020-جىلدىڭ ەكىنشى توقسانىمەن سالىستىرعاندا 1 كەلىگە جانە 2019-جىلدىڭ ءۇشىنشى توقسانىمەن سالىستىرعاندا 1,4 كەلىگە كوپ. وسىلايشا، ەلدە ەت ءونىمىن تۇتىنۋ ءبىر جىلدا جەتى پايىزعا ارتقان.

«ەت تۇتىناتىندار قازاقستاننىڭ بارلىق وڭىرىندە ارتتى. قاراعاندى وبلىسىندا ءار تۇرعىن ورتاشا ەسەپپەن 26,8 كەلى ەت تۇتىنعان. ودان كەيىن اقمولا وبلىسىنىڭ (25,4 كەلى) جانە الماتى قالاسىنىڭ (25,2 كەلى) تۇرعىندارى.

2020-جىلدىڭ ءۇشىنشى توقسانىندا ەت تۇتىناتىندار سانى ءوسۋى قاراعاندى وبلىسىندا (3,3 كەلى)، نۇر-سۇلتاندا (2,7 كەلى) جانە جامبىل وبلىسىندا (2,3 كەلى) بايقالادى»، - دەلىنگەن ساراپشىلاردىڭ زەرتتەۋىندە.