قىزىلوردالىق پوليتسەيلەر بەس اي بويى جاسىرىنعان قىلمىسكەردى ىزدەپ تاپتى

قىزىلوردا. قازاقپارات - قىزىلوردالىق پوليتسەيلەر باس بوستاندىعى شەكتەلگەن ازاماتتى تىعىلىپ جۇرگەن جەرىنەن بەس ايدان كەيىن ىزدەپ تاپتى، دەپ حابارلايدى قازاقپارات ءتىلشىسى.

بۇل ازامات سىرداريا اۋدانىندا پروباتسيالىق ەسەپتە تۇرعان. 2018-جىلى ەسىرتكى ەگۋ قىلمىسى بويىنشا سوتتالعان ول ءتيىستى جازاعا تارتىلدى.

كەيىننەن سوتتالۋشى جەڭىل جازا تۇرىنە اۋىستىرىلىپ، باس بوستاندىعىن شەكتەۋ جازاسى قاراستىرىلعان.

سوڭعى ۋاقىتتا تاعىلعان ايىپ بويىنشا جازادان بوي تاسالاعان وعان ىزدەۋ جاريالاندى.

«ونى وبلىس اۋماعىنان 5 اي بويى ىزدەستىرۋگە تۋرا كەلدى. پوليتسەيلەر 55 جاستاعى اۋدان تۇرعىنىن قىزىلوردا قالاسىندا جاسىرىنىپ جاتقان جەرىنەن تاپتى. قازىر ول قاماۋعا الىندى»، - دەيدى اۋداندىق پوليتسيا ءبولىمى باستىعىنىڭ جەدەل جۇمىستار جونىندەگى ورىنباسارى ءادىلحان قانزادايەۆ.

سونداي-اق، قىزىلوردادا 152 ادامدى الداپ، 90 ميلليون تەڭگەنى قالتاسىنا باسقان ايەل سوتتالدى.